Mikill auður liggur í eldra starfsfólki, að mati Viðar Eggertssonar varaþingmanns Samfylkingarinnar. Hann vill að kennitölukerfið á Íslandi verði endurskoðað svo reynslumiklu fólki sé ekki sópað burt af vinnumarkaðinum.
Þetta kom fram í ræðu varaþingmannsins undir liðnum störf þingsins á Alþingi áður en páskafrí hófst fyrir helgi.
Hann hóf ræðu sína á að segja að aldursfordómar byggðu á neikvæðum viðhorfum og gildum sambærilegum og kynþáttafordómar og kynjafordómar. Vegna aldursfordóma væru reynsla, þekking og vitsmunir hinna eldri ekki metin í starfsumsóknum vegna aldurs.
Starfsumsóknir fólks yfir fimmtugt hunsaðar
Viðar sagði að þetta viðhorf væri í sókn. „Um 1.800 manns sem komin eru yfir fimmtugt eru í atvinnuleit á skrá Vinnumálastofnunar og mörg þeirra hafa verið það í ár eða lengur. Það eru mýmörg dæmi um að starfsumsóknir fólks sem er orðið fimmtugt eða eldra, séu hunsaðar um leið og kennitalan ein birtist á fyrstu síðu umsóknar um starf. Það er ekki einu sinni litið á starfsferilskrána, bara kennitöluna – bara kennitöluna. Kennitalan er einfaldlega ekki rétt.
Eigum við að tala um íslensku kennitöluna? Það er varla hægt að sanna tilveru sína við afgreiðslu í opinberum stofnunum nema segja stundarhátt hver er kennitalan þín er; hvað þú ert gamall. Nafn þitt skiptir engu. Það eru til margar aðferðir við að búa til kennitölur. Sú aðferð sem hefur verið notuð á Íslandi byggir á fæðingardegi og fæðingarári viðkomandi. Það er bara ekkert náttúrulögmál að kennitölukerfið sé byggt upp eins og íslenska kennitöluaðferðin, sem hefur beinlínis stuðlað að og eflt aldursfordóma, sérstaklega á vinnumarkaði,“ sagði hann.
Spurði Viðar hvort ekki væri kominn tími til að horfast í augu við þetta. „Er ekki kominn tími til að við búum til nýtt kennitölukerfi sem styður ekki við aldursfordóma? Það liggur mikill auður í eldra starfsfólki. Látum ekki tíu talna röð verða til þess að hæfu og reynslumiklu fólki sé sópað burt af vinnumarkaðinum. Vinnum gegn aldursfordómum, endurskoðum kennitölukerfið,“ sagði hann að lokum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.











































Í gamla daga var "starfsferilsskrá" óþekkt í málinu. Mannaráðningar gengu þó vel fyrir því.