Kínversk stjórnvöld hafa ákveðið að leyfa pörum að eignast tvö börn. Síðan á áttunda áratugnum hefur kínverskum pörum aðeins verið leyft að eignast eitt barn, til að koma í veg fyrir stjórnlausa fólksfjölgun í landinu.
Þetta var ákveðið á þingi Kommúnistaflokksins sem öllu ræður í Kína. Síðast voru barneignareglur í Kína endurskoðaðar árið 2013 þegar ákveðið var að leyfa fólki að eignast meira en eitt barn ef pörin uppfylltu ákveðin skilyrði. Barneignareglurnar eru nú taldar takmarka fjölda fólks á atvinnumarkaði.
Árið 2012 lækkaði meðalaldur vinnuaflsins í Kína í fyrsta sinn í marga áratugi. Þessi fjölmennasta þjóð í heimi gæti orðið fyrsta þjóðin í sögunni sem verður of gömul áður en hún getur orðið rík. Ákvörðun flokksstjórnarinnar nú var tekin á fundi sem fjallaði um efnahagslegar umbætur og áætlun kínverskra stjórnvalda næstu fimm árin.
Wang Feng, sérfræðingur í mannfjöldafræði og félagslegum umbótum í Kína, lætur hafa efitr sér á vef Reuters að um sögulegan viðburð sé að ræða. „Þetta er áfangi sem við höfum beðið eftir lengi, áfangi sem við höfum beðið of lengi eftir,“ sagði Feng.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir