Tveir starfsmenn hjá Reykjavíkurborg hafa hætt síðan síðasta vor og fjöldi starfsmanna og stjórnenda kvartað vegna meiðandi og særandi orðræðu borgarfulltrúa.

Þetta kemur fram í svari starfsmannastjóra í ráðhúsinu við fyrirspurn RÚV. „Starfsmenn hafa lýst vanlíðan vegna þessa starfsumhverfis og hafa jafnframt upplifað kvíða bæði við að mæta til starfa og skila af sér verkefnum,“ segir Ragnhildur. Þeim hafi fundist að gert hafi verið lítið úr störfum þeirra, hæðst hafi verið að verkefnum sem þeir sinni og þeir jafnvel vændir um óheiðarleika.

Fagaðilar hafa komið að málinu og erindi hafa verið send á forsætisnefnd vegna málsins. „Í sumum tilfellum hefur verið erfitt að fá fólk til starfa vegna þessa starfsumhverfis,“ segir Ragnhildur.

Stefán Eiríksson borgarritari birti í gær afar harðort bréf á Facebook-síðu Reykjavíkurborgar sem gríðarlegur fjöldi fólks hefur aðgang að. Þar gagnrýndi hann framgöngu „fáeinna“ borgarfulltrúa undanfarna mánuði og sagði þá hafa „ítrekað vænt starfsfólk Reykjavíkurborgar um óheiðarleika og vegið með ýmsum öðrum hætti að starfsheiðri þeirra.“ Hvatti Stefán starfsfólk borgarinnar til að standa saman því það væri „ekki í boði að bregðast ekki við þegar slíkar ómaklegar og óheiðarlegar árásir eru gerðar á starfsfólk Reykjavíkurborgar.“

Ætla má að með orðum sínum sé Stefán meðal annars að vísa til Mörtu Guðjónsdóttur, borgarfulltrúa Sjálfstæðisflokksins, en deilur stóðu síðasta sumar milli Mörtu og Helgu Bjarkar Laxdal, skrifstofustjóra borgarstjórnar eftir að Marta sakaði starfsfólk borgarinnar um trúnaðarbrest.

Þá kvartaði Helga Björg Ragnarsdóttir, skrifstofustjóri skrifstofu borgarstjóra, í bréfi til forsætisnefndar í ágúst síðastliðnum, undan því að borgarfulltrúar hefðu farið fram með rangfærslur í umræðum á samfélagsmiðlum um dóm Héraðsdóms Reykjavíkur, sem felldi úr gildi áminningu sem Helga Björg veitti undirmanni sínum. Ekki er ólíklegt að þar hafi Helga Björg, sem þó nefndi engin nöfn í bréfi sínu, verið að vísa til Vigdísar Hauksdóttur, borgarfulltrúa Miðflokksins. Stefán Eiríksson sendi þannig Vigdísi tölvupóst 10. ágúst vegna færslu sem hún birti á Facebook-síðu sinni vegna dómsins. Þar gagnrýndi Stefán Vigdísi harðlega fyrir að hafa farið fram með rangfærslur og brotið trúnað.