Ólöf Nordal heitin, fyrrverandi innanríkisráðherra, afgreiddi umsókn Roberts Downey um uppreist æru. Bréfið sem sent var til staðfestingar forseta Íslands var undirritað af Ólöfu og Ragnhildi Hjaltadóttur ráðuneytisstjóra innanríkisráðuneytisins.

Áður var talið að Bjarni Benediktsson forsætisráðherra hefði skrifað undir bréfið en í samtali við RÚV sagðist hann hafa tekið við málinu þegar hann starfaði sem dómsmálaráðherra í fjarveru Ólafar Nordal. Þá sagði hann: „Nei, ég tók við niðurstöðu úr ráðuneytinu sem hafði fengið sína hefðbundnu meðferð.“

Í gær leiðrétti Bjarni loks þann skilning í færslu á Facebook. Þar segi Bjarni meðal annars: „Staðreynd málsins er sú að ég gegndi ekki embætti fyrir innanríkisráðherra þegar þessi mál voru til lykta leidd í ráðuneytinu. Ekki heldur þegar þau fóru fyrir ríkisstjórn eða voru lögð fyrir forseta Íslands til staðfestingar. Það sætir því furðu að kallað sé eftir því að ég svari fyrir þá ákvörðun. Enn undarlegra er að sjá skrif um að ég forðist umræðu um málið.“

Tilagan sem send var til forseta ÍslandsUndir bréfið skrifa Ólöf Nordal og Ragnhildur Hjaltadóttir ráðuneytisstjóri.

Mynd: Notandi

Leiðrétti ekki misskilninginn í sex vikur

Þann 16. júní tók RÚV viðtalið við Bjarna þar sem hann gaf til kynna að hafa átt aðkomu á málinu, með því að hafa tekið við því. Bergur Þór Ingólfsson, faðir Nínu Rúnar Bergsdóttur, einnar stúlkunnar sem Robert Downey braut á, segist vera orðinn svolítið ringlaður á þessu máli.

„Við erum auðvitað ánægð með að forsætisráðherra geri sér loksins það ómak að svara okkur og fjölmiðlum en erum á sama tíma frekar ringluð. Þann 16. júní sagði hann í viðtali við RÚV að hann hafi tekið við niðurstöðu í ráðuneytinu sem hafi fengið sína hefðbundnu meðferð og hallist frekar að því að í þessu tilfelli sem öðrum eigi fólk að fá annað tækifæri í lífinu. Nú segir hann að hann hafi ekki gegnt embætti innanríkisráðherra þegar þessi mál voru til lykta leidd né þegar þau fóru fyrir ríkisstjórn og finnist hugtakið uppreist æru koma spánskt fyrir sjónir svo mikilvægt sé að hraða breytingum á reglugerðinni. Við erum eiginlega alveg jafn mikið í lausu lofti sem áður.“

Þá reyndi dóttir Bergs, Nína Rún Bergsdóttir, ítrekað að fá svör frá Bjarna við spurningum sínum. Í tvígang taggaði hún í færslur á Facebook og vonaðist eftir svörum. Hann hefur ekki sýnt nein viðbrögð eftir að ég taggaði hann í tveimur facebook færslum. Ég var nú ekki að búast við því þar sem hann hefur nú þegar sýnt að hann snýr baki við öllu sem honum finnst óþægilegt, eins og kynferðisofbeldi,“ sagði hún í samtali við DV.

Auk þess að þegja þunnu hljóði um málið útilokaði Bjarni varaþingmann Pírata, Snæbjörn Brynjarsson, frá Twitter-reikningi sínum vegna málsins. Snæbjörn velti því fyir sér af hverju Bjarni hefði ekki verið spurður hvað lá að baki þessari ákvörðun og taggaði Bjarna í færsluna. Viðbrögð Bjarna voru að útiloka hann og banna hann frá síðu Bjarna á Twitter.

Í gær birtist síðan leiðari í Fréttablaðinu þar sem Magnús Guðmundsson sagði að málið virtist vera vandamál fyrir ríkisvaldið og Bjarna Benediktsson, „sem sat á ráðherrastóli og skrifaði upp á að Robert Downey, maðurinn sem braut svo gróflega gegn þessum stúlkum, fengi uppreist æru. Bjarni virðist ætla að hafa íslenska háttinn á og bíða af sér storminn og vona að raddirnar þagni.“

Leiðarinn varð til þess að Bjarni svaraði loks fyrir málið með Facebook-færslu. Í færslunni segist hann ekki hafa átt neina aðkomu að þeirri ákvörðun að veita Robert Downey uppreist æru.