Að kvöldi dags þann 1. apríl 2016 snæddu mæðgurnar Astraea Jill Robert­son (Jill) og Amy Robert­son síð­bú­inn kvöld­verð heima hjá þeim Júlíusi Vífli Ingv­ars­syni, þáver­andi borg­ar­full­trúa Sjálf­stæð­is­flokks­ins í Reykja­vík, og eig­in­konu hans, Svan­hildi Blöndal presti, að Hagamel í Reykja­vík. Júlíus hafði neyðst til að seinka boð­inu um klukku­stund eða svo, að eigin sögn vegna fjöl­miðla­við­tala, og þótti mæðg­unum nokkuð til koma. Þær voru komnar alla leið frá heima­landi sínu, Skotlandi, í minn­ingu móður sinnar og ömmu, Catherine Öldu Laurens Weatherstone (Cathie), sem lést í jan­úar 2014.

Fæddist í SkotlandiCatherine Alda Laurens Weatherstone fædd­ist í Skotlandi árið 1929.

Cathie var dóttir Áslaugar Sívert­sen, fóst­ur­móður Júlíusar Vífils. Þetta hafði hins vegar alltaf verið leynd­ar­mál. Eitthvað sem eng­inn hafði hátt um á meðan þær voru báðar á lífi. Kvöld­verð­ur­inn við Hagamel var sér­stakur fyrir þær sakir að þau Jill og Júlíus höfðu ekk­ert hist síðan Cathie féll frá, en hún hafði verið tíður gestur á heim­ili móður sinnar, þ.e. fóst­ur­for­eldra hans. Þau ræddu um gamla tíma. Meðal ann­ars heim­sóknir fjöl­skyldu hennar til Íslands árin 1963 og 1971 sem og heim­sóknir Júlíusar til fjöl­skyld­unnar í Hel­ens­burgh í Skotlandi, þar sem hann hafði dvalist lang­dvölum sumrin 1964 og 1967.

Þegar mæðgurnar voru að skoða gam­alt fjöl­skyldu­albúm að loknum kvöld­verði síðar um kvöldið bað Júlíus þær hins vegar skyndi­lega um að fara. Svo mik­ill var asinn að þeim var tjáð að þær gætu tekið albú­mið með sér. Amy og Jill skyldu ekki hvers vegna honum lá svo mikið á að koma þeim út úr húsi. Síðar komust þær að því að þennan dag komu fyrstu fréttir um sjóði Júlíusar í skatta­skjólum fram. Frekari upp­ljóstr­anir úr Panama-skjöl­unum áttu eftir að vekja enn fleiri spurn­ingar hjá afkom­endum Cathie.

Þráði viðurkenningu

„Það eina sem mamma mín þráði var að verða við­ur­kennd sem dóttir móður sinnar,“ sagði Jill þegar blaða­maður ræddi við mæðgurnar fyrr í jan­úar. Þær voru komnar aftur til lands­ins til þess að leita frek­ari svara við ýmsum spurn­ingum sem hafa leitað á afkom­endur Cathie síð­ast­liðin ár. Jill og systk­ini hennar, þau David Weatherstone og Susan Barrie, hafa lengi verið for­vitin um sögu móður sinnar og lagt sig fram við að setja saman heild­stæða mynd. Í þeim leið­angri hafa þau farið margar ferðir til Íslands, rætt við ætt­ingja sína, og kom­ist að því hverjir höfðu vit­neskju um það hver hún væri í raun og veru. Þá hafa þau leitað svara við því hvers vegna Áslaug virð­ist ekki hafa getið einka­dóttur sinnar í erfða­skrá þvert á það sem móðir þeirra hafði sagt hana hafa fyr­ir­ætlun um. Dæmið gengur ekki upp í þeirra huga þar sem Áslaug lagði sig alltaf í líma við að halda sam­bandi og vildi allt fyrir dóttur sína gera, þrátt fyrir að sann­leik­ur­inn um þær tvær hafi alltaf þurft að fara leynt.