Íslend­ingar vinna einna lengst Evr­ópu­þjóða og nýjar tölur Hag­stof­unnar breyta engu um þann sam­an­burð. Þetta skrifar Stefán Ólafsson, pró­fessor í félags­fræði og sér­fræð­ingur hjá Eflingu, í grein á Eyjunni í dag.

Nýjar tölur Hag­stof­unnar um vinnu­magn og fram­leiðni hafa vakið athygli í vik­unni. Virtust þær benda til þess að vinnu­dagur Íslend­inga sé styttri en áður hefur verið talið og fram­leiðni á hverja vinnu­stund meiri. „OECD hefur tekið Ísland út úr tölum um vinnu­tíma,“ skrif­aði Konráð S. Guð­jóns­son, hag­fræð­ingur Við­skipta­ráðs, á Twitter. „Enda virð­ist hann hafa verið ofmet­inn svo langur vinnu­dagur Íslend­inga er því mýta.“

Hag­stofan árétti hins vegar í til­kynn­ingu í dag að um sé að ræða nýja töl­fræði, ekki leið­rétt­ingu á áður útgefnum tölum. Töl­fræðin byggi á alþjóð­legum stöðlum þjóð­hags­reikn­inga, en ekki vinnu­mark­aðs­könnun Hag­stof­unnar. Þessi töl­fræði sé hins vegar ekki vel til þess fallin að bera saman fjölda vinnu­stunda milli ríkja.

„Það eru því engar for­sendur fyrir þeim álykt­unum sem hag­fræð­ingur Við­skipta­ráðs dró af þessum nýju mæl­ingum Hag­stof­unnar á þróun fram­leiðni milli ára,“ skrifar Stefán.

Næstlengsta vinnuvikan samkvæmt Eurostat

Bendir Stefán á að Eurostat noti sam­an­burð á vinnu­mark­aðs­könn­unum sem fram­kvæmdar eru eins í öllum Evr­ópu­löndum. Þetta séu bestu mæl­ing­arnar til að svara því hve löng vinnu­vikan er hjá vinn­andi fólki á Íslandi og í öðrum Evr­ópu­löndum.

„Nið­ur­staðan er sú, að launa­fólk á Íslandi er með næst­lengstu vinnu­vik­una í aðal­starfi í Evrópu, á eftir Tyrk­landi,“ skrifar Stefán. „Ísland er einnig með næst­hæsta hlut­fall þeirra sem Eurostat telur hafa langa vinnu­viku. Hinar nor­rænu þjóð­irnar eru á hinum enda stig­ans, bæði með einna stystu meðal vinnu­vik­una og lægst hlut­fall fólks sem er með langa vinnu­viku.“

Stefán segir Íslend­inga hafa meiri atvinnu­þátt­töku en flestar vest­rænar þjóðir, lengri starfsævi og fleiri heim­ili með tvær fyr­ir­vinnur. Vinnandi fólk á Íslandi hafi um langt skeið unnið lengri vinnu­viku en flestar vest­rænar þjóðir og því varið afar stórum hluta af lífi sínu til vinnu. „Íslenskt verka­fólk sem er á lágum launum hefur iðu­lega þurft að stóla á umtals­verða yfir­vinnu og auka­vinnu til að ná endum saman. Þannig er það því miður enn.“