Bandaríski flugherinn hefur farið fram á andvirði um eins og hálfs milljarðs króna á fjárlögum Bandaríkjanna á næsta ári til framkvæmda á Keflavíkurflugvelli. Þetta kom fram í frétt Foreign Policy í síðustu viku og greint var frá á RÚV, en fjárveitingin verður notuð til framkvæmda við flugskýli á Keflavíkurflugvelli svo hægt verði að koma þar fyrir fleiri P8 Poseidon kafbátaleitarflugvélum. Eins og nýlega var fjallað um í fréttaskýringaþættinum Kveik hafa umsvif rússneskra kafbáta við Íslandsstrendur aukist umtalsvert að undanförnu. Samhliða hafa umsvif kafbátaleitarsveita aðildarríkja Atlantshafsbandalagsins stóraukist.
Aukin umsvif Bandaríkjahers á Íslandi og Atlantshafsbandalagsins í hafinu kringum Ísland gætu reynst Vinstri grænum erfið, en flokkurinn er með það á stefnuskrá sinni að Ísland skuli standa utan allra hernaðarbandalaga og hafna vígvæðingu. „Ekki á að leyfa heræfingar í landinu eða innan lögsögu þess. Ísland og íslenska lögsögu á að friðlýsa fyrir umferð með kjarnorku-, sýkla- og efnavopn í lofti, á láði og legi,“ segir meðal annars í stefnu Vg. Þá eigi Ísland að segja sig úr Atlantshafsbandalaginu og biðjast afsökunar á þátttöku sinni í hernaðaraðgerðum á þeirra vegum. Jafnframt skuli standa í vegi fyrir komu herskipa og herflugvéla til Íslands.
Flokksforysta Vinstri grænna þurfti að gefa talsvert eftir í andstöðu sinni við hernað og hernaðarbandalög þegar flokkurinn átti í ríkisstjórnarsamstarfi við Samfylkinguna á tímabilinu 2009 til 2013. Á þeim árum jukust framlög hins opinbera til Atlantshafsbandalagsins, auk þess sem Ísland varð, sem eitt af aðildarríkjum NATO, óbeinn þátttakandi í hernaðaraðgerðum bandalagsins í Líbíu. Á þessum árum fór Samfylkingin með utanríkisráðuneytið auk þess sem mikill þingmeirihluti var og er enn fyrir áframhaldandi veru Íslands í NATO.
„Atlantshafsbandalagið verði áfram
lykilstoð í vörnum Íslands“
Í stjórnarsáttmála nýrrar ríkisstjórnar, undir forystu Katrínar Jakobsdóttur, kemur fram að „þjóðaröryggisstefna Íslands sem samþykkt var af Alþingi“ verði höfð að leiðarljósi næstu ár. Í umræddri stefnu, sem samþykkt var í formi þingsályktunar þann 13. apríl 2016, kemur fram að „Atlantshafsbandalagið verði áfram lykilstoð í vörnum Íslands og meginvettvangur vestrænnar samvinnu sem Ísland tekur þátt í á borgaralegum forsendum til að efla eigið öryggi og annarra bandalagsríkja“. Þetta stangast á við stefnu Vinstri grænna en er í samræmi við stefnu flestra annarra flokka á Alþingi.
Ríkisstjórn Katrínar Jakobsdóttur
„Ég hef miklu meiri áhyggjur af vinstrinu á Íslandi heldur en VG“
Sambúðin sem sært hefur VG nánast til ólífis
Fylgi VG svo lítið „að það er spurning hvort að það geti minnkað mikið“
Þau stýra Íslandi
Stjórnarsáttmálinn er stefna Framsóknarflokksins
Athugasemdir