Fréttir

Sigurður Ingi verður forsætisráðherra og Lilja Alfreðsdóttir kemur inn í ríkisstjórn

6. apríl 2016 · 17:40

Birtist upphaflega á Kjarnanum fyrir 11 árum.

Ríkisráðsfundir á Bessastöðum í dag
Þing kemur saman klukkan 10:30
Sjálfstæðisflokkur og Framsóknarflokkur munu starfa áfram saman í starfsstjórn
Alþingiskosningar verða í haust
Sigurður Ingi Jóhannsson verður forsætisráðherra
Lilja Alfreðsdóttir kemur inn í ríkisstjórn að tillögu Sigmundar Davíðs

Lýsingu lokið Nýjasta færsla kl. 21:46

21:46 6. apríl

Bless í 12 tíma

Jæja, nú segjum við þetta gott í beinu útsendingunni í kvöld. Við komum hins vegar aftur í fyrramálið. Þá verður þingfundur og svo ríkisráðsfundur þar sem þessi nýja ríkisstjórn verður væntanlega sett í embætti.

21:32 6. apríl

Enginn úr sterkasta kjördæminu ráðherra fyrir framsókn

Á það hefur verið bent að með þessari niðurstöðu er enginn ráðherra Framsóknarflokksins þingmaður úr Norðausturkjördæmi. Það er kjördæmi Sigmundar Davíðs og hefur verið sterkt vígi Framsóknarflokksins.

21:25 6. apríl

Kosningadagsetning fer eftir framgangi þingmála?

Bjarni Benediktsson sagði áðan að dagsetning næstu Alþingiskosninga muni ráðast af framgangi þingmála. Það er nú svolítið óvenjulegt, það sem sagt er hvati fyrir stjórnarandstöðuna að standa ekki í vegi fyrir þingmálum ríkisstjórnarinnar, því ef þau gera það þá bara tefjast kosningar? Þetta þarf að fá frekari botn í.

21:19 6. apríl

Sigmundur Davíð lagði til að Lilja Alfreðsdóttir verði ráðherra

Lilja Alfreðsdóttir verður ráðherra í ríkisstjórninni, sagði Sigurður Ingi. Þetta var að tillögu formanns flokksins, Sigmundar Davíðs, samkvæmt reglum flokksins.

21:12 6. apríl

„Stjórnarandstaðan er í rusli líka“

Skoðanakannanir eru bara vísbending um það sem gerist næst þegar kosið verður, segir Bjarni Ben., nokkuð höstugur. Hann segir að stjórnarandstaðan sé í rusli líka, þegar hann er spurður um slaka stöðu ríkisstjórnarflokkanna í skoðanakönnunum. Það sé einn flokkur sem sé „tímabundið“ með mikið fylgi, og er augljóslega að tala um Pírata.

21:10 6. apríl

Kemur í ljós á morgun hver verður sjávarútvegs- og landbúnaðarráðherra

Það verður að vera einhver spenna í þessu, segir nýi forsætisráðherrann. Hann segir að það hafi verið algjör eining í þingflokki framsóknarmanna um þessi mál.

21:09 6. apríl

Ríkisráðsfundur á morgun

Ríkisráðsfundur verður líklega haldinn um hádegi á morgun. Sigmundur Davíð verður óbreyttur þingmaður.

21:08 6. apríl

Kosið í haust

Kosið verður í haust og kjörtímabilið stytt um eitt þing þannig. Stóra málið sem enn á eftir að koma fram er um afnám gjaldeyrishafta, og það kemur fram í þinginu á næstu tveimur til þremur vikum, segir Bjarni.

21:05 6. apríl

Sigurður Ingi og Bjarni komnir

Þeir segjast hafa fundað í gær og í dag, með þingflokkum og stjórnarandstöðunni. Hafa komist að samkomulagi um að halda áfram ríkisstjórn og hafa sömu ráðuneyti undir sömu flokkum. Sömu megináherslur. Sigurður Ingi mun setjast í stól forsætisráðherra.

21:04 6. apríl

Stórundarleg staða

Það verður bara að segjast eins og er að þessi staða er alveg stórskrýtin. Það er ekkert alveg ljóst og það bólar ekkert á forvígismönnum ríkisstjórnarinnar til að skýra sín áform. Klukkan er orðin níu og þeir ætluðu að vera búnir að greina frá þessu fyrir tveimur tímum síðan.

20:58 6. apríl

Ekki sátt um aðra ráðherra hjá framsókn

Höskuldur Þórhallsson nefndi nafn Lilju Alfreðsdóttur. Lilja er ekki þingmaður en hún starfaði í ráðuneyti Sigmundar Davíðs Gunnlaugssonar sem verkefnisstjóri, og starfar í Seðlabankanum. Það virðist vera að allir fjölmiðlamenn á staðnum hafi heyrt það sem svo að hann væri að nefna Lilju til sögunnar sem ráðherra. Svo mun hins vegar ekki hafa verið, heldur hafi hann sagt að Lilja yrði aftur verkefnisstjóri í forsætisráðuneytinu.

Kjarninn hefur heimildir fyrir því að fyrir fundinn hafi staðið til að Ásmundur Einar Daðason þingflokksformaður yrði næsti sjávarútvegs- og landsbúnaðarráðherra. Ekki var hins vegar eining um það innan þingflokksins og þótti sumum þingmönnum flokksins þeir eiga frekara tilkall til embættisins en hann. Heimildarmenn Kjarnans nefna þar sérstaklega Höskuld Þórhallsson, úr stærsta kjördæmi flokksins, og Vigdísi Hauksdóttur, þingmanns Framsóknarflokksins í Reykjavík, sem áður hefur verið gengið framhjá. Lesið meira um það hér.

20:52 6. apríl

Þetta fólk er ekki fært um að stjórna landinu

„Þetta er allt á sömu bókina lært, þetta fólk er ekki fært um að stjórna landinu,“ segir Sigríður Ingibjörg Ingadóttir, þingmaður Samfylkingarinnar, um það að Höskuldur Þórhallsson hafi greint frá þessum tíðindum. Stjórnvöld hafi greinilega ekki betri stjórn en þetta.

20:45 6. apríl

Höskuldur Þórhallsson staðfestir að Sigurður Ingi er forsætisráðherra

Sigurður Ingi Jóhannsson verður forsætisráðherra. Þetta staðfesti Höskuldur Þórhallsson, þingmaður Framsóknarflokksins, rétt í þessu. Hann sagði ekki búið að raða endanlega niður í embætti.

Höskuldur hélt að Sigurður Ingi og Bjarni Benediktsson væru búnir að koma til fjölmiðla og ræða við þá. Hann vissi ekki að hann væri sá fyrsti til þess að greina fólki frá þessum tíðindum.

Höskuldur var nú ekki með mjög sterka stuðningsyfirlýsingu við Sigmund Davíð sem áframhaldandi formann flokksins. Hann sagði að það væri flokksmanna að ákveða hvort hann hefði stuðning sem formaður. Hann sagði að Framsóknarflokkurinn hefði skaðast af málinu öllu og sagði að hann hefði viljað að Sigmundur Davíð hefði gert betur grein fyrir sínu.

20:37 6. apríl

Sigmundur Davíð: Mjög góður fundur að baki

Sigmundur Davíð Gunnlaugsson kom niður stigann og sagði fundinn hafa verið mjög góðan. Hann vildi ekki svara því hver nýr forsætisráðherra væri þótt hann segði fólk geta getið sér til um það. Hann sagði eðlilegt að leyfa nýjum ráðherra að eiga sviðið. Nýr forsætisráðherra væri þó „mjög traustur og góður maður, þannig að það er ástæða til að óska Íslendingum til hamingju með hann.“

20:34 6. apríl

Þögn á þingi

Það hefur slegið þögn á hóp fjölmiðlafólks sem er að bíða.

