Skýrsla Hannesar Hólmsteins Gissurarsonar um erlenda áhrifaþætti bankahrunsins rýrir trúverðugleika Íslands og Háskóla Íslands gagnvart umheiminum. Allir á Íslandi sjái hins vegar að skrif hans séu vilhöll Sjálfstæðisflokknum. Þetta segir Helga Vala Helgadóttir, þingmaður Samfylkingarinnar, í aðsendri grein í Morgunblaðinu í dag.
„Erlendir aðilar hafa mögulega ekki tök á að greina að dr. Hannes hafi ekki bara verið óháður stjórnarmeðlimur í Seðlabankanum heldur beinlínis einn af sköpurum þess ástands sem leiddi af sér hið íslenska bankahrun,“ skrifar Helga Vala. „Þegar skýrsla dr. Hannesar er þar að auki stimpluð í bak og fyrir með velþóknun íslenskra stjórnvalda er hætta á að lesandi álykti að hér sé á ferðinni vandað faglegt rit frá virtum Háskóla.“
Helga Vala skrifar að Hannes hafi aldrei farið leynt með flokkspólitíska afstöðu sína. „Hér á Íslandi ætti hver sá sem eitthvað hefur fylgst með stjórnmálum að geta greint skrif hans, greint að þar er þess gætt vandlega að sneiða framhjá hverju því sem fellt gæti skugga á hans Sjálfstæðisflokk sem og sneitt vandlega að því að krydda með frjálsu lagi hvað það sem gæti komið sjálfstæðisflokkspólitískum andstæðingum miður. Gott og blessað. En þá komum við að því hvort það sé heppilegt að íslensk stjórnvöld séu að velja slíkan einstakling til verks þegar rita á trúverðuga skýrslu fyrir íslenska ríkið á erlendri tungu, hvar tilgangurinn virðist að koma í dreifingu sem víðast um heim?“
Þá skrifar Helga Vala að í siðuðu ríki hefði verið ritað í inngangi skýrslunnar að höfundur hennar hefði um áratugaskeið verið áhrifamaður bak við tjöldin í Sjálfstæðisflokknum og einn „aðaláróðursmeistari“ flokksins sem hefur stýrt landinu um áratuga skeið. „Þegar æviferill höfundar verður lesendum ljós er hætta á að það rýri enn frekar trúverðugleika Íslands og Háskóla Íslands í augum umheimsins,“ skrifar hún að lokum. „Það, auk milljónanna tíu sem við greiddum fyrir verkið getur orðið okkur ansi dýrkeypt.“
Hrunið
Segir Margréti leikstjóra ekkert vita um málið: „Þetta er bara sóðaskapur“
Orð Geithner á skjön við hrunskýrslu Hannesar
Örlög Íslands réðust á fundi bankastjóra heima hjá Davíð Oddssyni
„Gammasjóðir“ græddu á bönkunum eftir nauðasamninga: „Það var meira verðmæti í þrotabúunum“
Braut siðareglur til að tryggja gjaldeyrissamning við Kína
Athugasemdir