Sjálfstæðisflokkurinn er nærri kjörfylgi sínu í nýrri skoðanakönnun frá MMR, en flokkurinn mældist með 24,6 prósent fylgi. Þar á eftir koma Píratar með 13,5 prósent og Framsókn með 12,5 prósent fylgi. Báðir flokkar bæta við sig í þessari nýju könnun, Píratar 2,5 prósentustigum og Framsókn 2,9 prósentustigum.
Svipaða sögu er að segja af Viðreisn, sem mælist nú með 11 prósent fylgi og bætir við sig rúmu prósentustigi frá síðustu könnun MMR. Vinstri græn dala hins vegar mest og mælast nú með 11,1 prósent fylgi, sléttum 3 prósentustigum minna en í síðustu könnun MMR.[links]
Fylgi Samfylkingar dalar einnig um rúmt prósentustig og mælist nú 10,9 prósent. Fylgi Miðflokksins minnkar sömuleiðis um rúmt prósentustig á milli kannana og mældist nú 6,5 prósent.
Sósíalistaflokkurinn mælist með 5,6 prósent, sem er rúmu prósentustigi minna en í síðustu könnun MMR og Flokkur fólksins mælist með 2,8 prósent fylgi, eftir að hafa mælst með 4,2 prósent í síðustu könnun. 1,6 prósent aðspurðra segja að þeir myndu að kjósa einhverjar aðrar stjórnmálahreyfingar.
MMR segir í umfjöllun um niðurstöðurnar á vef sínum að þegar gögnin séu skoðuð aftur í tímann sé ljóst að nokkurs titrings gæti í fylgi flokkanna. „Þessar sveiflur eru eðlilegar og til marks um þau áhrif sem stjórnmálaumræðan hefur á þeim tímapunkti þegar viðkomandi könnun er tekin,“ segir á vef MMR.
Skoðanakannanir fyrirtækisins eru ólíkar þjóðarpúlsi Gallup, sem Kjarninn birti ítarlega umfjöllun um fyrr í dag, meðal annars að því leyti að kannanir MMR eru framkvæmdar á skemmra tímabili og mæla þannig skarpari sveiflur í fylgi en Þjóðarpúlsinn, sem er framkvæmdur yfir mánaðarlangt tímabil.
Þessi könnun MMR var framkvæmd dagana 25. maí til 1. júní 2021.
Fleiri baráttulínur að koma í ljós
MMR leggst í nokkra greiningu á tölunum og segir í umfjöllun sinni að sveiflurnar í fylgi flokkanna sýni okkur á milli hvaða flokka baráttan standi.
[adspot]
„MMR hefur áður gert að umfjöllunarefni hve stuðningur við Sjálfstæðisflokkinn sveiflast í gagnstæða átt við fylgi Miðflokksins sem hefur þótt til marks nokkra baráttu milli flokkanna um hilli sömu kjósendanna. Það sem hefur gerst frá áramótum er að slíkar baráttulínur hafa komið í ljós milli fleiri flokka og má í dag, til viðbótar við Sjálfstæðisflokk og Framsóknarflokk, sjá neikvæða fylgni (r = -0,75 eða sterkari) milli Vinstri grænna og Pírata, Samfylkingar og Sósíalista auk Viðreisnar og Flokks fólksins,“ segir í umfjöllun MMR.
Þau orð fylgja að nú þegar hylli undir lok COVID-baráttunnar og athygli stjórnmálamanna beinist í auknum mæli að hefðbundnum stjórnmálum, séu línur teknar að skerpast um hvaða flokka þeir muni velja á milli í komandi kosningum.
Könnun MMR var sem áður segir framkvæmd dagana 25.-1. júní 2021. Þátttakendur voru einstaklingar 18 ára og eldri sem valdir voru handahófskennt úr hópi álitsgjafa MMR, en álitsgjafar MMR eru valdir úr Þjóðskrá þannig að þeir endurspegli lýðfræðilega samsetningu þjóðarinnar á hverjum tíma. Um netkönnun var að ræða og voru svör 951 talsins.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
kosningar2021
Ásmundur Einar Daðason staðið sig best allra ráðherra – Bjarni Benediktsson langverst
Samfylkingin ekki stærri hjá Gallup í tólf ár en Vinstri græn hafa aldrei mælst minni
42,1 prósent innflytjenda greiddu atkvæði í síðustu alþingiskosningum
Allir formenn stjórnarflokkanna tapað umtalsverðu trausti á kjörtímabilinu
Tíð ríkisstjórnarskipti og kórónuveiran hafa stóraukið nýtingu fjáraukalaga
Athugasemdir