20:32 6. apríl

Karl Garðarsson og Frosti Sigurjónsson farnir af fundi Framsóknar

Það er hreyfing á fólki. Þetta fer að gerast.

20:22 6. apríl

Þurfa að horfast í augu við stöðuna

Allt traust er farið og það verður ekki byggt upp með þessum hætti, segir Steingrímur J. Sigfússon um ríkisstjórnina. Það væri miklu betra bara að horfast í augu við stöðuna.

20:09 6. apríl

Fundarhlé hjá sjálfstæðismönnum

Það er komið fundarhlé hjá sjálfstæðismönnum. Bjarni Benediktsson er að tjá sig um stóra pítsumálið á Twitter og það gerir reikningur Sjálfstæðisflokksins líka.

20:02 6. apríl

Tjá sig ekkert um hvort allir séu sáttir

Vilhjálmur Bjarnason tjáir sig ekkert um það hvort allir séu sáttir með niðurstöðuna. Segist bara ætla að láta þá sem eru í forsvari tala um það. Ásmundur Friðriksson, samflokksmaður hans, kom líka fram og ræddi bara við þingvörð þegar hann var spurður að þessu sama.

Það eru Sunna Valgerðardóttir og Birgir Þór Harðarson sem eru ásamt fjölda annarra fjölmiðlamanna að bíða fregna á þingi. Þórður Snær Júlíusson og Þórunn Elísabet Bogadóttir eru líka á vaktinni og skrifa fréttir og þessa beinu lýsingu.

19:49 6. apríl

Vilhjálmur borðar ekki pítsu

Stjórnarandstöðuþingmenn eru farnir inn á fundinn, en Vilhjálmur Bjarnason þingmaður Sjálfstæðisflokksins brá sér út af honum og ræddi við blaðamenn. Hann greindi þeim meðal annars frá því að það væri svo heitt inni í þingflokksherbergi sjálfstæðismanna, hann væri að fá sér frískt loft. Hann fékk sér ekki pítsu með hinum af því að honum finnst þær vondar.

19:41 6. apríl

Farið með stafla af pítsum inn á fund sjálfstæðismanna

Sigríður Hagalín Björnsdóttir, fréttamaður RÚV á Alþingi, sagði frá því fyrir skömmu að nýlega hefði verið farið með stafla af pítsum inn á fund þingmanna Sjálfstæðisflokksins. Það væri því líklegt að eitthvað myndi teygjast á fundi þeirra.

Fólk nýtir sér þetta að sjálfsögðu til gríns á Twitter, og sjá má nokkur dæmi um það hér að neðan.

19:35 6. apríl

Traust hrapaði í kjölfar Kastljóssþáttar

Átta af hverjum tíu svarendum í nýrri könnun Félagsvísindastofnunar Háskóla Íslands segja að þeim hafi þótt umfjöllun Kastljóss um aflandsfélög tengd ráðamönnum vera fagleg. 78 prósent sögðu að umfjöllunin hefði dregið úr trausti þeirra gagnvart Sigmundi Davíð, 67 prósent Bjarna Benediktssyni, 62 prósent sögðust síður treysta Ólöfu Nordal og 70 prósent sögðust treysta ríkisstjórninni síður. Lesa má meira um þessa merkilegu könnun í frétt Þórðar Snæs Júlíussonar hér.

