Þingmenn stjórnarandstöðunnar á Alþingi eru ósáttir við að Sigríður Andersen, dómsmálaráðherra, skuli ekki vera viðstödd umræður um fjármálaáætlun ríkisstjórnarinnar. Mun það vera annað árið í röð sem það gerist. Þingflokksformenn Samfylkingarinnar og Viðreisnar segja um virðingarleysi að ræða.
Umræður um fjármálaáætlun 2019-2023 standa nú yfir en þær hófust í gær. Í dag gera fagráðherra grein fyrir sínum málaflokkum og taka þátt í umræðum um þá. Dómsmálaráðherra er síðastur í röð fagráðherranna í umræðunum samkvæmt tilhögun þingfundarins.
Sigríður Andersen mun hins vegar stödd erlendis og verður því ekki til taks í kvöld þegar gera má ráð fyrir að umræður um hennar málaflokk hefjist. Í hennar stað mun Bjarni Benediktsson, fjármála- og efnahagsráðherra, svara fyrir dómsmálaráðuneytið. Ásmundur Einar Daðason, félags- og jafnréttismálaráðherra, fór af landi brott í dag og stóð til að Sigurður Ingi Jóhannsson, samgöngu- og sveitarstjórnarráðherra, myndi koma í hans stað í umræðunum. Því mótmæltu þingflokksformenn stjórnarandstöðunnar og varð úr að umræða um málaflokk Ásmundar fór fram í gærkvöldi, að honum viðstöddum.
Tímasóun að eiga orðastað við staðgengla
„Við töluðum algerlega skýrt um að það að fagráðherrar mæti ekki í umræðu um fimm ára fjármálaáætlun ríkisstjórnarinnar er algjörlega óásættanlegt,“ segir Oddný Harðardóttir, þingflokksformaður Samfylkingarinnar en þingflokksformenn stjórnarandstöðunnar funduðu með forseta Alþingis í gær vegna stöðunnar. Hanna Katrín Friðriksson, þingflokksformaður Viðreisnar, segir
að þingmenn séu óánægðir með að ráðherrann verði ekkiviðlátinn. Ekki hefði átt að vera erfitt að skipuleggja tíma ráðherrans til að koma í veg fyrir það því lög kveði á um að þingslályktunartillaga um fimm ára fjármálaáætlun sé lögð fram fyrir 1. apríl. Þrátt fyrir að töf hafi orðið á framlagningu tillögunnar nú hefði tímasetningin legið fyrir í meginatriðum. „Reynsla mín frá því í fyrra er sú að það sé tímasóun ef það eru staðgenglar fyrir ráðherra í umræðunum um fjármálaáætlun,“ segir Hanna Katrín og kallar fjarveru ráðherra virðingarleysi. Hið sama segir Oddný Harðardóttir.
„Næst verður þetta að vera betra“
Sem fyrr segir mun Sigríður Andersen ekki heldur hafa verið viðstödd umræðurnar á síðasta ári. Silja Dögg Gunnarsdóttir, þingkona Framsóknarflokksins, gagnrýndi fjárveru hennar þá í umræðunum. „Ég verð að gagnrýna þetta vegna þess að við erum að vinna samkvæmt nýju verklagi, nýrri aðferðafræði um opinber fjármál. Það verklag gerir þá kröfu á okkur öll að við vinnum saman, að allir ráðherrar taki þátt í umræðunni og að allar nefndir vinni sína vinnu út frá þessu. Mér finnst það bara alls ekki ganga að vera svo ekki viðstödd þegar umræðan á sér stað í þingsal. Á sama tíma erum við að gera þetta í fyrsta sinn og ég vil leyfa fólki að njóta vafans, en næst verður þetta að vera betra,“ sagði Silja Dögg á Alþingi fyrir ári síðan.
Athugasemdir