Falsaðar OxyContin töflur í umferð

Lyfja­stofnun varar við töflum sem líkj­ast OxyContin en inni­halda önnur vara­söm efni.

Í frétt á vef stofn­un­ar­innar segir að rann­sókna­stofu í lyfja- og eit­ur­efna­fræði við Háskóla Íslands hafi nýlega borist til grein­ingar töflur sem líkt­ust lyf­inu OxyContin 80 mg töflum í útliti. „Að efna­grein­ingu lok­inni er ljóst að þær inni­halda ekki oxýkó­don, sem er virka efnið í OxyContin,“ segir í frétt­inni.

Í töfl­unum eru hins vegar önnur efni sem geta verið vara­söm. „Fölsuðu töfl­urnar sem líkj­ast OxyContin 80 mg inni­halda ekki oxýkó­don, heldur para­seta­mól, koffín, kódein, klónazepam, bíperíden og ketórólak. Töfl­urnar sem greindar voru komu frá Norð­ur­landi og af höf­uð­borg­ar­svæð­inu,“ segir í frétt­inni.

Þá eru töfl­urnar stimpl­aðar með „OC“ og „80“ sem sé mis­vísandi. „Fölsuðu töfl­urnar eru hins vegar þykk­ari en þær lög­legu, og filmu­húðin er laus­ari í sér,“ segir í frétt­inni. „Efnin sem greind hafa verið í fölsuðu töfl­unum eru sum hver notuð í lyfjum sem gefin eru við miklum verkjum, önnur við Park­in­sons­veiki, enn önnur við floga­veiki. Ekki er ljóst hver sam­verkan efn­anna í fölsuðu töfl­unum gæti orðið, áhrifin gætu orðið ófyr­ir­sjá­an­leg og valdið alvar­legum heilsu­fars­á­hrifum.“