Leiðtogar Evrópusambandsins hafa í fyrsta sinn formlega rætt þann möguleika að greiðslufall verði hjá Grikkjum. Reuters greinir frá þessu og segir að þetta hafi verið rætt á undirbúningsfundi fyrir fund fjármálaráðherra evruríkjanna sem fer fram í næstu viku.
Reuters segir að þrír möguleikar hafi verið ræddir varðandi lausn á skuldamálum Grikkja. Ólíklegasta niðurstaðan er talin vera að komist verði að nýju samkomulagi milli Grikkja og lánardrottna þeirra á réttum tíma svo þeir geti staðið við skuldbindingar sínar eftir að núverandi samkomulag rennur út í lok mánaðar. Annar möguleikinn er að komist verði að samkomulagi um að framlengja núverandi samkomulag, sem rennur út á sama tíma og Grikkir eiga að borga 1,6 milljarð evra til Alþjóðagjaldeyrissjóðsins.
Þriðji möguleikinn, sem var ræddur í fyrsta skipti nú að sögn Reuters, er að Grikklandi verði leyft að fara í greiðslufall.
Flestir embættismennirnir á fundinum eru sagðir hafa haldið því fram að ólíklegt sé að samkomulag náist um umbætur sem Grikkir eiga að ráðast í til að fá áframhaldandi neyðarlán frá AGS og ESB. „Það myndi krefjast mikilla framfara á nokkrum dögum sem ekki hafa náðst á mörgum vikum,“ hefur Reuters eftir ónefndum embættismanni.
Grikkir eru hins vegar sagðir ætla að gera allt sem þeir geta til að ná samkomulagi í tíma. Í eftirmiðdaginn bárust fréttir af því að grísk stjórnvöld séu á leið til Brussel þar sem fundað verði í fyrramálið. Grikkir séu nú tilbúnir að koma fram með nýjar tillögur að umbótum og að aldrei hafi aðilarnir verið nær samkomulagi.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir