Þrýst á skuldabréfaeigendur WOW air að taka á sig afskriftir

Skulda­bréfa­eig­endur WOW air, sem tóku þátt í útboði félags­ins í sept­em­ber fyrir jafn­virði 8,5 millj­arða króna, gætu tapað stórfé verði kaup Icelandair á félag­inu að veru­leika. Krafa er uppi um að þeir taki á sig tug­pró­senta afskriftir.

Þetta kemur fram í Mark­aðnum í Frétta­blað­inu í dag. Til stóð að Icelandair mundi standa undir 90% af heild­ar­upp­hæð bréf­anna og Skúli Mogensen, for­stjóri WOW air og eini hlut­hafi félags­ins, mundi greiða afgang­inn með því hlutfé sem hann kynni að eign­ast í Icelandair við sam­ein­ing­una. Nú hefur Icelandair kraf­ist þess að greiðslan verði lægri en 90% og óvíst hvort Skúli geti bætt upp mis­mun­inn. Skúli mun eign­ast 1,8 til 6,6 pró­sent hlut í Icelandair þegar kaupin ganga í gegn.

37% þeirra sem tóku þátt í útboð­inu eru íslenskir fjár­festar sem keyptu fyrir rúma þrjá millj­arða króna. Skúli fjár­festi sjálfur fyrir jafn­virði 770 millj­óna króna.

Tillögur um hluta­fjár­aukn­ingu Icelandair liggja fyrir hlut­hafa­fundi Icelandair á föstu­dag og hefur Mark­að­ur­inn eftir Sveini Þór­ar­ins­syni hjá hag­fræði­deild Lands­bank­ans að honum verði mögu­lega frestað þar sem hlut­hafar hafi litlar upp­lýs­ingar um stöðu WOW air.