Munur á afstöðu til umræðu um #Metoo eftir því hvaða stjórnmálaflokk fólk styður

Hlutfall þeirra sem lands­manna sem telja að umræða um #Metoo-hreyf­ing­una sé jákvæð fyrir íslenskt sam­fé­lag hefur dreg­ist umtals­vert saman frá árinu 2018, þegar fyrsta bylgja hennar reið yfir landið. Þá sögð­ust 70,5 pró­sent aðspurðra telja hana jákvæða en í nýrri könnun Maskínu, sem fram­kvæmd var núna í jan­úar, mæld­ist það hlut­fall 60,4 pró­sent. Mest fjölgar í hópi þeirra sem hafa ekki afger­andi skoðun á umræð­unni en þeim sem telja hana nei­kvæða fjölgar úr 12,9 í 15,5 pró­sent.

Nokkuð afger­andi munur er á afstöðu eftir því hvaða stjórn­mála­flokk aðspurðir í könn­un­inni myndu kjósa ef kosið yrði í dag. Kjós­endur Mið­flokks­ins eru nei­kvæð­astir í garð umræð­unnar um #Metoo-hreyf­ing­una og ein­ungis 19,5 pró­sent þeirra telja hana jákvæða fyrir íslenskt sam­fé­lag. Kjós­endur Sjálf­stæð­is­flokks og Flokks fólks­ins skera sig einnig úr en rúm­lega 38 pró­sent þeirra telja umræðu um #Metoo-hreyf­ing­una jákvæða.

[adspot]Flestir vænt­an­legir kjós­endur Pírata (86,4 pró­sent) og Sam­fylk­ing­ar­innar (83,2 pró­sent) telja umræð­una jákvæða og kjós­endur Vinstri grænna (77,6 pró­sent), Sós­í­alista­flokks Íslands (72,5 pró­sent) og Við­reisnar (72,5 pró­sent) eru ekki langt undan. Kjós­endur Fram­sókn­ar­flokks­ins eru svo sér á báti á miðju vegar, en 54,8 pró­sent þeirra telja að umræðan um #Metoo-hreyf­ing­una sé jákvæð fyrir íslenskt sam­fé­lag.

Menntun virð­ist líka skipta umtals­verðu máli sem breyta þegar við­horf til #Metoo-hreyf­ing­ar­innar er skoðað. Þannig segj­ast 74,1 pró­sent allra svar­enda sem eru með háskóla­gráðu að þeir telji umræðu um hana jákvæða fyrir íslenskt sam­fé­lag en ein­ungis 48,3 pró­sent þeirra sem eru með grunn­skóla­próf sem æðstu menntun. Á meðal þeirra sem hafa lokið fram­halds­skóla­prófi eða iðn­menntun mælist jákvæðnin í garð #Metoo-umræð­unnar 57,4 pró­sent.

Nokkuð afger­andi munur er á afstöðu kynj­anna til máls­ins, en 54,3 pró­sent karla segj­ast telja umræð­una jákvæða fyrir íslenskt sam­fé­lag á meðan að 66,9 pró­sent kvenna eru á þeirri skoðun.

Munurinn á afstöðu kyn­slóða er einnig nokkuð skýr, sam­kvæmt nið­ur­stöðu könn­unar Maskínu. Þannig telja 71,9 pró­sent aðspurðra í ald­urs­hópnum 18 til 29 ára að umræðan um #Metoo-hreyf­ing­una sé jákvæð fyrir íslenskt sam­fé­lag en 51 pró­sent þeirra sem eru 60 ára og eldri.

Könnunin fór fram dag­ana 14. til 19. jan­úar 2022 og voru svar­endur 815 tals­ins.