Fréttir kosningar2022

Sjáið það sem bar hæst á kosninganótt

Ritstjórn Kjarnans

14. maí 2022 · 21:45

Birtist upphaflega á Kjarnanum fyrir 5 árum.

Síðustu kjörstöðum í sveitarstjórnarkosningunum árið 2022 var lokað kl. 22. Ritstjórn Kjarnans fylgdist með fyrstu tölum og pólitískum vendingum í sveitarfélögum hringinn í kringum landið.

Lýsingu lokið Nýjasta færsla kl. 07:16

07:16 15. maí

Takk fyrir samfylgdina

Kjarninn þakkar fyrir samfylgdina á kosninganótt. Í dag og á næstu dögum verður fjallað nánar um úrslit sveitarstjórnarkosninganna.

07:14 15. maí

Lokatölur í Reykjavík: Meirihlutinn fallinn

Fyrstu tölur í Reykajvík reyndust sannspáar, meirihlutinn er fallinn og staðan fyrir meirihlutaviðræður er snúin.

Sjálfstæðisflokkur fær sex borgarfulltrúa, Samfylking fimm, Framsóknarflokkur fjóra, Píratar þrjá, Sósíalistaflokkur tvo, Viðreisn einn, Flokkur fólksins einn og Vinstri græn einn.

Sjálfstæðisflokkurinn er áfram stærsti flokkurinn í borginni þrátt fyrir verstu úrslit í sögu flokksins. Samfylkingin tapaði sömuleiðis tveimur borgarfulltrúum. Ljóst er að Framsókn er í lykilstöðu fyrir myndun meirihluta með sína fjóra borgarfulltrúa, en flokkurinn átti ekki fulltrúa eftir borgarstjórnarkosningarnar 2018.

Framsókn er einnig sigurvegari sveitarstjórnarkosninganna á landsvísu þar sem hann bætir mest við sig. Sjálfstæðisflokkurinn á áfram flesta kjörna fulltrúa í sveitarstjórnum en flokkurinn, ásamt Miðflokknum, Samfylkingu og Viðreisn tapa allir sveitarstjórnarsætum milli kosninga.

Lokaniðurstaða í Reykjavík:

Sjálfstæðisflokkur: 24,5 prósent - 6 fulltrúar

Samfylking: 20,3 prósent - 5 fulltrúar

Framsóknarflokkur: 18,7 prósent - 4 fulltrúar

Píratar: 11,6 prósent - 3 fulltrúar

Sósíalistaflokkurinn: 7,7 prósent - 2 fulltrúar

Viðreisn: 5,2 prósent - 1 fulltrúi

Flokkur fólksins: 4,5 prósent - 1 fulltrúi

Vinstri græn: 4 prósent - 1 fulltrúi

Miðflokkurinn: 2,4 prósent

Ábyrgð framtíð: 0,8 prósent

Reykjavík, besta borgin: 0,2 prósent

02:27 15. maí

Takk og bless í bili

Ritstjórn Kjarnans þakkar fyrir samfylgdina og lætur hér staðar numið í bili við að greina frá nýjustu vendingum kosninganæturinnar 2022. Við munum á morgun og á næstu dögum fjalla frekar um úrslit sveitarstjórnarkosninganna.

02:25 15. maí

Sjálfstæðisflokkur og Framsókn bæta við sig frá könnunum miðað við fyrstu tölur

Sjálfstæðisflokkur og Framsóknarflokkur eru með töluvert meira fylgi í Reykjavíkurborg samkvæmt fyrstu tölum en niðurstaða síðustu kosningaspár Kjarnans og Dr. Baldurs Héðinssonar fyrir kosningarnar gaf til kynna.

Sú kosningaspá byggði á vegnu meðaltali fjögurra skoðanakannana sem birtar voru í aðdraganda kosninga.

Að sama skapi er kjörfylgi Samfylkingar og Pírata samkvæmt fyrstu tölum úr borginni talsvert minna en það var í kosningaspánni.

