Stígamót segja breska fyrirlesara sem væntanlegir eru til landsins til að fjalla um foreldraútilokun breiða út hugmyndafræði þar sem konum og börnum er ekki trúað þegar sagt er frá heimilis- og kynferðisofbeldi. Formaður Félags um foreldrajafnrétti, sem stendur fyrir námskeiðinu, segir hins vegar óþarfi að færa umræðuna niður í „skotgrafir kynjastríðs“.
Hjónin Karen og Nick Woodall munu halda heilsdags námskeið í lok janúar um börn og fjölskyldur sem kljást við foreldraútilokun. Hugtakið er umdeilt bæði á sviði sálfræði og lögfræði, en það skilgreinist sem það athæfi þegar annað foreldri snýr barni gegn hinu foreldrinu með innrætingu og hefur því verið lýst sem heilaþvotti foreldris á barni. Félag um foreldrajafnrétti sendi tölvupóst um viðburðinn á um 500 aðila nýverið og þar á meðal fagaðila í málaflokknum.
„Við setjum stórt spurningarmerki við að þetta fólk sé að fara að kenna íslensku fagfólki eitthvað um barnavernd og fjölskyldurétt,“ segir Steinunn Gyðu- og Guðjónsdóttir, verkefnastýra á Stígamótum, um Woodall-hjónin. „Skrif þeirra eru lituð af hugmyndum um að börn ljúgi til um kynferðisofbeldi, heimilisofbeldi snúist fyrst og fremst um að mæður beiti börnunum fyrir sig til að útiloka feður og þau virðast ekki taka neitt tillit til þess að mæður reyni að vernda börn sín og sig sjálfar gagnvart heimilisofbeldi. Þetta er hugsunarháttur þar sem þolendum er ekki trúað.“
„Þetta er hugsunarháttur þar sem þolendum er ekki trúað“
Steinunn segir hjónin einnig vera með aðrar „forneskjulegar hugmyndir“ um jafnrétti, sem eigi ekki við í íslensku samfélagi. „Þarna eru hugmyndir um að mæður eigi að vera heima með börnin og feður útivinnandi, skýr og klár verkaskipting byggð á gömlum staðalhugmyndum. Það er mjög skrítið að Félag um foreldrajafnrétti, sem kennir sig við jafnrétti, bjóði okkur upp á þessa fyrirlesara, sem standa alls ekki fyrir jafnrétti.“
Hún segir heimsmyndina sem Woodall-hjónin vinna út frá ekki vera til þess fallna að leiðbeina fagfólki. „Þau tala um að börnin séu uppfull af ranghugmyndum og að þau ljúgi fyrir hönd mæðra sinna og að baki þeim standi feminísk samtök,“ segir Steinunn. „Sjálfsagt eru til dæmi þess að börnum sé beitt á ósanngjarnan hátt þegar kemur að skilnaði foreldra, en þetta er ekki fagfólkið sem ætti að vera að fræða okkur um það.“
Flókin og erfið mál
Dofri Hermannsson, formaður Félags um foreldrajafnrétti, segir Woodall-hjónin halda námskeiðið með milligöngu félagsins og að þau séu sérfræðingar á þessu sviði. Hvetur hann alla sem áhuga hafa að sækja sér fræðslu um málið.
„Foreldraútilokun er þegar annað foreldrið beitir þekktum aðferðum til að slíta sambandi barnsins við hitt foreldrið,“ segir hann. „Þetta er tækni sem er ekkert síður notuð af feðrum en mæðrum og til okkar leituðu á síðasta ári fleiri mæður en feður. Þeim mæðrum er lítill greiði gerður með að taka þetta niður í nafni femínisma þar sem þetta er útmálað sem hugtak sem ofbeldisfullir feður nota til að halda áfram að ofsækja börn sín og fyrrverandi eiginkonur.“
Woodall-hjónin halda tvö námskeið á vegum félagsins. Annað er fyrir foreldra og aðra útilokaða aðstandendur eða börn sem telja sig hafa verið beitt tilfinningamisnotkun. Hitt er ætlað barnaverndarstarfsmönnum, sáttamönnum, sálfræðingum, félagsfræðingum, félagsráðgjöfum, lögmönnum, dómurum og öðrum sérfræðingum.
Dofri segir deilur um hugtakið „foreldraútilokun“ hafa í raun verið fagmannadeilu, en á tímabili var reynt að skilgreina „foreldrafirringarheilkenni“ sem sérstakan kvilla í sálfræði. „Karen og Nick Woodall eru tvímælalaust meðal færasta fólksins á þessu sviði og hiklaust gott fagfólk,“ segir Dofri. „Við viljum ekki taka þátt í leðjuslagnum, heldur fá færasta fólk heimsins hingað til að tala milliliðalaust við þá sem eru að reyna að leysa úr þessum hrikalega flóknu og erfiðu málum.“
Hann segir foreldraútilokun vera andlegt ofbeldi gagnvart börnum þar sem þeim er innrættur ótti og jafnvel fyrirlitning gagnvart öðru foreldrinu. Mikilvægt sé þó í þessum málum að útiloka fyrst að raunverulegt heimilis- eða kynferðisofbeldi hafi átt sér stað, en að skýr greinarmunur sé á einkennum barna eftir því um hvort sé að ræða. „Það eru mjög margir og sterkir hópar, sérstaklega hópar í nafni femínisma, sem vilja taka umræðu um foreldraútilokun niður í skotgrafir kynjastríðs,“ segir hann. „En það er misskilningur, sem þær virðast hafa hag af að halda uppi.“
Gagnrýnir femínista ítrekað á bloggi sínu
Karen og Nick Woodall stýra Family Separation Clinic, sem er stofnun sem sérhæfir sig í skilnaðarmálum þar sem börn hafna samskiptum við annað foreldrið. Karen skilgreinir sig sem „uppgjafarfemínista“ á bloggsíðu sinni, hafnar hugtökum á borð við feðraveldi og er gagnrýnin á feminísk samtök og viðburði eins og Milljarður rís á vegum UN Women þar sem sjónum er beitt að kynferðislegu ofbeldi.
„Kvenréttindaþrýstihópar vilja ekki að umræða um heimilisofbeldi fari að snúast um geðheilbrigðismál því það mundi taka okkur út úr pólitísku nálguninni á feðraveldi sem er tilbúningurinn sem femínistar nota til þess að öðlast og viðhalda stjórn í kynjastríðunum sem þetta skapar,“ skrifaði hún á síðu sína nýverið.
„Sú hugmynd að allir karlmenn séu hættulegir börnum sínum þar til annað er sannað [...] er afurð kynjastríðsins“
„Er feðraveldið til? Eru allir menn í grunninn með forréttindi umfram konur? Ég geng um götur London og sé heimilislausa, nær alfarið karlmenn, og ég veit að þessi tilbúningur byggir ekki á raunveruleikanum. Lífið er ekki eins auðvelt að greina og kynjastríðsmennirnir vilja að við trúum. Sambönd barna við foreldra eftir skilnað eru ekki hluti af kynjastríðinu og sú hugmynd að allir karlmenn sé hættulegir börnum sínum þar til annað er sannað [...] er afurð kynjastríðsins sem við þurfum að komast yfir.“
Þá var Karen ávítt af samtökum breskra sálfræðinga árið 2015 með einróma ákvörðun nefndar þess efnis að hún hefði framið brot í starfi með kæruleysi og ófullnægjandi faglegri þjónustu sem hafi verið langt undir viðmiðum.
Réttindi feðra
Athugasemdir