73 brautskráðust úr leikskólakennarafræði á síðasta ári, 93 færri en árið 2006, þegar 166 luku námi og höfðu aldrei verið fleiri. Aðeins tveir brautskráðust árið 2013 þegar útskrift fór fram í fyrsta sinn eftir að leikskólakennaranám var lengt úr þremur árum í fimm með lagasetningu árið 2008.
Þetta er á meðal þess sem fram kemur í svari háskóla-, iðnaðar- og nýsköpunarráðherra við fyrirspurn Sigmundar Davíðs Gunnlaugssonar, formanns Miðflokksins, um hversu margir hafa útskrifast með B.Ed.-gráðu og M.Ed.-gráðu í leikskólakennarafræði ár hvert á árunum 2005-2022.
Mannekla hefur einkennt leikskóla borgarinnar svo árum skiptir en undanfarið hefur annar vandi bæst við þar sem leikskólum hefur verið lokað og starfsemi færð annað vegna raka- og mygluskemmda. Biðlistar eftir leikskólaplássi lengjast og foreldrar hafa komið saman í ráðhúsi Reykjavíkur fyrir fundi borgarráðs á fimmtudögum síðustu vikur og mótmælt stöðunni. Reykjavíkurborg greindi frá því í síðustu viku að einn leikskóli mun ekki taka við nýjum börnum í haust og að endurbætur og framkvæmdir á leikskólahúsnæði munu hafa áhrif á innritun sex annarra leikskóla.
Óvíst hvort leikskólakennarar starfi á leikskólastiginu
Eftir að námið var lengt úr þremur árum í fimm árið 2008 fækkaði brautskráðum leikskólakennurum úr 47 árið 2012 í 2 árið 2013 þegar aðeins tveir brautskráðust. Á árunum 2014-2020 voru brautskráningar á bilinu 12-31. Árið 2021 fjölgaði brautskráningum á ný eftir innleiðingu svokallaðs MT-náms, sem er á sama stigi og M.Ed.-nám, sem veitir kennararéttindi.
Þannig voru brautskráningar 31 árið 2020 en 41 árið 2021 þegar fyrsta brautskráningin úr MT-náminu fór fram. Meistaranám til kennslu, MT-nám, er aðgengilegt þeim sem hafa lokið 120 einingum á bakkalárstigi í kennslugreinum grunnskóla. Að loknu tveggja ára námi er hægt að sækja um leyfisbréf sem kennari óháð skólastigi. Í fyrra voru brautskráningarnar 73 eins og áður segir.
Brautskráðum leikskólakennurum er því farið að fjölga á ný en ljóst er að lenging námsins annars vegar og lagabreyting sem tók gildi í upphafi árs 2020 þar sem kennarar fá eitt leyfisbréf óháð skólastigi hafa haft áhrif á fjölda leikskólakennara sem starfa á leikskólastigi.
Mannekla birtingarmynd á alvarlegasta vanda leikskólastigsins
Skúli Helgason, borgarfulltrúi Samfylkingarinnar og fyrrverandi formaður skóla- og frístundasviðs Reykjavíkurborgar, vakti athygli á þróun fjölda brautskráðra úr leikskólakennarafræði á fundi borgarstjórnar í gær. Hann sagði manneklu vera birtingarmynd á alvarlegasta vanda leikskólastigsins í borginni undanfarinn áratug.
Skúli sagði áhrif lengingar námsins árið 2008 vega þungt, auk þess sem lagabreytingin um eitt leyfisbréf óháð skólastigi sem tók gildi í upphafi árs 2020 hafi haft alvarlegar afleiðingar þar sem aðsókn í námið hafi hrunið. „Og í stað þess að við værum að útskrifa í kringum áttatíu nýja kennara inn í leikskólana á hverju ári eins og var frá árunum 2010-2011, þá fór fjöldinn þegar verst lét í rúmlega tuttugu á ári. Og hélst þannig í mörg ár, lungann af síðasta áratug. Þannig að það var fall í fjölda útskrifaðra um 75 prósent,“ sagði Skúli á fundi borgarstjórnar í gær þar sem tillaga borgarfulltrúa Sjálfstæðisflokks um bráðaaðgerðir í málefnum barna á leikskólaaldri var til umfjöllunar.
Athugasemdir