Carly Fiorina tilkynnti fyrr í dag að hún hygðist sækjast eftir útnefningu Repúblikanaflokksins til forseta. Fiorina tilkynnti framboðið í þættinum Good Morning America í morgun. „Ég held að ég sé besta manneskjan í starfið vegna þess að ég skil hvernig hagkerfið raunverulega virkar. Ég skil heiminn, hverjir eru í honum, hvernig heimurinn virkar.“
Fiorina er fyrrverandi forstjóri Hewlett-Packard og varð fyrsta konan til að stýra einu af tuttugu stærstu fyrirtækjum Bandaríkjanna. Hún starfaði sem ráðgjafi John McCain í forsetaframboði hans árið 2008 og var frambjóðandi Repúblikanaflokksins í Kaliforníu til öldungadeildar þingsins árið 2010 en tapaði fyrir Barböru Boxer.
Hún hefur meðal annars komist í fréttir nýlega fyrir það að kenna umhverfisverndarsinnum um mikla þurrka í Kaliforníu-ríki. „Kalifornía er klassískt dæmi um að frjálslyndir eru tilbúnir að fórna lífum og lifibrauði annarra manneskja á altari þeirra eigin hugmyndafræði. Þetta er harmleikur.“
Þá tilkynnti fyrrverandi skurðlæknirinn Ben Carson einnig um framboð sitt til að verða frambjóðandi repúblikana í forsetakosningunum. Carson, líkt og Fiorina, hefur aldrei setið í pólitísku embætti, en er mjög vinsæll meðal sumra íhaldsmanna í Bandaríkjunum. Hann tilkynnti um framboð sitt á fundi í heimaborg sinni Detroit með orðunum „Ég er Ben Carson og ég er forsetaframbjóðandi“. Hann var þó búinn að segja sjónvarpsstöð í Flórída í gærkvöldi að hann hygðist bjóða sig fram. Carson fór um víðan völl og talaði um allt frá efnahagsástandi Bandaríkjanna til vantrúar sinnar á þróunarkenninguna.
Carson hefur áður vakið athygli fyrir ummæli sín um samkynhneigð. Í fyrra líkti hann hinsegin fólki við barna- og dýraníðinga, en hann baðst afsökunar á því. Í mars á þessu ári sagði hann svo við CNN að samkynhneigð væri val, vegna þess að margir fangar færu inn í fangelsi gagnkynhneigðir en kæmu út samkynhneigðir. Hann baðst líka afsökunar á þessu, en notaði tækifærið og áréttaði að hann væri á móti hjónaböndum samkynhneigðra.
Þá sagði hann í byrjun þessa árs að Bandaríkjamenn gætu lært af liðsmönnum Íslamska ríkisins, sem væru mjög viljugir til þess að deyja fyrir málstað sinn. Þeir hefðu vondan málstað, en þeir tryðu á það sem þeir gerðu, ólíkt Bandaríkjamönnum sem væru að gefa frá sér alla sannfæringu og trú vegna pólitísks rétttrúnaðar.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir