Óháði frambjóðandinn Alexander Van der Bellen sigraði í seinni umferð forsetakosninganna í Austurríki, sem fram fóru í gær. Hann hafði betur en frambjóðandi hins hægri- og þjóðernissinnaða Frelsisflokks, Norbert Hofer. BBC greinir frá þessu.
Hofer hafði verið spáð sigrinum og hafði betur eftir kosningarnar í gær en þegar utankjörfundaratkvæði höfðu verið talin í dag kom í ljós að Van der Bellen náði forskoti. Hann hefði annars orðið fyrsti þjóðhöfðingi Evrópusambandsríkis sem er langt til hægri.
Hofer hafði verið með 51,9% í kosningunum og Van der Bellen 48,1%. En 750 þúsund póstlögð atkvæði höfðu úrslitavaldið. Kosningaúrslitin þykja hafa sýnt skiptinguna í austurrísku samfélagi, Van der Bellen hafði betur í níu af tíu stærstu borgunum á meðan Hofer hafði yfirburði á strjálbýlum svæðum.
Van der Bellen var óháður en var studdur af Græningjaflokknum. Hann er mjög fylgjandi Evrópusambandinu og kosningabaráttan markaðist af því, á meðan Hofer hafði byggt kosningabaráttu sína að miklu leyti á andúð á Evrópusambandinu og ótta fólks við fjölgun hælisleitenda.
Þetta var í fyrsta skipti frá lokum seinni heimstyrjaldarinnar sem hvorki Jafnaðarmannaflokkurinn né Þjóðarflokkurinn í Austurríki áttu fulltrúa í seinni umferð forsetakosninga í landinu. Þeir flokkar eru hefðbundnir flokkar og sitja nú saman í ríkisstjórn.
Forsetaembættið er að mestu leyti táknrænt en forseti getur þó leyst upp neðri deild þingsins og þannig þvingað fram kosningar.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir