Lilja skipar Eygló Harðardóttur sem nýjan stjórnarformann LÍN

Eygló Harð­ar­dóttir, fyrr­ver­andi þing­maður Fram­sókn­ar­flokks­ins og félags- og hús­næð­is­mála­ráð­herra 2013-2016, hefur verið skipuð stjórn­ar­for­maður Lána­sjóðs íslenskra náms­manna (LÍN) af Lilju Alfreðs­dóttur, mennta- og menn­ing­ar­mála­ráð­herra. Teitur Björn Ein­ars­son, fyrr­ver­andi þing­maður Sjálf­stæð­is­flokks­ins, er einnig á meðal þeirra sem skip­aðir voru nýir í stjórn­ina. Hann er til­nefndur af Bjarna Bene­dikts­syni, fjár­mála- og efna­hags­ráð­herra. Teitur var aðstoð­ar­maður Bjarna áður en hann var kjör­inn á þing haustið 2016. Hann féll svo af þingi í kosn­ing­unum sem fram fóru ári síðar.

Auk þeirra voru Lárus Sigurður Lárusson lög­maður Sigrún Elsa Smára­dóttir, fyrr­ver­andi borg­ar­full­trúi Sam­fylk­ing­ar­innar, skipuð ný í stjórn LÍN. Fyrir í stjórn­inni eru Ragnar Auðun Árnason, Jóhann Gunnar Þór­ar­ins­son, Rebekka Rún Jóhann­es­dóttir og Hildur Björg­vins­dóttir.

Lilja segir að eitt af áherslu­málum hennar sem mennta- og menn­ing­ar­mála­ráð­herra verði að bæta kjör náms­manna og að ráð­ast í end­ur­skoðun á náms­lána­kerf­inu. „Ég vil að sú vinna fari fram í sam­starfi við náms­manna­hreyf­ing­arnar þar sem lögð verður áhersla á jafn­rétti til náms, skil­virkni og náms­styrkja­kerfi að nor­rænni fyr­ir­mynd.“

Hlutverk stjórnar sjóðs­ins er meðal ann­ars að veita náms­lán, inn­heimta náms­lán, ann­ast gagna­söfnun varð­andi þörf náms­manna á náms­lánum, og ann­ast fjár­mál sjóðs­ins og gerð fjár­hags­á­ætl­ana. Stjórnin setur úthlut­un­ar­reglur sem eru lagðar fram til kynn­ingar og stað­festar af ráð­herra eigi síðar en 1. apríl ár hvert.