Glitnir HoldCo fer fram á að Stundin og Reykjavik Media afhendi öll gögn úr Glitni banka hf. og afrit af þeim sem blaðið hefur í fórum sínum. Þetta kemur fram í stefnu sem Stundinni var afhent í dag, en farið er fram á að málið verði lagt fram og þingfest í Héraðsdómi Reykjavíkur þann 31. október, þremur dögum eftir kosningar. Lögmaður Stundarinnar óskaði eftir því að málið yrði þingfest á morgun, 24. október, en við því var ekki orðið.
Í stefnunni er þess krafist að lögbannið sem Sýslumaðurinn á höfuðborgarsvæðinu lagði á Stundina og Reykjavik Media þann 16. október síðastliðinn verði staðfest, en jafnframt að viðurkennt verði að fjölmiðlunum sé óheimilt að birta eða fá birtar fréttir í öðrm fjölmiðlum sem byggja á eða eru unnar upp úr trúnaðargögnum úr Glitni. Þá er farið fram á að fjölmiðlunum verði gert að afhenda Glitni HoldCo öll gögn og afrit af þeim, hvort sem þau eru á rafrænu eða öðru formi, og að málskostnaðurinn lendi alfarið á Stundinni og Reykjavik Media.
Skorað er á stefndu að afhenda gögnin dómara í trúnaði og gegn þagnarskyldu. Tekið skal fram að Stundin mun ekki verða við þeirri kröfu, enda telur blaðið að slíkt myndi tefla trúnaði blaðsins við heimildarmenn í hættu og ganga gegn grundvallargildum blaðamennsku í lýðræðissamfélagi.
Í greinargerð stefnanda er fullyrt að Glitnir Holdco hafi þann 13. október „fengið það staðfest“ að gögnin sem Stundin byggi yfir einskorðuðust ekki við einstaklinga sem þegar hefði verið fjallað um heldur væri að finna þar upplýsingar um „þúsundur fyrrverandi og núverandi viðskiptamanna stefnanda“. Í ljósi þess að fyrirhuguð var frekari umfjöllun byggð á gögnunum hefði Glitnir HoldCo talið nauðsynlegt að krefjast lögbanns.
Fram kemur að erfitt sé „að mæla það tjón á ímynd og orðspori stefnanda [Glitni HoldCo] sem af háttsemi stefndu [Útgáfufélaginu Stundinni og Reykjavik Media] hlýst“ og að „ólögmæt háttsemi“ fjölmiðlanna leiði til skerðingar á réttindum Glitnis HoldCo og fyrrverandi og núverandi viðskiptamanna. Er sérstaklega minnst á „lánveitingar til svokallaðra „Engeyinga“ og viðskiptafélaga þeirra“ í þessu samhengi. Telur stefnandi að skilyrði fyrir takmörkun á tjáningarfrelsu séu fyrir hendi, enda varði málið upplýsingar sem séu undirorpnar trúnaði og þagnarskyldu samkvæmt lögum.
Viðskipti Bjarna Benediktssonar
Bjarni kominn með hlut í fjölskyldufyrirtækinu
Öll hneykslismálin sem Bjarni stóð af sér
Selur bankann sem fjölskyldan átti
Strangari kröfur gerðar á lögbönn á fjölmiðla
Atburðarásin í aðdraganda hruns: Hvað vissum við og hvað vissu þeir?
Athugasemdir