Ríkisstjórn Íslands undirritaði á þriðjudag breytingar á reglugerðum sem gera erlendum ríkisborgurum frá ákveðnum löndum utan Evrópska efnahagssvæðisins (EES) mögulegt að dvelja á Íslandi í allt að sex mánuði og stunda vinnu sína hjá erlendum fyrirtækjum í fjarvinnu.
Um er að ræða breytingu á reglugerð um útlendinga frá árinu 2017. Nýja reglugerðin var birt í stjórnartíðindum í gær. Samkvæmt henni þurfa þeir útlendingar sem sækja um langtímavegabréfsáritun til að stunda hér fjarvinnu að vera með erlendar tekjur sem samsvara að minnsta kosti einni milljón króna á mánuði. Ef maki viðkomandi er með í för þá þarf hann að sýna fram á tekjur upp á að minnsta kosti 1,3 milljónir króna á mánuði.
[adspot]Undir reglugerðina skrifar Áslaug Arna Sigurbjörnsdóttir dómsmálaráðherra, sem fer með málefni útlendinga í ríkisstjórn. Hún lagði minnisblað um málið fyrir ríkisstjórn á þriðjudag ásamt Bjarna Benediktssyni, fjármála- og efnahagsráðherra, og Þórdísi Kolbrúnu Reykfjörð Gylfadóttur, ferðamála-, iðnaðar- og nýsköpunarráðherra.
Nýsköpunarumhverfinu vantar tengingar
Þórdís Kolbrún hefur haft frumkvæði að þessu verkefni og ráðuneyti hennar unnið að því í samvinnu við dómsmálaráðuneytið, fjármála- og efnahagsráðuneytið og Skattinn og fleiri að útfæra heimild fyrir einstaklinga sem eru í föstu ráðningarsambandi við erlend fyrirtæki að dvelja og starfa hér á landi í sex mánuði, en í kjölfar COVID-19 faraldursins hafa fjöldamörg fyrirtæki opnað á fjarvinnu. Fram til þessa hefur aðeins verið hægt að dvelja hér á landi í 90 daga við slíkar aðstæður.
[links]„Til að fá heimild fyrir lengri dvöl þarf viðkomandi að sýna fram á ráðningarsamband, tekjur og sjúkratryggingar. Áfram verður unnið að því að skoða framkvæmdina til að hægt verði að bjóða upp á dvöl til enn lengri tíma. Samstarf og samráð mun hefjast sem fyrst um það hvernig skattamál og dvalarheimildir yrðu útfærðar. Það mun kalla á víðtækt samstarf,“ sagði í tilkynningu um þessa aðgerð á vef stjórnarráðsins.
Þórdís Kolbrún sagði í tilkynningu um málið að til að byggja upp útflutningsgreinar byggðar á hugviti þyrfti að búa til umhverfi, suðupott fólks með hugmyndir og hæfni sem kynnist, lærir af hvert öðru, og býr til tækifæri framtíðarinnar. „Með því að opna nú fyrir og auðvelda starfsfólki að vinna frá Íslandi, bætum við þekkingu og tengingum inn í íslenska umhverfið.“
Ísland hefur, að sögn ráðherrans, sérstöðu hvað varðar landlegu auk þess sem landið tengir tímabelti austur og vestur Evrópu við austur- og mið Bandaríkin. „Við höfum upp á mikið að bjóða fyrir erlenda sérfræðinga og getum lært mikið af þeim. Einn helsti veikleiki íslenska nýsköpunarumhverfisins eru tengingar okkar við útlönd. Með því að hvetja fjarvinnufólk til að koma til Íslands erum við að minnka heiminn og búa til mikilvægar tengingar sem annars væri erfitt að koma á. Nú höfum við stigið þetta mikilvæga skref en ætlum að halda áfram vinnu við að stíga enn stærri skref svo við getum boðið upp á enn lengri dvöl íslensku samfélagi til hagsbóta.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Útlendingamál
Segir Múlaþing ekki vera að útiloka flóttafólk frá öðrum ríkjum en Úkraínu
Hlutverk RÚV ekki „að mála opinbera embættismenn upp sem einhverjar grýlur“
„Í alvörunni vinna engar gribbur hjá Útlendingastofnun“
Segja stjórnarmeirihlutann stilla öryrkjum upp á móti útlendingum
Leggja til að fjölskyldur sem ekki var hægt að senda úr landi fái dvalarleyfi
Athugasemdir