Vilja fá að sækja tugi gæludýra til Grindavíkur

Ein kisa. Er úti, mann­blendin og gæf. Hún er ólar­laus.

Kisan Max. Örmerktur en búinn að týna ólinni sinni.

Kisan Ronja. Það er opinn gluggi og hún var farin út þegar hús­ráð­andi fór.

Guð­brandur. Hann er þrí­fættur.

Irmilín slapp frá mér og varð því miður eftir.

Tveir páfa­gaukar.

Fjórar hænur í bak­garð­inum.

Tvær kisur sem hlupu út.

Sófus og Svala. Þengill og Þula. Bati og Birta. Skvísa og Simbi. Og Yasmin, Tony, Kyndill og allar hinar kis­urnar. Í tuga­tali urðu þær eftir í Grinda­vík er rýma þurfti bæinn í skyndi í gær­kvöldi og nótt. „Margir reyndu að taka kett­ina en gátu það ekki,“ segir Sandra Ósk Jóhanns­dóttir, sjálf­boða­liði hjá Dýrfinnu, um gríð­ar­leg við­brögð við færslu sem sam­tökin, í sam­vinnu við fjöl­mörg önnur dýra­vernd­ar­sam­tök, birtu á Facebook síð­degis í dag. „Margir voru að leita úti að kött­unum sínum í nótt áður en þeir urðu að fara. En á end­anum fundu þeir þá ekki og þurftu að rýma. Þetta er mjög erfitt fyrir eig­endur gælu­dýra í Grinda­vík,“ segir hún. „Neyðin er mikil og okkur ber skylda til að hjálpa dýr­unum og fólk­inu sem á þau.“

Fleiri dýr en kettir eru nú í Grinda­vík, ein og yfir­gefin og án umönn­unar þar sem öllum mönnum er bannað að fara inn á svæðið vegna hættu sem stafar af jarð­skjálftum og mögu­legu eld­gosi.

Samtökin sem hafa tekið sig saman og búið til skrán­ingu gælu­dýra sem urðu eftir í Grinda­vík, m.a. Dýrfinna, Kattholt og Villi­kettir, eru til­búin með hóp fólks sem hefur mikla þekk­ingu og reynslu af því að fanga dýr. „Við erum að reyna að fá leyfi, um leið og það er ger­legt, til að senda þennan reynda leit­ar­hóp inn á svæðið,“ segir Sandra við Heim­ild­ina. Hópurinn er til­bú­inn, hvenær sem er sól­ar­hrings­ins, að ganga í verkið – að bjarga dýrum bæj­ar­ins.

„Við yrðum þakk­lát ef hún yrði sótt,“ skrifar kona á Facebook-síð­una Gæludýr í Grinda­vík, þar sem hún segir kis­una sína hafa orðið eftir. Ef ekki verði hægt að sækja hana þurfi að gefa henni mat.

Sögur sem þessar flæða um Facebook-síð­una. Fólk til­kynnir um hesta, bréf­dúfur og fiska. Dýr sem flest hafa mat og drykk í augna­blik­inu en verður að sinna um leið og færi gefst. Helst sækja.

„Úff, við eig­in­lega bjugg­umst ekki við svona miklum við­brögðum,“ segir Sandra Ósk. „Það er mjög átak­an­legt að sjá hvað það eru mörg dýr sem eru föst þarna í Grinda­vík og sum lokuð inni.“

Sandra segir sam­tökin hafa verið í sam­bandi við björg­un­ar­sveit­ina, Neyð­ar­lín­una og Rauða kross­inn og látið vita að þau séu til­búin með reyndan leit­ar­hóp. „Það er vilji hjá þessum aðilum til að hjálpa en við vitum að það er núna fyrst og fremst verið að huga að öryggi fólks. Við skiljum það. En við viljum samt sem áður að það sé alveg skýrt að við erum klár til að fara inn á svæðið og hjálpa.“

Þurfum að standa saman

Hún ítrekar mik­il­vægi þess að fólk sem hefur reynslu af því að fanga dýr verði fengið í þetta verk­efni. Fólk sem hefur búnað til þess og kann til verka. Það skipti máli hvernig ókunn­ugir nálg­ast dýr, t.d. ketti. Sé það ekki gert með réttum aðferðum geti það gert illt verra.

„Við þurfum að standa saman í þessu verk­efni,“ segir Sandra. „Við verðum að aðstoða gælu­dýra­eig­endur að fá dýrin sín. Það er bara þannig.“

Í nýju mati vís­inda­manna og almanna­varna kemur fram að kvika hafi verið á aðeins 800 metra dýpi í morgun, að hún fær­ist nær yfir­borð­inu og að eld­gos geti haf­ist án fyr­ir­vara. Því hafa allir við­bragðs­að­ilar verið kall­aðir frá Grinda­vík.