Hvert nýtt ráðuneyti kostar í kringum 190 milljónir króna á ári

Heilt yfir er áætlað að kostn­aður, vegna stofn­unar nýs ráðu­neytis sé í kringum 190 millj­ónir króna á árs­grund­velli. Núver­andi rík­is­stjórn hefur ákveðið að fjölga ráðu­neytum úr tíu í tólf. Í þings­á­lykt­un­ar­til­lögu sem Katrín Jak­obs­dóttir for­sæt­is­ráð­herra hefur lagt fram um breytta skipan ráðu­neyta innan stjórn­ar­ráðs­ins, og var birt á vef Alþingis síð­degis í dag, kemur þó fram að kostn­aður við þá við­bót verði „minni en tvö­faldur sá kostn­aður enda fjölgar ráð­herrum aðeins um einn og tak­markast fjölgun stöðu­gilda aðstoð­ar­manna ráð­herra, rit­ara og bíl­stjóra af því.“

Þar segir enn fremur að gert sé ráð fyrir að end­an­legt mat á kostn­aði vegna skipu­lags­breyt­ing­anna komi fram við til­lögu­gerð við aðra og eftir atvikum þriðju umræðu á Alþingi um frum­varp til fjár­laga fyrir árið 2022.

[adspot]Kostn­að­ur­inn sem fellur til er að uppi­stöðu vegna launa­kostn­aðar, rekstr­ar­kostn­aðar og kostn­aðar við hús­næði. Að frá­töldum ráð­herra og tveimur aðstoð­ar­mönnum megi gera ráð fyrir að að minnsta kosti sex ný stöðu­gildi verði til við stofnun nýs ráðu­neytis, þar með talin ný staða ráðu­neyt­is­stjóra.

Þegar end­ur­nýjað sam­starf Vinstri grænna, Fram­sókn­ar­flokks og Sjálf­stæð­is­flokks var kynnt greindu for­menn flokk­anna frá því að þeir ætl­uðu að fjölga ráð­herrum í tólf. Þeir hafa aldrei verið fleiri hér­lendis.

Auk þess voru mála­flokkar færðir til og kynnt að heiti ráðu­neyta myndu breyt­ast. Í stað atvinnu­vega- og nýsköp­un­ar­ráðu­neytis, félags­mála­ráðu­neytis, mennta- og menn­ing­ar­mála­ráðu­neytis, sam­göngu- og sveit­ar­stjórn­ar­ráðu­neytis og umhverfis- og auð­linda­ráðu­neytis koma félags- og vinnu­mark­aðs­ráðu­neyti, háskóla-, iðn­aðar- og nýsköp­un­ar­ráðu­neyti, inn­við­a­ráðu­neyti, mat­væla­ráðu­neyti, menn­ingar- og við­skipta­ráðu­neyti, mennta- og barna­mála­ráðu­neyti og umhverfis-, orku- og lofts­lags­ráðu­neyti.