Anna Kolbrún var titluð þroskaþjálfi á framboðslista árið 2007 án menntunar

Anna Kolbrún Árna­dóttir var titluð þroska­þjálfi þegar hún sat í 9. sæti á fram­boðs­lista Fram­sókn­ar­flokks­ins í Norð­aust­ur­kjör­dæmi fyrir Alþing­is­kosn­ing­arnar árið 2007. Anna Kolbrún er hins vegar ekki þroska­þjálfi, líkt og komið hefur fram, meðal ann­ars í umfjöllun Stund­ar­innar. Óheimilt er að starfa sem þroska­þjálfi hafi fólk ekki menntun til þess og heim­ild frá heil­brigð­is­yf­ir­völdum.

Á vef­síð­unni kosn­ing.is, sem er í eigu og umsjón dóms­mála­ráðu­neyt­is­ins, má sjá fram­boðs­lista Fram­sókn­ar­flokks­ins frá árinu 2007 í Norð­aust­ur­kjör­dæmi. Þar kemur fram að Anna Kolbrún, sem sat í 9. sæti list­ans, var titluð þroska­þjálfi. Á aug­lýs­ingu frá lands­kjör­stjórn um fram­boð við alþing­is­kosn­ingar 2. maí 2007 er Anna Kolbrún einnig titluð þroska­þjálfi. Því er ljóst að Anna Kolbrún hefur titlað sig þroska­þjálfa í meira en ára­tug án þess að hafa til þess menntun eða heim­ild.

Anna Kolbrún er einn þeirra þing­manna sem hitt­ust á Klaustri bar þann 20. nóv­em­ber síð­ast­lið­inn og létu gamm­inn geysa. Stundin, DV og Kvenna­blaðið hafa fjallað ítar­lega um sam­skiptin sem náð­ust á hljóð­upp­töku.

Í ævi­á­gripi á vef Alþingis kom fram að Anna Kolbrún hafa unnið sem þroska­þjálfi. Þeirri skrán­ingu var breytt í gær en þar kemur ekki lengur fram að hún hafi starfað sem þroska­þjálfi. Þroska­þjálfa­fé­lag Íslands hefur til­kynnt land­lækn­is­emb­ætt­inu um óleyfi­lega notkun Önnu Kol­brúnar á titl­inum.

Í dag hófst þing­fundur á Alþingi með því að Stein­grímur J. Sig­fús­son, for­seti Alþingis, lýsti því að eftir skoðun á ævi- og starfs­fer­ils­skrán­ingu Önnu Kol­brúnar á vef Alþingis að hún hefði gefið réttar upp­lýs­ingar um menntun sína og störf. Rök­semd­irnar sem Stein­grímur lagði fram því til stuðn­ings voru þær að í ævi­á­gripi Önnu Kol­brúnar kæmi bara fram að hún hefði starfað sem þroska­þjálfi, ekki að hún hefði sagst vera það. Með öllu er óheim­ilt að sinna störfum þroska­þjálfa hafi fólk ekki til þess menntun. Þá má ekki titla sig þroska­þjálfa nema  hafa hlotið til þess menntun, háskóla­nám í fjögur ár og starfs­leyfi frá Land­lækn­is­emb­ætt­inu, enda er starfs­heitið þroska­þjálfi lög­verndað.