Enginn afsláttur verður gef­inn af þeim reglum sem gilt hafa um sótt­kví og ein­angrun þeirra sem smit­ast af Covid-19 eða kom­ist í snert­ingu við Covid smit­aða ein­stak­linga. Það á við um börn og nem­endur skóla, rétt eins og aðra. Sótt­varn­ar­lækni segir að unnið sé að því að setja saman sam­starfs­hóp til að leið­beina skóla­stjórn­endum, þeir hafi kallað eftir því. Hins vegar bendir hann á að skól­arnir eigi nú þegar að vita hvað gera skuli.

Þetta er meðal þess sem fram kom í á upp­lýs­inga­fundi Almanna­varna og emb­ættis land­læknis í dag. Síð­ast­lið­inn fimmtu­dag gaf Land­spít­ali út áhættu­mat þar sem fram kom að  þol­mörkum spít­al­ans væri náð. Páll Matth­í­as­son, for­stjóri Land­spít­ala, var spurður á fund­inum hver staða spít­al­ans væri nú í dag og svar­aði hann því til að staðan nú væri áþekk. Eins og stendur liggja 27 sjúk­lingar inni á spít­al­anum með Covid-19. Þar af eru fimm á gjör­gæslu og af þeim eru fimm í önd­urn­ar­vél.

Páll skýrði frá því að í þess­ari bylgju far­ald­urs­ins hefðu 64 lagst inn á spít­al­ann. Með­al­aldur þeirra væri 63 ár en með­al­aldur þeirra sem útskrif­aðir hefðu verið væri 50 ár. Það væri því ljóst að þrátt fyrir að mun fleira yngra fólk hefði smit­ast í þess­ari bylgju legð­ist kór­óna­veiran mun þyngra á þá sem eldri væru og það fólk lægi lengur inni á spít­ala.

Mjög veikt fólk kemur inn beint af götunni

Á Covid-göngu­deild væru nú 1.293 sjúk­lingar og þar af væru 45 merktir gulir í kerf­inu. Það þýddi að þeir væru tals­vert veikir og gætu þurft á inn­lögn að halda. Páll und­ir­strik­aði að mjög mik­il­vægt væri að fólk færi í skimun fyndi það til ein­kenna en spít­al­inn fyndi nú fyrir því að mik­ill fjöldi fólks kæmi beint inn af göt­unni inn á spít­al­ann, tals­vert mikið veikt, án þess að hafa við­komu á göngu­deild­inni áður. Fólk hefði því verið um tals­verðan tíma veikt úti í sam­fé­lag­inu án þess að fá grein­ingu. Það ætti meðal ann­ars við um þrjá af þeim níu sjúk­lingum sem lagðir hefðu verið inn á gjör­gæslu­deild í þess­ari bylgju.

Þórólfur Guðnason sótt­varn­ar­læknir vék að þeim aðgerðum sem unnið væri að til að stemma stigu við útbreiðslu Covid-19, þeim almennu tak­mörk­unum sem í gildi væru inn­an­lands og á landa­mær­unum, fyr­ir­hug­aðri bólu­setn­ingu barna á aldr­inum 12 til 15 ára og boð­uðum aðgerðum rík­is­stjórn­ar­innar til að styrkja Land­spít­al­ann í hlut­verki sínu til að takast á við vand­ann. Þórólfur velti því upp hvort þær aðgerðir myndu duga til að spít­al­inn ræði við hlut­verk sitt. Það yrði spít­al­inn að meta sjálfur en ef það mat yrði að far­ald­ur­inn væri að yfir­keyra spít­al­ann sagði Þórólfur að hann mydni leggja til hertar aðgerðir. „Við vitum hvað við þurfum að gera,“ sagði Þórólfur og brýndi fólk til að gæta að ein­stak­lings­bundnum sótt­vörnum sínum og sýna yfir­völdum sam­stöðu í þeim aðgerðum sem ráð­ist yrði í.

Um 120 manns hafa verið að grein­ast dag­lega að með­al­tali und­an­farnar þrjár vikur, því sem næst allir af Delta afbrigð­inu. Páll var spurður á fund­inum hversu lengi Land­spít­al­inn myndi ráða við álagið sem á honum væri, í ljósi þess að ekk­ert bendi til að far­ald­ur­inn sé á nið­ur­leið. Flest bendir hins vegar til þess að um línu­legan vöxt í smitum sé að ræða. Páll svar­aði því til að spít­al­inn væri vissu­lega við þol­mörk en réði þó við stöðun eins og hún væri nú. Ef ástandið stæði með sama hætti vikum saman væri ekki víst að við það réð­ist. Páll sagði að hann gæti því ekki svarað því til hversu lengi spít­al­inn héldi út en meg­in­á­hersla væri lögð á að tryggja þar mönnun, sér­stak­lega á gjör­gæslu.