02:05 15. maí

Svona lítur borgarstjórn út miðað við fyrstu tölur

Sjálfstæðisflokkur: 6 fulltrúar

Hildur Björnsdóttir

Ragnhildur Alda María Vilhjálmsdóttir

Kjartan Magnússon

Marta Guðjónsdóttir

Björn Gíslason

Friðjón R. Friðjónsson

Samfylking: 5 fulltrúar

Dagur B. Eggertsson

Heiða Björg Hilmisdóttir

Skúli Þór Helgason

Sabine Leskopf

Hjálmar Sveinsson

Framsóknarflokkur: 4 fulltrúar

Einar Þorsteinsson

Árelía Eydís Guðmundsdóttir

Magnea Gná Jóhannsdóttir

Aðalsteinn Haukur Sverrisson

Píratar: 3 fulltrúar

Dóra Björt Guðjónsdóttir

Alexandra Briem

Magnús Davíð Norðdahl

Sósíalistaflokkur: 2 fulltrúar

Sanna Magdalena Mörtudóttir

Trausti Breiðfjörð Magnússon

Viðreisn: 1 fulltrúi

Þórdís Lóa Þórhallsdóttir

Flokkur fólksins: 1 fulltrúi

Kolbrún Baldursdóttir

Vinstri græn: 1 fulltrúi

Líf Magneudóttir

01:45 15. maí

Meirihlutinn er fallinn í Reykjavík – Sjálfstæðisflokkurinn stærstur

„Jæja, loksins koma fyrstu tölur,“ sagði Eva Bryndís formaður yfirkjörstjórnar Reykjavíkur klukkan 1.41 er hún las fyrstu tölur úr Reykjavík, tæpum tveimur tímum á eftir áætlun.

Og það eru tíðindi. Framsóknarflokkurinn fengi fjóra fulltrúa en hann fékk engan í síðustu kosningum. Sjálfstæðisflokkurinn er stærsti flokkurinn í borginni samkvæmt þessum tölum og fengi sex fulltrúa en missir tvo frá síðustu kosningum. Samfylkingin fengi 20,6 prósent og myndi einnig tapa tveimur fulltrúum og fengi því fimm.

37.319 atkvæði hafa verið talin.

„Skýrt ákall um breytingar í Reykjavík,“ sagði Einar Þorsteinsson, oddviti Framsóknarflokksins, eftir að tölurnar voru ljósar.

„Það sem við erum að sjá er að Samfylkingin er leiðandi afl í borginni,“ sagði Dagur B. Eggertsson, borgarstjóri og oddviti Samfylkingarinnar á kosningavöku flokksins. Hann ákvað að taka þann pólinn í hæðina að segja að flokkar með áherslu á græna umbreytingu borgarinnar, flokkar sem vilja Borgarlínu, væru með yfir 60 prósent fylgi.

Þarna er hann þá að taka Framsóknarflokkinn með inn í jöfnuna því hann undanskildi í orðum sínum sérstaklega Miðflokkinn og Sjálfstæðisflokkinn.

01:32 15. maí

Bjarni segir skýringa á fylgistapi að leita á hverjum stað

Bjarna Benediktssyni formanni Sjálfstæðisflokksins finnst mjög athyglisvert að þeir flokkar sem gengu hvað harðast fram í gagnrýni á flokkinn vegna t.d. bankasölunnar „eru ekki að ríða feitum hesti frá þessum kosningum“. Þetta sagði hann í viðtali á RÚV í nótt. „Það er engin vinstri sveifla í neinum tölum.“

Fréttamaður RÚV spurði: Hvað þarf til að þú myndir axla ábyrgð sem formaður flokksins á afdrifum flokksins á sveitarstjórnarstigi?

„Þú spurðir mig að þessu daginn fyrir kosningarnar í haust og nú ertu aftur að spyrja mig að þessu daginn sem að kosið er. Ég vil bara vekja athygli þína á því að við erum með hreinan meirihluta í nokkrum sveitarfélögum, við myndum ekki vilja skipta um atkvæði við nokkurn annan flokk.“

Bjarni sagði Sjálfstæðisflokkinn hafa haft „algjöra yfirburði“ í kringum höfuðborgina undanfarin ár. Hann sagði „jú við erum að tapa fylgi“ og átti þar m.a. við Garðabæ en þar hafi flokkurinn haft átta af ellefu fulltrúum á síðasta kjörtímabili. „Heilt yfir erum við að koma ágætlega út,“ sagði Bjarni, Sjálfstæðisflokkurinn væri að tapa fylgi, yfirleitt til Framsóknarflokksins.

