Þetta var 2006. Bandaríkjastjórn hafði gengið svo fram af miklum fjölda fólks um allan heim, einnig vinum og bandamönnum, að brezki háðfuglinn Sacha Baron Cohen fór á stúfana til að þakka fyrir sig.

Þið munið hvernig þetta byrjaði.

Í forsetakjörinu 2000 var George W. Bush að því kominn að tapa talningu atkvæða í Flórída þar sem bróðir hans var ríkisstjóri. Talningin var þá stöðvuð og Hæstiréttur Bandaríkjanna dæmdi Bush embættið með 5 atkvæðum gegn 4 eftir flokkslínum. Al Gore, helzti keppinautur Bush, hafði fengið mun fleiri atkvæði á landsvísu, munurinn var hálf milljón. Gore hefði næstum örugglega einnig fengið fleiri atkvæði í Flórída sem reið baggamuninn í kjörráðinu hefði talningin ekki verið stöðvuð.

Álit Bandaríkjanna beið hnekki um allan heim og hún óx ekki við innrás Bandaríkjanna, Bretlands o.fl. ríkja í Írak með liðsinni Íslands, eða réttar sagt forsætisráðherra og utanríkisráðherra helmingaskiptaflokkanna, sem eru nú ýmist kallaðir Panamaflokkar eða Tortóluflokkar, að öllum öðrum fornspurðum.

Aðferð háðfuglsins var einföld. Hann bjó til bíómyndina Borat 2006 þar sem hann þóttist vera blaðamaður frá Kasakstan, drullusokkur og fífl, og fékk suma kjósendur repúblikana til að líða vel í návist sinni og opna sig fyrir framan vélarnar. Útkoman varð ein eftirminnilegasta gamanmynd aldarinnar til þessa.

Cohen endurtók afhjúpunina með annarri formúlu í sjónvarpsþáttaröðinni Who is America 2018 þar sem jafnvel Dick Cheney fv. varaforseti Bush forseta beit á agnið og gerði sig að fífli. Nokkrir þingmenn flokksins neyddust til að segja af sér eftir að myndin birtist.

Og nú er Borat aftur kominn á stjá. Ný mynd um ævintýri hans í Bandaríkjunum verður frumsýnd á Amazon-veitunni á morgun, tíu dögum fyrir kosningarnar annan þriðjudag. Þar fær hann Rudi Guiliani, einkalögfræðing Trumps forseta, til að bíta á agnið með opna buxnaklauf, en það breytir í rauninni engu um það sem þegar er vitað um Guiliani.

Myndin er því sögð veita áhorfendum vægara stuð en fyrri myndin frá 2006. Það stafar af því að repúblikanarnir sem opnuðu sig í fyrri myndinni 2006 eru svona í raun og veru og reyna ekki lengur að leyna því. Þeir sjá ekkert athugavert. Við höfum núna greiðan aðgang að þeim á YouTube sem var ekki raunin 2006; þess vegna urðu margir áhorfendur svo hissa í fyrra skiptið. Við sjáum og heyrum Trump forseta og menn hans tjá sig í sama stíl á hverjum degi – og einnig hér heima, einkum í Morgunblaðinu. Nú verður enginn lengur hissa. En heimildar- og skemmtigildi myndarinnar er ekki minna þótti efnið komi minna á óvart nú en áður.

Staðan í Bandaríkjunum nú, skömmu fyrir kosningarnar annan þriðjudag, er þessi. Trump forseti virðist mun tapa, trúlega með allmiklum atkvæðamun. Flokkur hans mun samt reyna að troða einum dómaranum enn inn í Hæstarétt fyrir forsetaskiptin 20. janúar n.k. Þar eð um 30 dómsmál eru í gangi gegn forsetanum, mislangt á veg komin, verður að teljast líklegt að hann verði fundinn sekur um lögbrot á næsta ári eða þar næsta.

Litlar sem engar líkur eru á því að eftirmaður hans í forsetaembætti náði Trump. Raunar nær náðunarvald forsetans aðeins til brota gegn alríkislögum en ekki gegn lögum einstakra fylkja. Nýr forseti mun væntanlega líta svo á að óheftur framgangur réttvísinnar gegn Trump forseta sé nauðsynlegur liður í því að endurreisa traust og virðingu Bandaríkjanna úti um heiminn eftir allt sem á undan er gengið.

En það mun ekki leysa allan vandann. Eftir mun standa, ef kapallinn rekur sig eins og lýst er að framan, að í Hæstarétti Bandaríkjanna munu sitja níu dómarar, þar af tveir sem hafa sætt trúverðugum ásökunum um kynferðisbrot, og þrír sem voru valdir og skipaðir í réttinn af forseta sem verður þá kominn bak við lás og slá -- nema hann flýi land eins og hann hefur reyndar sagt sjálfur að hann kunni að þurfa að gera ef hann tapar.

Í þessu ljósi virðist líklegt að nýr forseti sjái sig tilneyddan til að grípa til þess ráðs sem Roosevelt forseti hugðist en hætti við að beita 1937 til að vernda fólkið í landinu fyrir gömlum dómurum sem reyndu fyrsta kastið að ógilda kreppuráðstafanir forsetans. Ráðið er að fjölga dómurum í réttinum til að bæta árangur og ásjónu réttarkerfisins. Roosevelt hvarf frá ætlan sinni þar eð Hæstiréttur gafst upp fyrir hótuninni og hætti að flækjast fyrir rústabjörgunarráðstöfunum forsetans.

Og þá víkur sögunni hingað heim þar sem ríkisstjórnin dansar enn eins og ekkert hafi í skorizt eftir pípu útvegsfyrirtækja þar sem forstjórinn í einu þeirra hefur stöðu sakbornings í víðfeðmu efnahagsbrotamáli sem teygir anga sína yfir mörg lönd og hefur leitt til langvarandi gæzluvarðhalds yfir ráðherrum og öðru stórmenni í einu þeirra.

Sacha Baron Cohen ætti að gera kvikmynd um Ísland og Panama.