Rektor Háskólans: Getur ekki tjáð sig um málefni einstakra starfsmanna

Jón Atli Bene­dikts­son, rektor Háskóla Íslands, seg­ist ekki geta tjáð sig efn­is­lega um ásak­anir Sigrúnar Helgu Lund, pró­fess­ors í líf­töl­fræði við Mið­stöð í lýð­heilsu­vís­indum við Háskóla Íslands, sem sagði upp starfi sínu vegna dræmra við­bragða stjórn­enda skól­ans við kvört­unum hennar vegna erf­iðra sam­skipta og kyn­ferð­is­legs hátta­lags af völdum yfir­manns hennar í starfs­manna­við­tali.

[links]Sigrún greindi frá mál­inu í stöðu­upp­færslu á Facebook í morgun. Yfir­mað­ur­inn, Sigurður Yngi Krist­ins­son, pró­fessor við Lækna­deild Háskóla Íslands, hafn­aði ásök­unum hennar í yfir­lýs­ingu fyrr í dag.

Jón Atli segir í yfir­lýs­inu sinni að Háskóli Íslands leggi ríka áherslu á að til staðar séu úrræði fyrir starfs­menn og nem­endur sem telja á sér brotið.

„Háskól­inn starf­rækir m.a. sér­staka siða­nefnd, fagráð um við­brögð við kyn­bund­inni og kyn­ferð­is­legri áreitni og kyn­bundnu og kyn­ferð­is­legu ofbeldi, og við­bragð­steymi vegna ein­eltis og ann­ars ofbeldis.

[adspot]Fram hefur komið í fjöl­miðlum að til­tek­inn starfs­maður hafi lagt fram kæru vegna fram­komu ann­ars starfs­manns til siða­nefndar Háskóla Íslands en nið­ur­staða nefnd­ar­innar lá fyrir í júlí 2018. Samkvæmt starfs­reglum siða­nefndar Háskóla Íslands eru skrif­legar nið­ur­stöður siða­nefndar afhentar máls­að­ilum og sendar rektor til vit­undar og varð­veislu. Í kjöl­far hverrar nið­ur­stöðu siða­nefndar metur rektor hvort til­efni sé til frek­ari aðgerða af hálfu Háskól­ans.

Rektor getur ekki tjáð sig efn­is­lega um mál­efni ein­stakra starfs­manna eða ákvarð­anir siða­nefndar, sem eru trún­að­ar­mál. Rétt er að taka fram að Háskóli Íslands hefur, á und­an­förnum miss­erum, lagt áherslu á að bæta enn frekar ferla og úrræði til að bregð­ast við kvört­unum og til­kynn­ingum um ofbeldi og áreitni af hvaða tagi sem er, enda verður slíkt aldrei liðið innan Háskóla Íslands.“