Eiginlegt upphaf samtakanna sem kenna sig við íslamskt ríki má rekja til Bucca-fangabúðanna sem Bandaríkjamenn ráku í Írak eftir innrásina 2003. Þar voru andspyrnumenn úr öllum áttum lokaðir inni á bak við girðingar en fengu nánast óheftan aðgang að hver öðrum. Þeirra á meðal var maðurinn sem í dag gengur undir nafninu Abu Bakar al Baghdadi, en hann var á þeim tíma óþekktur klerkur.

Lykillinn að árangri hans var að sameina þær tvær ólíku fylkingar sem höfðu myndast í fangabúðunum. Annars vegar var um að ræða hóp sem hafði verið hluti af stjórnarher Saddams Hussein og kunni skil á hernaði, skipulagi og síðast en ekki síst gat brúkað skriðdreka og önnur flókin stríðstól. Þeir voru þarna í haldi vegna þess að Bandaríkjastjórn ákvað að leysa upp allan íraska herinn eftir innrásina og gera fyrrum hershöfðingja að óvinum sínum, með þeim afleiðingum að þeir gengu til liðs við andspyrnuhreyfingar í stórum …