Rekstur A-hluta Reykjavíkurborgar, sem nær til sjálfrar borgarinnar og grunnstarfsemi hennar, á að skila 4,8 milljarða króna afgangi árið 2026, samkvæmt fjárhagsáætlun næsta árs sem kynnt var í dag. Tilkynning um áætlunina var birt í Kauphöllinni rétt fyrir hádegi. Áætlað er að afgangurinn vaxi á næstu árum og verði 10,6 milljarðar króna árið 2030.
Veltufé frá rekstri – sem mælir hversu sterkur daglegur rekstur er – verður 7,7 prósent af tekjum árið 2026 og gert er ráð fyrir að það haldist í kringum 8 prósent næstu ár. Þetta endurspeglar, að sögn borgarinnar, traustan rekstur og góða sjóðsstöðu.
Eignir A-hluta verða um 326,8 milljarðar króna í lok árs 2026, og eiginfjárhlutfall 30 prósent. Hreinar skuldir sem hlutfall af tekjum eru áætlaðar 82 prósent og eiga að lækka á áætlunartímabilinu.
Fjárfestingar A-hluta verða 23,7 milljarðar króna árið 2026, þar af 3 milljarðar í stofnframlög til íbúðabygginga og tengdra verkefna. Lántaka borgarsjóðs verður 14 milljarðar króna, en handbært fé í árslok á að nema 17,1 milljarði króna.
Reykjavíkurborg segir að fjárhagsáætlunin endurspegli árangur af markvissri fjármálastjórn og að öll markmið fjármálastefnu borgarinnar verði uppfyllt á tímabilinu. Skuldir borgarinnar séu lágar í samanburði við önnur sveitarfélög á höfuðborgarsvæðinu og rekstur byggi á sjálfbærum grunni.
Áætlað er að sameiginleg afkoma borgarinnar verði jákvæð um 18,7 milljarða króna, og að EBITDA – sem mælir rekstrarafkomu án fjármagnsliða – nemi 69,6 milljörðum króna. Útkomuspá fyrir árið 2025 gerir ráð fyrir 14,6 milljarða afgangi, þannig að afkoman á næsta ári verður betri en í ár.
Einnig er gert ráð fyrir að rekstur haldi áfram að batna á tímabilinu 2027–2030, með auknu veltufé og sterkari stöðu til að standa undir fjárfestingum í innviðum borgarinnar.
Reykjavíkurborg áætlar að skuldaviðmið verði 103 prósent árið 2026, sem er vel undir 150 prósent hámarki sveitarstjórnarlaga.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir