AGS hættir viðræðum við Grikki og sendinefndin farin frá Brussel

Samn­inga­nefnd Alþjóða­gjald­eyr­is­sjóðs­ins við Grikki hefur verið send heim til Washington frá Brussel. Þetta er gert vegna þess að engar fram­farir hafa orðið í við­ræðum AGS og Evr­ópu­sam­bands­ins við Grikki und­an­farið, en við­ræð­urnar snúa að skil­yrðum sem Grikkir þurfa að upp­fylla til að fá áfram­hald­andi neyð­ar­lán frá AGS og ESB.

Tals­maður Alþjóða­gjald­eyr­is­sjóðs­ins greindi frá þessu fyrir skömmu og Bloomberg greinir frá. „Boltinn er mjög mikið hjá Grikkjum núna,“ sagði Gerry Rice við blaða­menn í Washington í dag. „Það er mik­ill ágrein­ingur á milli aðil­anna á flestum lyk­ilsviðum. Það hafa engar fram­farir orðið í því að minnka þennan ágrein­ing und­an­farið.“ Christine Lagarde, fram­kvæmda­stjóri AGS, mun funda með fjár­mála­ráð­herrum evru­svæð­is­ins í Lúx­em­borg þann 18. júní.

Grísk stjórn­völd hafa legið undir sífellt meiri gagn­rýni frá lán­ar­drottn­unum und­an­farið og þykir brott­för samn­inga­nefndar AGS benda enn frekar til þess að lán­ar­drottn­arnir séu að missa þol­in­mæði sína gagn­vart Grikkjum.

#IMF has major differences with #Greece...and European stocks do this.... pic.twitter.com/NYzHD4cKRU

— Mark Barton (@markbartontv) June 11, 2015

Fyrr í dag hafði þó gætt bjart­sýni um að sam­komu­lag væri að nálg­ast. Alexis Tsipras, for­sæt­is­ráð­herra Grikk­lands, fund­aði með for­seta fram­kvæmda­stjórnar ESB, Jean-Claude Juncker, eftir hádegið. Í gær fund­aði hann með Angelu Merkel, kansl­ara Þýska­lands, og Francois Hollande, for­seta Frakk­lands. Þau sögð­ust sam­mála um að nú yrði að koma auk­inn þungi í við­ræð­urnar, enda aðeins tutt­ugu dagar þangað til núver­andi sam­komu­lag Grikkja við lán­ar­drottna sína rennur út.

Donald Tusk, for­seti leið­toga­ráðs ESB, tjáði sig svo um við­ræð­urnar á blaða­manna­fundi í dag. Þar sagði hann að það væri nauð­syn­legt fyrir Evrópu að sam­komu­lag náist strax. „Það er aug­ljóst að við þurfum ákvarð­anir, ekki samn­inga­við­ræður. Grísk stjórn­völd þurfa að vera raun­særri. Það er ekki lengur tími til að halda áfram þessu fjár­hættu­spili. Dagurinn nálg­ast, ótt­ast ég, þegar ein­hver segir að leik­ur­inn sé búinn.“ Þetta þykja sterk skila­boð frá Tusk og óvenju­legt að hann tjái sig með þessum hætti. Hann sagði jafn­framt að fundur fjár­mála­ráð­herr­anna þann 18. júní verði algjör lyk­ilfundur. Á honum ætti að taka ákvarð­arnir um fram­haldið.