Fréttir

Jón Baldvin svarar ekki fyrir meinta áreitni í Hagaskóla

Jón Baldvin Hannibalsson svarar ekki fyrirspurnum Stundarinnar um hvernig hann skýri sögur tveggja 13 og 14 ára stúlkna sem hann kenndi í Hagaskóla. Stundaskrá staðfestir kennslu hans við bekkinn, sem hann hafði áður sagt að engin gögn væru til um.

Steindór Grétar Jónsson

23. febrúar 2019 · 13:00

Birtist upphaflega í Stundinni fyrir 8 árum.

Jón Baldvin Hannibalsson, sem tugir kvenna hafa sakað um kynferðislega áreitni á rúmlega 50 ára tímabili, segist hafa svarað öllum þeim konum sem komið hafi fram undir nafni. Hann hefur hins vegar ekki svarað ítrekuðum fyrirspurnum Stundarinnar um meinta áreitni sem 13 og 14 ára nemendur sem hann kenndi í Hagaskóla árið 1967 lýstu undir nafni.

Í grein í Morgunblaðinu í gær skrifar ráðherrann fyrrverandi að hann hafi eytt kvöldstund í lestur þeirra 23 frásagna sem konur hafa birt og lýsa áreitni hans. Lesturinn hafi verið þarfur vegna væntanlegra málaferla hans.

„Annars vegar voru hinar hugrökku, sem sögðu til nafns,“ skrifar Jón Baldvin. „Þeim hef ég þegar svarað. Hinar voru sýnu fleiri sem földu sig bak við nafnleynd.“

Ósatt er að Jón Baldvin hafi þegar svarað konunum sem fram komu undir nafni. Í greinaskrifum sínum og sjónvarpsviðtölum hefur hann ekki brugðist við ásökunum Margrétar Schram, mágkonu Jóns Baldvins. Margrét sagði í viðtali við Stundina að hann hefði komið nakinn upp í rúm til sín þegar hún var á menntaskólaaldri í heimsókn hjá hjónunum í Edinborg.

Þá sagðist hann ekki mundu svara Matthildi Kristmannsdóttur og Maríu Alexandersdóttur, þar sem engin gögn sýndu að hann hefði kennt þeim í Hagaskóla árið 1967 þegar kynferðisleg áreitni hans gagnvart þeim á táningsaldri mun hafa átt sér stað.

„Engin gögn fyrirfinnast um að ég hafi kennt umræddum bekk,“ skrifaði Jón Baldvin í grein í Fréttablaðinu. „Meðan svo er, hef ég ekki meira um það að segja.“

Stundatöflur sanna kennslu Jóns Baldvins við bekkinn

Stundin hefur sýnt fram á að Jón Baldvin var vissulega kennari þeirra í íslensku það skólaárið og birt gögn úr Borgarskjalasafni því til staðfestingar. Stundatöflur frá Skólaskrifstofu, sem Jón Baldvin fékk afhentar frá safninu með tölvupósti á sama tíma og Stundin, staðfesta hins vegar kennslu hans í íslensku við bekkinn 2.X veturinn 1967 til 1968. Kenndi hann bekknum sex sinnum í viku. Bekkjarlisti, sem Borgarskjalasafn afhenti einnig, staðfestir að Matthildur og María voru báðar í bekknum, auk tveggja annarra kvenna sem Stundin hefur rætt við til staðfestingar á frásögnum þeirra.

Matthildur sagði í viðtali við Stundina að hún hefði farið að kvíða fyrir tímunum hjá Jóni Baldvini, þar sem hann hafi alltaf látið hana sitja eftir eina. Loks hafi Jón Baldvin farið að færa sig upp á skaftið. „Hann hélt áfram að strjúka mér og fór að troða sér aftan á stólinn hjá mér,“ sagði hún. „Þetta var svona gamall skólastóll með algjörlega beinu baki og beinu sæti. Honum tókst að troða sér fyrir aftan mig á milli mín og stólbaksins. Ég sat alveg á nippinu á stólnum. Hann var mjög grannur á þessum árum og ég líka og þetta tókst honum að gera. Hann byrjaði að káfa á mér allri og sleikti á mér hálsinn og eyrað og kinnina. Ég var algjörlega frosin. Ég gat ekki staðið upp. Ég gat ekki sagt neitt. Ég bara sat. Ég man eftir hvað ég skammaðist mín fyrir hvað væri að gerast.“

María Alexandersdóttir, bekkjarsystir Matthildar, lýsti einnig því sem hún upplifði sem áreiti Jóns Baldvins í Hagaskóla. Hann hafi strokið henni óþægilega og grúft sig upp við andlit hennar, sem henni hafi þótt óþægilegt. Framkoma hans hafi bundið enda á skólagöngu hennar. „Ég hef fengið viðbjóð, algjöran viðbjóð, að hann skuli hafa komist svona langt,“ sagði María. „Maður skilur þetta ekki.“