19:15 6. apríl

Stjórnarandstöðunni boðið á fund klukkan 19:30

Þetta var að koma fram í sjónvarpsfréttum RÚV. Árni Páll Árnason, Katrín Jakobsdóttir, Birgitta Jónsdóttir og Óttarr Proppé eru þar í viðtali. Árni Páll segir eðlilegt að boðað verði til kosninga strax heldur en að framlengja dauðastríð ríkisstjórnarinnar. Birgitta segir að ríkisstjórnin sé með 26 prósenta stuðning og krafa sé uppi um að Bjarni og Ólöf segi af sér. Katrín segir að krafan í samfélaginu sé að fá ríkisstjórn sem geti tekist á við málefni skattaskjólanna. Ráðherrarnir í núverandi ríkisstjórn hafi ekki fordæmt málið og hafi ekki það sem til þurfi til að takast á við þessi mál.

Katrín segir jafnframt að stjórnarandstaðan fari inn á fundinn með sömu kröfur, það hafi ekkert gerst sem breyti þeirra vantrauststillögum. Óttarr segir að það nægi ekki að skipta út nokkrum ráðherrum til að bæta traust á íslenskum stjórnvöldum.

19:04 6. apríl

Sigmundur Davíð mættur líka

Formenn beggja stjórnarflokkanna eru nú mættir og farnir inn á fund sinna flokka. Sigmundur tjáði sig nú ekki mikið við fjölmiðlamenn, frekar en undanfarið.

19:01 6. apríl

Bjarni Benediktsson kemur í lögreglufylgd í þinghúsið

18:51 6. apríl

Sigmundur Davíð farinn úr Stjórnarráðinu

Sigmundur Davíð hefur yfirgefið Stjórnarráðið og er væntanlega á leiðinni á Alþingi.

18:47 6. apríl

Búist við Sigmundi Davíð á þingflokksfund

Þingflokksfundir eru að hefjast, og RÚV greinir frá því að búist hafi verið við því að Sigmundur Davíð Gunnlaugsson myndi mæta á fund Framsóknarflokksins. Gert er ráð fyrir að fundirnir verði búnir um klukkan 19, svo það virðist ekki gert ráð fyrir því að þingflokkarnir þurfi að ræða margt.

18:44 6. apríl

Katrínu Jakobsdóttur fagnað af mótmælendum

Katrín Jakobsdóttir, formaður Vinstri grænna, var að keyra inn á bílastæði við Alþingi sem lögregla var búin að girða af. Henni var fagnað af mótmælendum sem höfðu hópað sig við hliðið. Illugi Gunnarsson menntamálaráðherra var líka að mæta á svæðið og var spurður hvort hann væri að fara á þingflokksfund. „Ég er allavega að fara á einhvern fund,“ svaraði hann.

18:41 6. apríl

Gríðarlegur fjöldi bíður fregna í Alþingishúsinu

Það er gríðarlegur fjöldi fjölmiðlamanna samankominn í Skála Alþingishússins, eins og sjá má á þessari mynd sem Birgir Þór Harðarson var að taka. Enn er ekkert um að vera þar.

18:33 6. apríl

Sigurður Ingi, Ásmundur Einar og Sigmundur Davíð funda í Stjórnarráðinu

Sigurður Ingi, Ásmundur Einar og Sigmundur Davíð Gunnlaugsson funda nú í Stjórnarráðinu. Birgir Þór Harðarson, blaðamaður og ljósmyndari Kjarnans, tók þessa mynd þegar hann og Sunna Valgerðardóttir blaðamaður gengu þar framhjá rétt í þessu.

18:27 6. apríl

Sigurður Ingi forsætisráðherra og Ásmundur Einar inn í ríkisstjórn

Sigurður Ingi Jóhannsson, varaformaður Framsóknarflokksins, verður næsti forsætisráðherra Íslands. Ásmundur Einar Daðason, þingflokksformaður Framsóknarflokksins, kemur inn í ríkisstjórn og sest í sjávarútvegs- og landbúnaðarráðuneytið. Þingkosningar verða í október eða nóvember. Þetta herma heimildir Kjarnans úr röðum stjórnarþingmanna. Ný ríkisstjórn verður kynnt í kvöld.

18:22 6. apríl

Nokkuð fjölmennt á Austurvelli - bein útsending

Hér má fylgjast með gangi mála á Austurvelli, þar sem nokkur þúsund manns eru samankomin.

18:14 6. apríl

Neyðar-Hismi í fyrsta sinn í Íslandssögunni

Þeir Árni Helgason og Grétar Theodórsson sjá um Hismið í Hlaðvarpi Kjarnans í hverri viku. Í dag fór í loftið sérstakt Neyðar-Hismi í ljósi aðstæðna á stjórnarheimilinu. Gestur þeirra var Andrés Jónsson, almannatengill, sem kom til að fara yfir stöðuna og reyna að átta sig á atburðarásinni síðan Sigmundur Davíð fór í afdrifaríkt viðtal í Ráðherrabústaðnum þann 11. mars síðastliðinn.

18:09 6. apríl

Nú er sagt óvíst hvenær kosningar verða

Eins og við greindum frá áðan sagði RÚV frá því að boðað yrði til kosninga í haust. Nú rétt í þessu sagði Broddi Broddason að þetta hefði komið fram í samtali hans við einn stjórnarþingmann. Síðar hefði hann rætt við annan stjórnarþingmann úr öðrum flokki, sem hefði sagt að það væri allt opið um það hversu lengi þessi stjórn myndi starfa.

Það er því ennþá nokkur óvissa um það hvað er að fara að gerast, og flokkarnir virðast ekki einu sinni vera sammála um það. Spurning hvað það þýðir.

18:04 6. apríl

Óvíst hver verður forsætisráðherra

Það er óvíst hver verður forsætisráðherra fram að kosningum sem sagt er að boðað verði til í haust. Sigurður Ingi Jóhannsson vildi ekki segja hvort hann yrði forsætisráðherra eða ekki þegar hann yfirgaf Stjórnarráðið fyrir um klukkustund síðan. Hann er kominn þangað aftur núna.

Á RÚV er sagt að þingflokksfundur Framsóknarflokksins sé ekki hafinn, en til hans hafði verið boðað klukkan 18.

18:00 6. apríl

Lætin aukast á Austurvelli

Mótmælt er á Austurvelli, þriðja daginn í röð. Þar virðast lætin bara vera að aukast, þó fjöldinn sé ekki jafn mikill og á mánudaginn.

17:50 6. apríl

Kosningar í haust – starfsstjórn þangað til

Kosið verður til Alþingis í haust en fram að því verður að störfum starfsstjórn Framsóknarflokksins og Sjálfstæðisflokksins. Þetta kom fram rétt í þessu á Rás 2. Broddi Broddason fréttamaður kom inn í Síðdegisútvarpið á Rás 2 og greindi frá þessu samkvæmt heimildum fréttastofunnar. Lestu frétt Kjarnans hér.

17:48 6. apríl

Samkomulag milli stjórnarflokka náð

Hér verður fylgst með atburðum kvöldsins. Búið er að boða þingflokksfund í þingflokki Framsóknarflokksins klukkan 18:00. Sigurður Ingi Jóhannsson, sjávarútvegs- og landbúnaðarráðherra, sagði blaðamönnum að niðurstaða fundahalda dagsins yrði kynnt klukkan 19.

Í dag hefur víða verið fundað bakvið luktar dyr. Einar K. Guðfinnsson, forseti Alþingis, fundaði í hádeginu með þingflokksformönnum allra flokka og þar var ákveðið að haldinn yrði þingfundur á morgun og á dagskrá yrði óundirbúinn fyrirspurnartími. Þar yrðu til svara Sigurður Ingi og Bjarni Benediktsson.

Sigurður Ingi og Ásmundur Einar Daðason, þingflokksformaður Framsóknarflokksins, yfirgáfu Stjórnarráðið um klukkan 17.

Fylgstu með þessum fréttaþræði hér. Straumurinn uppfærist um leið og nýjar fréttir berast.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundar

Efnisorð

Innlent

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.