Við að lesa eða horfa á fréttir, svo og að fylgjast með umræðum, einkum  netumræðum, hallast maður fljótlega að því að allt sé slæmt í honum heimi, að þjóð sé á vonarvöl, að illir múslimar bíði helfúsir handan við hornið eftir því að sprengja sig og aðra í loft upp í nafni spámannsins, að sífellt fleiri ku á því að Jesús hafi dáið fyrir sínar eigin syndir ekki sínar (hvílík svívirða!) og að Múhameð vanvirði náið gildur um sig miðjan.Guð minn góður! Og ekki nóg með það heldur er Guðsótti og frómir siðir ekki meir í hávegum hafðir en að stofnuð eru samtök undir nafngiftinni Hermenn Óðins sem eru víst hugsuð til þess að menn af réttum kynstofni sjái um að vanvirða íslenskt kvenfólk enda Íslendingar engir eftirbátar annarra þjóða í þeim efnum. Svo er sífellt verið að svíkja, pretta og ljúga; heiðarlegt fólk á vart til hnífs og skeiðar á meðan örfáir lifa í vellystingum og það auðvitað á kostnað þeirra sem minna mega sín. Allir eru berir að baki og engin á bróður af því að Íslendingar eðla sig ekki lengur til undaneldis. Til fjandans með nautnahyggju samtímans! Hún dregur úr innlendu vinnuafli! Hér ríkir örbirgð! Hér ríkir kynþátthatur! Hér ríkir sódómska! Hér ríkir afdalamennska og heimóttarskapur með slettu af karlrembu. En bíddu nú við hvernig má það standast þegar samfélagið er að kafna í samkynhneigðri kvenréttindaælu sem krónískt er spúð á allt og alla og gott ef Gylfi Ægisson, blessaður karlgarmurinn og mannvinurinn, fær ekki mest yfir sig af öllu. Guð blessi hann. Svo er Ólafur Ragnar annað hvort bjargvættur þjóðar eða örvasa valdasjúkt gamalmenni með puttana í illa fengnum gyðingaauð; Íslendingum fer fækkandi á kostnað útlendinga sem kunna enga íslensku og munu rústa íslensku pylsunni og fúlsa við hrútspungum og sviðum. Stjórnvöld, stjórnvöld, stjórnvöld og stjórnvöld spila á fiðlu á meðan að Ísland brennur. Jesús Kristur! vinstri er hægri og hægri er vinstri og Hannes Hólmsteinn mælir manna heilastur og mærir frelsara íslensku þjóðarinnar, sem eitt sinn hefði mátt kenna við Golíat þrátt fyrir nafnið, upp í rassgat. Guð blessi Davíð Oddson! Æ! Bíður ekki heimur bara upp á að vera fremstur í fláttskap og vélum? Alltént spyr maður sig hvort umræðan sé spegilmynd mannskepnunnar? Ef svo er stoðar vart mikið að vera væla yfir vonsku heimsins af því að þú ert alveg jafn vondur og sá næsti. Og ekki er ég nú mikið skárri. Goddamnit! Þetta er alveg allt í fokki! Og svo er alltaf skítaveður hérna! En hei, vinir og útlendingar! Er ekki sumarið komið og tími til kominn að horfa á björtu hliðarnar. Það kemur alveg fyrir að veðrið sé skaplegt og svo fengum við bjórinn 1989. Má svo alveg búast við því að við fáum MacDonalds aftur. Það er jú góðæri þrátt fyrir einhvern jarmkór fyrir framan Alþingishúsið. Það er nú eitthvað, ekki satt?