Jóhanna Sigurðardóttir færir fram harða gagnrýni á Árna Pál Árnason, arftaka hennar í stóli formanns Samfylkingarinnar, í heimildarmynd þar sem skyggnst er á bak við tjöldin í stjórnarráðinu síðustu daga hennar í embætti forsætisráðherra.
Í myndinni heyrist Jóhanna gagnrýna Árna Pál í samtali við Hrannar Björn Arnarson, aðstoðarmann hennar. „Ég held að hann sé búinn að skjóta sig mjög alvarlega í fótinn með þessu,“ segir Jóhanna. „Hann sagði sjálfur að hann hefði haft umboð þingflokksins sem hann hafði ekki,“ bætir hún við.
„Það er hreinlega allt brjálað í okkar röðum, heyrist mér,“ svarar Hrannar Björn Arnarsson, aðstoðarmaður hennar.
Það sem Jóhanna vísar til er ákvörðun Árna Páls að fresta því að ljúka samþykkt nýrrar stjórnarskrár fyrir alþingiskosningarnar sem haldnar voru í lok apríl 2013. Svo fór að Árni Páll lýsti því yfir opinberlega í byrjun mars 2013 að Alþingi gæti ekki klárað málið fyrir kosningar. Þess í stað vildi hann semja við stjórnarandstöðuflokkana um kafla frumvarps til nýrrar stjórnarskrár. Frumvarpið byggði á drögum stjórnlagaráðs, sem kosið var í beinni kosningu, og var samþykkt í þjóðaratkvæðagreiðslu í október 2012 að leggja drög stjórnlagaráðs til grundvallar nýrri stjórnarskrá.
Í myndinni segir Jóhanna að hún hafi lagt „mjög mikinn metnað í það að þjóðin fái nýja stjórnarskrá.“
„Þingið hefur allar forsendur til að ljúka málinu með farsælum hætti áður en kjörtímabilinu lýkur,“ segir hún í ræðu sem sýnd er í myndinni. Svo fór hins vegar ekki. Fjallað var ítarlega um málið í forsíðugrein Stundarinnar í síðasta mánuði.
Sjálfstæðisflokkur og Framsóknarflokkurinn náðu tæpum meirihluta í kosningunum og var ákveðið að setja stjórnarskrána í nefnd. Ekki er útlit fyrir að stjórnarskrá stjórnlagaráðs verði samþykkt af Alþingi, en hins vegar hefur Bjarni Benediktsson, formaður Sjálfstæðisflokksins, lýst því yfir að breytingar geti verið gerðar á núverandi stjórnarskrá. Bjarni hefur lagt til að þjóðin kjósi um afmörkuð atriði stjórnarskrárinnar samhliða komandi forsetakosningum, en hins vegar hefur þegar verið kosið um þau atriði í þjóðaratkvæðagreiðslu.
Heimildarmyndin Jóhönnu heitir: Jóhanna - Síðasta orrustan. Hún hefst á landsfundi Samfylkingarinnar 2013 þegar Árni Páll Árnason tekur við af Jóhönnu. Í maí 2013 tók Sigmundur Davíð Gunnlaugsson við lyklunum að forsætisráðuneytinu af Jóhönnu. Þetta er í fyrsta skipti sem heimildarmynd af þessu tagi er gerð á Íslandi, þar sem fylgst er með stjórnmálamanni í valdastöðu og þeirri atburðarrás sem fylgirmeðferð Alþingis á stóru máli, samkvæmt upplýsingum frá framleiðendum myndarinnar. Leikstjóri og handritshöfundur er Björn Brynjólfur Björnsson og er hann jafnframt handritshöfundur ásamt Elísabetu Ronaldsdóttur. Jón Karl Helgason sá um kvikmyndatöku og tónlistin í myndinni er eftir Tryggva M. Baldursson. Myndin verður frumsýnd í Bíó paradís 15. október næstkomandi.
Niðurstöður skoðanakönnunar, sem birt var í síðustu viku, voru að 43 prósent teldu Jóhönnu hafa staðið sig best allra forsætisráðherra sem nefndir voru í könnuninni.
Stjórnarskrármálið
Nýja stjórnarskráin fordæmi um hvernig hunsa megi þjóðaratkvæðagreiðslu
Guðni kallar eftir miklum breytingum á stjórnarskránni
Vísindavefurinn: Þjóðin er stjórnarskrárgjafinn
Leggja fram „nýju stjórnarskrána“ á Alþingi
„Ég er oft á milli steins og sleggju þegar kemur að viðkvæmum málum“
Athugasemdir