Sjálfstæðisflokkurinn ætlar í leiðtogaprófkjör í borginni

Kosið verður um leið­toga lista Sjálf­stæð­is­manna fyrir borg­ar­stjórn­ar­kosn­ing­arnar í Reykja­vík að óbreyttu. Það er sama leið og flokk­ur­inn fór fyrir kosn­ing­arnar 2018 þegar Eyþór Arnalds var val­inn til að leiða lista flokks­ins. Þetta var ákveðið á fundi Varðar, full­trúa­ráðs sjálf­stæðis­fé­laga í Reykja­vík, í kvöld.

Full­trúa­ráð Sjálf­stæð­is­flokks­ins þarf að sam­þykkja leið­ina til að hún verði að veru­leika með 2/3 hluta atkvæða. Gangi það eftir verður kosið í kjör­nefnd til að fylla önnur sæti á list­anum.

Eyþór hefur gefið það út að hann stefni að end­ur­kjöri að óbreyttu og Hildur Björns­dóttir, sem var í öðru sæti á lista flokks­ins fyrir síð­ustu kosn­ingar, hefur þegar til­kynnt að hún skori hann á hólm. Enginn annar hefur sem stendur til­kynnt fram­boð í leið­toga­sætið.

[adspot]Ef sama aðferð verður notuð til að manna önnur sæti á list­anum og í fyrir síð­ustu kosn­ingar mun kjör­nefnd svo raða í önnur sæti að loknu leið­toga­kjöri og full­trúa­ráð Sjálf­stæð­is­flokks­ins síðan taka afstöðu til þeirrar til­lögu.

[links]Árið 2018 sótt­ust, ásamt Eyþóri þau Kjartan Magn­ús­son og Áslaug Frið­riks­dóttir, þáver­andi borg­ar­full­trúar, Vil­hjálmur Bjarna­son fyrr­ver­andi Alþing­is­maður og Viðar Guðjohn­sen leigu­sali eftir því að leiða list­ann.

Enginn þeirra sem lutu í lægra haldi fyrir Eyþóri fékk sæti á lista flokks­ins í kjöl­farið og eini sitj­andi borg­ar­full­trú­inn sem sat í efstu sæt­unum var Marta Guð­jóns­dóttir.

Sjálf­stæð­is­flokk­ur­inn fékk 30,8 pró­sent atkvæða í þeim kosn­ingum og átta borg­ar­full­trúa kjörna. Fyrir vikið varð hann stærsti flokk­ur­inn í borg­inni á ný. Það dugði þó ekki til þar sem Sam­fylk­ingin, Viðreisn, Píratar og Vinstri græn mynd­uðu meiri­hluta og Dagur B. Egg­erts­son hélt áfram sem borg­ar­stjóri.