Lögreglan í Manchester handtók á föstudag knattspyrnumanninn Gylfa Sigurðsson, leikmann Everton í ensku deildinni og íslenska landsliðsins, vegna gruns um brot gegn barni. Þetta herma heimildir Mbl.is.

Everton staðfesti í gær að leikmaður í aðalhóp liðsins hefði verið sendur frá liðinu vegna lögreglurannsóknar. „Félagið mun halda áfram að styðja við rannsókn yfirvalda og mun ekki gefa út frekari yfirlýsingar að þessu sinni,“ sagði í yfirlýsingu frá félaginu.

Bresku blöðin Daily Mail og The Sun ásamt fleirum höfðu greint frá handtökunni í gær án þess að nefna Gylfa á nafn. Í fréttum þeirra kom fram að lögreglan hefði gert húsleit hjá leikmanni vegna kynferðisbrotamáls, en eftir handtöku hafi honum verið sleppt gegn tryggingu. Kom fram að leikmaðurinn væri 31 árs gamall, giftur og að ásakanirnar væru alvarlegar.

Gylfi er einn besti knattspyrnumaður Íslandssögunnar og hefur átt farsælan feril í atvinnumennsku. Á unglingsaldri lék hann með FH og Breiðablik áður en hann gekk til liðs við Reading á Englandi aðeins 16 ára að aldri. Árið 2010 var samningur hans seldur til 1899 Hoffenheim á Þýskalandi þar sem hann lék í tvö ár. Eftir tíma á láni hjá Swansea í Wales gekk hann til liðs við Tottenham Hotspur. Fór hann aftur til Swansea áður en hann var seldur til Everton árið 2017 fyrir metupphæð hjá liðinu. Hefur hann leikið þar síðan og verið varafyrirliði liðsins. Gylfi var ekki á lista yfir leikmenn liðsins um helgina þegar liðið spilaði æfingaleik.

Gylfi hefur leikið 78 landsleiki fyrir íslenska karlalandsliðið og skorað í þeim 25 mörk. Hann var lykilmaður í landsliðshópnum þegar Ísland lék á sínu fyrsta stórmóti, Evrópukeppninni 2016, og komst í 8 liða úrslit eftir frækinn sigur á Englandi. Þá var hann einnig í hópnum í Heimsmeistaramótinu 2018.

Gylfi er eigandi útgerðarfélagsins Blikabergs sem hann hefur rekið ásamt föður sínum og bróður. Árið 2012 kom hann með 38 milljónir króna til landsins í gegnum fjárfestingaleið Seðlabanka Íslands til að fjárfesta í rekstrinum.