Sigmundur Davíð Gunnlaugsson forsætisráðherra kemur í veg fyrir að frumvarp Illuga Gunnarssonar, mennta- og menningarmálaráðherra, um að útvarpsgjald verði óbreytt á næsta ári, verði afgreitt úr ríkisstjórn. Samkvæmt frumvarpinu átti útvarpsgjaldið að vera áfram 17.800 krónur en ekki lækka í 16.400 krónur, líkt og fjárlagafrumvarpið gerir ráð fyrir. Frá þessu er greint í Morgunblaðinu.
Í blaðinu segir að frumvarpið sé mjög umdeilt í báðum stjórnarflokkunum. Vigdís Hauksdóttir, formaður fjárlaganefndar, og Guðlaugur Þór Þórðarson, varaformaður fjárlaganefndar, eru til að mynda bæði eindregið þeirrar skoðunar að útvarpsgjaldið eigi að lækka. Í Morgunblaðinu er haft eftir ónafngreindum þingmanni Sjálfstæðisflokksins að hann teldi að meirihluti þingflokks Sjálfstæðisflokks væri andvígur frumvarpinu og sömu sögu sagði ónafngreindur þingmaður Framsóknarflokksins. Fjórir stjórnarandstöðuflokkanna lögðu hins vegar í gær fram breytingartillögu við fjárlagafrumvarpið um að útvarpsgjaldið yrði óbreytt á næsta ári.
Tekjur RÚV munu dragast saman um hátt í fimm hundruð milljónir króna á næsta ári ef útvarpsgjaldið verður lækkað. Það myndi þýða stórtækan niðurskurð á dagskrá og þjónustu, með tilheyrandi uppsögnum starfsfólks. Stjórnendur RÚV hafa sagt að þeir muni ekki geta uppfyllt þjónustusamning sinn við ríkið ef af verður.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir