Siðanefnd segir að skilja megi ummæli Sigmundar Davíðs sem hæðni gagnvart þolendum kynferðisofbeldis

Siða­nefnd Alþingis telur Sigmund Davíð Gunn­laugs­son, for­mann Mið­flokks­ins, hafa tekið undir van­virð­andi orð­færi sam­flokks­manna sinna um konur. Í áliti sínu segir nefndin að skilja megi orð hans sem hæðni gagn­vart þolendum kyn­ferð­is­of­beldis.

Nið­ur­staða nefnd­ar­innar er sú að Sig­mundur Davíð hafi ekki gerst brot­legur við siða­reglur alþing­is­manna vegna þeirra orða sem hann lét falla á Klaust­urs­upp­tök­unum. Í áliti nefnd­ar­innar, sem birt var á mbl.is í morgun, segir að það hafi ekki verið talin þörf á að meta hvert og eitt atriði í ummælum Bergþórs Ólasonar og Gunnars Braga Sveins­sonar, þar sem þau væru öll af sömu rót­inni sprottin. „Þau eru ósæmi­leg og í þeim felst van­virð­ing er lýtur að kyn­ferði þeirra kvenna sem um er rætt. Siða­nefnd telur þau einnig til þess fallin að kasta rýrð á Alþingi og skaða ímynd þess, auk þess sem þau sýna Alþingi, stöðu þess og störfum ekki virð­ingu.“

Á Klaust­urs­upp­tök­unum mátti heyra þing­menn­ina gant­ast með að Albertína Frið­björg Elí­as­dóttir, þing­maður Sam­fylk­ing­ar­innar, hefði reynt að „nauðga“ þeim, ann­ars vegar á herra­kvöldi íþrótta­fé­lags­ins Vestra og hins vegar í sam­komu­hús­inu í Hnífsdal. Segjast þeir hafa orðið fyrir áreitni og kyn­ferð­is­broti í and­mæla­bréfum sínum til siða­nefndar.

Sig­mundur Davíð tók þátt í þessum umræðum og sagði meðal ann­ars:

„Það voru ýmsir sem sögðu „take one for the team“ en Beggi var ekki til.“

„Þessir menn munu aldrei ná bata nema þeir opni sig, og það í opnu­við­tali.“

„Þið sjáið að þessir menn þurfa stuðn­ing, skiln­ing og stuðn­ing.“

„Já, ég meina það [áfengi] er oft besta leiðin til að takast á við svona.“

„Ef menn vilja vera með í nútím­anum þá fara þeir í við­tal á DV.“

Siða­nefndin telur að ummæli Bergþórs og Gunnars Braga hafi verið alvar­leg. „Fram­an­greind ummæli Sig­mundar Davíðs Gunn­laugs­sonar verður að meta með hlið­sjón af því að þau eru sögð í beinum tengslum við yfir­lýs­ingar þeirra um kyn­ferð­is­lega áreitni og til­raun til nauðg­unar,“ segir í álit­inu. „Með þeim tekur hann þátt í umræð­unum og virð­ist taka undir orð­færið í garð Albertínu Frið­bjargar Elí­as­dóttur.“

Telur siða­nefnd að Sig­mundur Davíð skuli njóta vafans varð­andi þau ummæli sem féllu fyrst í umræð­unum áður en ljóst varð um hvern var rætt. „Í öðrum ummælum virð­ist vera ákveð­inn und­ir­tónn sem skilja má sem hæðni gagn­vart þolendum kyn­ferð­is­of­beldis. Siða­nefnd telur þau þó of almenn til þess að meta þau and­stæð siða­reglum.“

Loks eru nefndar athuga­semdir Sig­mundar Davíðs í umræðum um útlit Írisar Róberts­dóttur, bæj­ar­stjóra Vest­manna­eyja­bæjar. Hafði þá Bergþór Ólason sagt: „Nú ætla ég að segja eitt sem er nátt­úru­lega mjög dóna­legt, en það fellur hratt á hana. Hún er miklu minna hot í ár en hún var bara fyrir tveimur árum síðan. Það er ótrú­legur munur.“

Lét Sig­mundur Davíð eft­ir­far­andi ummæli falla í þessu sam­bandi: „Og á þeim for­sendum segi ég að hún hrynji niður list­ann.“

Telur siða­nefndin að ummæli Bergþórs um Írisi lýsa til­teknum við­horfum til ungra kvenna í stjórn­málum. „Fram­an­greind ummæli Sig­mundar Davíðs verður að meta með hlið­sjón af því að þau eru sögð í beinum tengslum við þau ummæli. Hann tekur þátt í umræð­unum og tekur þannig undir orð­færi Bergþórs Ólasonar í garð Írisar Róberts­dóttur.“