Almannavarnadeild Ríkislögreglustjóra hefur lýst yfir óvissustigi vegna vísbendinga um aukna virkni í Öræfajökli. Þetta kemur fram í tilkynningu frá almannavörnum.
Ákvörðunin var tekin í samráði við lögreglustjórann á Suðurlandi sem verður með vakt á þjóðveginum við Kvíá í nótt, að því er segir í tilkynningu frá Ríkislögreglustjóra.
Í tilkynningunni segir þó, að ekkert bendi ennþá til þess að eldgos sé að hefjast.
Tilkynningin frá almannavörnum er eftirfarandi:
„Vegna vísbendinga um aukna virkni í Öræfajökli hefur ríkislögreglustjóri, í samráði við lögreglustjórann á Suðurlandi, lýst yfir óvissustigi almannavarna. Jarðskjálftavirkni hefur farið stigvaxandi í Öræfajökli síðasta árið og tilkynningar um jarðhitalykt bárust í gær. Nú undir kvöldið var staðfest að breytingar á yfirborði Öræfajökuls hafa orðið.
Engin merki eru um gosóra eða yfirvofandi eldgos.
Landhelgisgæslan mun fljúga með vísindamenn til að kanna aðstæður og taka sýni í fyrramálið.
Lögreglan á Suðurlandi verður með vakt á þjóðveginum við Kvíá í nótt en sú ráðstöfun verður endurskoðuð eftir flug vísindamanna um svæðið.
Veðurstofan hefur aukið vöktun á svæðinu og fylgist vel með í samráði við jarðvísindamenn Háskóla Íslands og Almannavarnadeild Ríkislögreglustjóra.
Frekari mælingar verða gerðar í og við jökulinn á næstu dögum sem gefa vonandi betri mynd af atburðarrásinni sem er í gangi.
Óvissustig almannavarna er lýst yfir þegar grunur vaknar um að eitthvað sé að gerast af náttúru- eða mannavöldum sem á síðari stigum gæti leitt til þess að heilsu og öryggi fólks, umhverfis eða byggðar sé ógnað
Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir