Staða aðstoðarsaksóknara lögreglunnar á höfuðborgarsvæðinu hefur enn ekki verið auglýst laus til umsóknar þrátt fyrir að lögreglan hafi gefið Stundinni þær upplýsingar í ágúst að það yrði gert síðar í mánuðinum.
Í apríl á þessu ári var Hulda Elsa Björgvinsdóttir, saksóknari sem starfað hefur hjá ríkissaksóknara við góðan orðstír um árabil, sett í stöðu aðstoðarsaksóknara hjá lögreglunni án auglýsingar.
Samkvæmt heimildum blaðsins var þetta gert að frumkvæði Sigríðar Bjarkar Guðjónsdóttur lögreglustjóra án þess að aðstoðarlögreglustjóri og saksóknari lögreglu væri hafður með í ráðum og þrátt fyrir að leitað hefði verið eftir áliti hjá starfsmannaskrifstofu fjármálaráðuneytisins og þau svör fengist að réttast væri að auglýsa stöðuna áður en skipað yrði í hana.
Stundin sendi lögreglunni fyrirspurn um málið þann 9. ágúst og fékk þau svör að sett hefði verið í stöðuna um miðjan apríl en staðan yrði auglýst laus til umsóknar síðar í mánuðinum.
Aðspurður á föstudag hvort búið væri að auglýsa stöðuna svaraði upplýsingafulltrúi lögreglunnar: „Nei, það er ekki búið að auglýsa stöðuna og ég hef ekki upplýsingar um af hverju það hefur dregist.“
Ítrekaðar stöðuveitingar án auglýsingar hafa valdið titringi innan lögreglunnar. Í fyrra sendi Landssamband lögreglumanna umboðsmanni Alþingis bréf þar sem óskað var eftir því að hann hæfi frumkvæðisathugun á stöðuveitingum hjá embættinu. Fram kom að sambandinu hefðu borist síendurteknar umkvartanir frá félagsmönnum vegna stöðuveitinga án auglýsinga.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir