Útgöngubann í Bretlandi: „Þið verðið að vera heima“

Boris Johnson for­sæt­is­ráð­herra Bret­lands til­kynnti í kvöld að nær algjört útgöngu­bann tæki gildi í land­inu nú þegar. Núna á fólk í Bret­landi að vera heima, með örfáum und­an­tekn­ingum. Einungis tveir mega koma saman á almanna­færi, nema þeir búi á sama heim­ili.

Johnson ávarp­aði bresku þjóð­ina kl. 20:30 og var ómyrkur í máli. „Þið verðið að vera heima,“ sagði for­sæt­is­ráð­herr­ann.

Frá og með þess­ari stundu mega íbúar í Bret­landi ein­ungis fara út til þess að versla helstu nauð­synja­vörur, eins sjaldan og unnt er. Einnig má fólk fara út að hreyfa sig einu sinni á dag, en þá ein­samalt eða með öðrum sem búa á sama heim­ili.

„Þú átt ekki að hitta vini. Ef vinir þínir biðja þig um að hitta sig, þá ættir þú að segja nei,“ sagði Johnson og bætti við að ef fólk færi ekki að reglum hefði lög­regla heim­ild til þess að beita sektum eða til þess að leysa upp sam­komur.

Fólk má fara út til þess að sækja sér lækn­is­þjón­ustu og einnig má fara út til þess að hlúa að öðrum. Svo má fólk ferð­ast til vinnu, en ein­ungis í þeim til­fellum þar sem það er algjör­lega nauð­syn­legt og vinnan getur ekki farið fram að heiman.

Rík­is­stjórnin hefur þannig ákveðið að öllum versl­unum sem selja annað en ýtr­ustu nauð­synja­vörur, mat­vöru og lyf, verði lokað umsvifa­laust. Engar trú­arat­hafnir nema jarð­ar­farir verða leyfðar.

Johnson hafði verið tregur til að grípa til þess ráðs að setja á útgöngu­bann, en hafði áður veitt almenn­ingi til­mæli um að halda sig heima og koma þannig í veg fyrir smit og vara við því að ef ekki yrði farið að ráðum yfir­valda þyrfti að grípa til harð­ari aðgerða.

Tilmælin ein og sér virt­ust þó ekki ná eyrum almenn­ings og um helg­ina kom fjöldi fólks saman víða um Bretland til ýmissa við­burða.

Á fjórða hund­rað manns hafa lát­ist vegna COVID-19 í Bret­landi til þessa og hefur Johnson látið hafa eftir sér að hann ótt­ist að þróun mála í Bret­landi sé um það bil tveimur vikum á eftir þeirri þróun sem hefur átt sér stað á Ítalíu.