Bráðnun íssins á norðurslóðum gæti orðið til þess að hvítabjörnum fækki hratt vegna hungurs upp úr árinu 2040. Vísindamenn hafa nú, í fyrsta skipti, spáð fyrir um hvenær hvítabirnir verða nánast horfnir. Ef fram heldur sem horfir gæti það orðið raunin um árið 2100 eða eftir um áttatíu ár.
Í nýrri rannsókn sem birt er í vísindatímaritinu Nature Climate Change kemur fram að með aukinni bráðnun íssins verði það hvítabjörnum stöðugt erfiðara að leita sér að æti. Þegar hungrið er komið inn í myndina er líklegt að hægja muni á tímgun dýranna og þeim fer að fækka af þeim sökum. Að mati vísindamannanna mun þessi staða verða komin upp hjá mörgum ísbjörnum eftir um tvo áratugi. Þá munu stofnar bjarnanna á ákveðnum svæðum deyja út.
Í rannsókninni, sem leidd var af kanadískum vísindamanni við háskóla í Toronto, var kannað hvaða áhrif tvær sviðsmyndir hefðu á afkomu hvítabjarna. Í annarri var reiknað með sömu losun gróðurhúsalofttegunda eins og hefur átt sér stað síðustu ár. Við þær aðstæður telja þeir líklegt að um næstu aldamót verði hvítabirni aðeins að finna á nyrstu eyju kanadíska heimskautaklasans, Eyju Elísabetar drottningar. Í hinni sviðsmyndinni var gert ráð fyrir að dregið yrði lítillega úr losuninni en við þær aðstæður er engu að síður líklegt að því er fram kemur í niðurstöðum rannsóknarinnar, að meirihluti hvítabjarna á norðurskautinu verði hættur að fjölga sér árið 2080.

Talið er að innan við 26 þúsund hvítabirnir séu í heiminum í dag og dreifast þeir um nokkur svæði, m.a. Svalbarða, Hudson-flóa við Kanada og hafsvæðið á milli Alaska og Síberíu. Ísbirnir veiða úti á ísnum og þegar hann hörfar gerir hvítabjörninn það einnig.
Í frétt Guardian er haft eftir aðalhöfundi rannsóknarinnar, líffræðingnum Péter Molnár, að lengi hafi verið vitað að hvítabjörnum stafaði ógn af bráðnun íssins á norðurslóðum. Hins vegar hafi verið óvíst um hvenær vænta mætti hraðrar fækkunar dýranna af þessum sökum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.












































Athugasemdir