Arnþrúður Karlsdóttir, útvarpsstjóri hjá Útvarpi Sögu, fullyrti í útvarpsþætti sínum í morgun að hælisleitendurnir tveir sem dregnir voru með lögregluvaldi út úr Laugarneskirkju í fyrrinótt lægu undir grun um að vera í undirbúningi fyrir ISIS samtökin hér á landi. Hún segir framgöngu séra Kristínar Þórunnar Tómasdóttur „algjörlega til háborinnar skammar“ og vill að henni sé vikið úr starfi. Þá segir Arnþrúður að biskup Íslands, séra Agnes M. Sigurðardóttir, megi hafa skömm af því að leggja blessun sína við að veita hælisleitendunum skjól í kirkjunni og hvetur lögregluna til að kæra prestana og biskup fyrir að trufla störf lögreglunnar.
Gagnrýnir þátt fjölmiðla
Líkt og Stundin greindi frá í gær voru Ali Nasir og Majed, hælisleitendur frá Írak, dregnir út úr Laugarneskirkju með lögregluvaldi aðfararnótt þriðjudags og sendir til Noregs með flugvél. Þeir óttast að þaðan verði þeir sendir aftur til Íraks. Báðir hafa þeir dvalið á Íslandi í sjö mánuði en hælisumsóknir þeirra verða ekki teknar til efnislegrar meðferðar. Toshiki Toma, prestur innflytjenda, og Kristín Þórunn Tómasdóttir, sóknarprestur Laugarneskirkju, ákváðu að opna dyr kirkjunnar og veita hælisleitendunum skjól í von um að lögregla myndi virða forna siði um kirkjugrið. Hann var ekki virtur.
„Það leikur grunur á því að þessir aðilar, báðir tveir, séu í undirbúningi fyrir ISIS samtökin hér á Íslandi,“ sagði Arnþrúður orðrétt í morgun. Hún segir engan þora að standa upp og segja það, en að það sé ástæða fyrir því að Norðmenn vildu ekki hafa þessa menn í Noregi. „Þetta er það sem Vesturlönd hafa verið að óttast, að menn séu að fara inn í þjóðfélög undir fölskum formerkjum. Ég ætla ekkert að fullyrða að svo sé í þessu tilfelli, en það leikur grunur á því og bara það er nægjanlegt fyrir Norðmenn að segja nei, og bara það er nægjanlegt fyrir Íslendinga að segja nei,“ segir Arnþrúður.
„Það leikur grunur á því að þessir aðilar, báðir tveir, séu í undirbúningi fyrir ISIS samtökin hér á Íslandi.“
Þess ber að geta að mennirnir voru sendir úr landi á grundvelli Dyflinnarreglugerðarinnar, en ekki vegna gruns um tengsl við hryðjuverkasamtök. Þórhildur Hagalín, upplýsingafulltrúi hjá Útlendingastofnun, staðfestir það í samtali við Stundina og segir stofnunina aldrei hafa heyrt á það minnst að mennirnir eigi tengsl við hryðjuverkasamtök.
Vill að séra Kristín sé kærð og henni vikið úr starfi
Arnþrúður segir framgöngu séra Kristínar Þórunnar Tómasdóttur „algjörlega til háborinnar skammar“ og segir hana hafa með framferði sínu reynt að hindra starf lögreglunnar. „Svo segir hún að þetta hafi verið erfið stund og að hún láti engan ósnortinn. Hvers konar „show up“ var þetta? Að hún skuli ekki skammast sín að vera prestur. Það á að víkja henni. Það á að víkja henni. Svo fylgdi það fréttinni að biskup hefði lagt blessun sína yfir þetta og bara skömm sé biskups fyrir að gera svona,“ segir Arnþrúður.
„Að hún skuli ekki skammast sín að vera prestur. Það á að víkja henni.“
Þá gagnrýnir Arnþrúður einnig þátt fjölmiðla í málinu. Hún segir prestana hafa kallað á „einn helsta sorpmiðil landsins“ til að mynda, og á þá líklegast við Stundina, og gagnrýnir Stöð 2 og Ríkissjónvarpið fyrir að hafa sýnt úr myndbandi Stundarinnar í kvöldfréttum í gær.
Ekki náðist í Arnþrúði við vinnslu fréttarinnar.
Sjá einnig: Arnþrúður lék Indverja í beinni: „Curry curry curry“
Fulltrúi í mannréttindaráði skammar prestana
Fleiri hafa lýst yfir vanþóknun vegna ákvörðunar Kristínar Þórunnar Tómasdóttur, sóknarpresti í Laugarneskirkju, og Toshiki Toma, prests innflytjenda um að opna dyr kirkjunnar og veita hælisleitendum skjól. Þannig segir Sveinn Hjörtur Guðfinnsson, fulltrúi Framsóknarflokks í mannréttindaráði Reykjavíkurborgar, það til dæmis algjöra skömm prestanna að skipta sér af málum með þessum hætti.
Jón Magnússon, fyrrverandi þingmaður Frjálslynda flokksins og hæstaréttarlögmaður, furðar sig einnig á framgöngu Kristínar Þórunnar Tómasdóttur og Toshiki Toma. „Eiga afbrotamenn sem koma í kirkju að njóta friðhelgi þannig að armur laganna nái ekki til þeirra? Kirkjan sem stofnun verður að starfa í samræmi við lög og reglur. Fróðlegt væri að sjá hvað kirkjunnar fólk, já ég tala nú ekki um Biskupinn yfir Íslandi hafa um málið að segja,“ skrifar hann á Facebook síðu sína í dag. Þá veltir hann því fyrir sér hvort prestarnir hugsi nú stöðu sína í ljósi þess að félagsskapurinn Vantrú lýsir yfir sérstökum stuðningi við þá. „Gæti það verið að þessir prestar eigi trúfræðilega samleið með Vantrú?“ spyr hann. Í athugasemd við stöðufærslu Jóns er meðal annars spurt hvort morðingjar og nauðgarar geti líka fengið grið í þessari kirkju. „Þau Toshiki Toma og Kristín Tómasdóttir virðast telja það valkost,“ svarar Jón.
Flóttamenn
Hvað gerðist raunverulega í Ceuta?
ESB fundar með talibönum um endursendingu hælisleitenda
Verður brottvísað í næstu viku
Fá ekki að læra hér frekar en í Afganistan
Segir nýju útlendingalögin notuð í „skipulagða herferð“
Athugasemdir