Loksins þegar eitthvað gerist í Kaupmannahöfn, þá er ég úti að aka og get ekki flutt af því neinar fréttir.

Ég veit ekkert um Peter Madsen og stóra kafbátamálið sem þið hafið ekki þegar heyrt í fréttunum á Íslandi.

Og hinar skelfilegu skotárásir sem átt hafa sér stað í Nörrebro hafa líka farið fyrir ofan garð og neðan hjá mér.

Ég ætla þó að skrifa hér fáein orð um það.

Kannski heyrið þið í fréttum að skotárásirnar og önnur ofbeldisverk séu runnin undan rifjum glæpagengja innflytjenda.

Það er að hálfu leyti rétt og að hálfu leyti ekki.

Og kannski ástæða til að taka sérstaklega fram að í baráttu glæpagengja kemur íslam eða íslamismi ekkert við sögu.

Þungamiðja átakanna nú eru, sýnist mér af fréttum í dönskum fjölmiðlum, samtökin LTF.

Það er gengi glæpamanna sem stofnað var 2013 úr ýmsum litlum götustrákahópum, og er nú að reyna að gera sig gildandi í skipulagðri glæpastarfi í Nörrebro og ýmsum hverfum austur af Kaupmannahöfn.

Í samtökunum LTF er meirihluti félaga innflytjendur eða af ættum innflytjenda, og frá ýmsum heimshlutum, en stór minnihluti eru þó réttir og sléttir Danir.

LTF er skammstöfun fyrir Loyal To Familia, en það heiti valdi hópurinn sér og lýsir því vel hvers konar grúppa er á ferð.

Þetta er sem sagt ósköp einfaldlega mafía þar sem tryggð við hópinn - „fjölskylduna“ - gengur fyrir öllu.

Shuaib Khan er foringi hópsins. Hann er um þrítugt og sat í fangelsi í sex ár fyrir morðtilræði en hefur nú verið hnepptur í gæsluvarðhald að nýju. Faðir hans var á sínum tíma í borgarstjórn Kaupmannahafnar og hefur harmað að hafa vanrækt son sinn svo á æskuárum að hann leiddist út á glæpabrautina.

Til að kynnast því sem er að gerast á Nörrebro er áreiðanlega vænlegra að lesa um ítölsku mafíuna og framferði hennar í Bandaríkjunum heldur en hella sér í íslömsk fræði.

Eða horfa á myndina Gangs of New York eftir Martin Scorsese þar sem ofbeldisfullir innflytjendur af írskum ættum berjast um völdin af þvílíkum ofsa að átökin á Nörrebro munu vonandi aldrei ná því stigi.

Nú, eða bara rifja upp ofbeldisfulla baráttu glæpagengjanna Hells Angels og Bandidos um glæpamarkaðinn í Danmörku.