Kostnaður við blaðamannafundi ríkisstjórnar á kórónuveirutímum var sjö milljónir

Beinn kostn­aður við sam­eig­in­lega blaða­manna­fundi sem Katrín Jak­obs­dóttir for­sæt­is­ráð­herra hefur tekið þátt í frá 1. febr­úar 2020 til 1. júní 2021 nam tæp­lega 7,1 milljón króna.

Um er að ræða blaða­manna­fundi sem voru aðal­lega haldnir til að til­kynna um ýmis­konar aðgerðir eða ráð­staf­anir vegna kór­ónu­veiru­far­ald­urs­ins, en þó ekki ein­vörð­ungu. Á meðal funda sem einnig hafa farið fram, og hafa leitt af sér kostnað, eru fundur um upp­bygg­ingu inn­viða vegna fár­viðr­is­ins í des­em­ber 2019, vegna kynn­ingar á mark­á­ætlun og skýrslu um fjórðu iðn­bylt­ing­una, vegna kaupa á björg­un­ar­skipum og vegna sam­starf stjórn­valda og Samtaka fyr­ir­tækja í sjáv­ar­út­vegi um loft­lags­mál.

Þetta kemur fram í svari for­sæt­is­ráð­herra við fyr­ir­spurn Helgu Völu Helga­dóttur, þing­manns Sam­fylk­ing­ar­innar, um málið.

[adspot]Þar kemur fram að á tíma­bil­inu hafi alls 15 fundir verið haldnir með þátt­töku for­sæt­is­ráð­herra. Stærsti ein­staki kostn­að­ar­lið­ur­inn var vegna leigu á fund­ar­að­stöðu, tækja­leigu og tækni­legri þjón­ustu, en fyrir það greiddi rík­is­sjóður tæp­lega 6,7 millj­ónir króna. Þá kost­aði ljós­myndun af því sem fram fór á fund­unum rík­is­sjóð 320 þús­und krónur og tákn­máls­þjón­usta 106 þús­und krónur.

Stærstu fund­irnir hafa verið haldnir í Hörpu til að kynna efna­hags­að­gerðir vegna kór­ónu­veiru­far­ald­urs­ins, aflétt­ingu ferða­tak­mark­ana eða breyt­ingar á sótt­varn­ar­ráð­stöf­unum. Fyrsti stóri fund­ur­inn vegna efna­hags­að­gerða­pakka rík­is­stjórn­ar­innar til að takast á við far­ald­ur­inn var hald­inn 21. mars 2020.