Framsóknarflokkurinn væri í mikilli sókn sem væri á margan hátt „mjög athyglisvert“ ekki síst vegna þess að hann hefði verið í sögulegri lægð fyrir nokkrum árum síðan. „Ég segi bara: Við þurfum að horfa á stöðuna á hverjum stað. Það eru skýringar.“

01:06 15. maí

Eurovision tefur fyrir talningu í Reykjavík

Þórdís Arnljótsdóttir fréttamaður RÚV tók stutt viðtal við Evu Bryndísi Helgadóttur, formann yfirkjörstjórnar í Reykjavík, rétt fyrir kl. 1. Miklar tafir hafa verið á fyrstu tölum úr borginni. Eva sagði að áætlanir hafi gert ráð fyrir því að fyrstu tölur yrðu birtar um miðnætti en þrátt fyrir að vera með „frábært talningafólk“ þá eru nýjar kosningareglur sem hægi verulega á talningunni. Von er á þeim kl. 1.30.

Nýju reglurnar eru þannig að gera þarf grein fyrir því hvaða talningarmaður telur hvern bunka. Bókhaldið er því orðið mjög nákvæmt. En svo er Eurovision „væntanlega“ að hafa einhver áhrif. Það hefur orðið til þess að fleiri fóru snemma á kjörstað og fyrsti skammtur atkvæða sem skilgreindur er eftir kúnstarinnar reglum, „stórt mengi“ að sögn Evu. „Þannig að þessi skammtur sem við erum að demba á talningafólkinu í fyrstu umferð er aðeins stærri en von var á. En þá fáum við líka góðar fyrstu tölur.“ Fyrstu tölur munu því jafnvel verða allt að helmingur allra atkvæða sem greidd voru í dag.

01:02 15. maí

Bíða óþreyjufull eftir fyrstu tölum úr höfuðborginni

Þolinmæði er dyggð segir gamalt máltæki. Það fer lítið fyrir þolinmæðinni á Twitter en tístarar bíða eftir fyrstu tölum frá Reykjavík með óþreyju, svo ekki sé meira sagt. Við grípum því til þeirra orða sem ef til vill hafa oftast verið látin falla í kosningasjónvarpinu: Nóttin er ung!

00:59 15. maí

Miðflokkurinn að gera gott mót í Grindavík

Meirihluti Sjálfstæðisflokks og Framsóknarflokks er falinn í Grindavík samkvæmt fyrstu tölum. Miðflokkurinn er að auka fylgi sitt til muna, er með 32 prósent taldra atkvæða. Sjálfstæðisflokkurinn er með 26,5 prósent og Framsókn 20,3.

00:55 15. maí

Litlar breytingar í Reykjanesbæ

Meirihlutinn heldur velli í Reykjanesbæ samkvæmt fyrstu tölum. Samkvæmt þeim sveiflast fylgið lítillega en ekki er hægt að tala um miklar mannabreytingar. Sjálfstæðisflokkurinn bætir við sig frá síðustu kosningum og mælist stærstur flokka, fær þrjá fulltrúa líkt og í síðustu kosningum. Samfylking bætir lítillega við sig og heldur einnig þremur fulltrúum. Framsóknarflokkurinn fær einnig þrjá fulltrúa samkvæmt fyrstu tölum og bætir við sig einum. Samfylking og Framsókn sitja í meirihluta ásamt Beinni leið sem heldur sínum eina bæjarfulltrúa.

Nýtt framboð, Umbót, hrifsar til sín manni frá Miðflokki en tveir efstu frambjóðendur Umbótar sátu í tveimur efstu sætum Miðflokksins í síðustu kosningum. Oddviti Umbótar, Margrét Þórarinsdóttir er systir Birgis Þórarinssonar sem færði sig úr Miðflokki í Sjálfstæðisflokk skömmu eftir Alþingiskosningar sem fram fóru í haust.

Í síðustu Alþingiskosningum voru tveir bæjarfulltrúar Reykjanesbæjar kjörnir á þing. Guðbrandur Einarsson sem sat fyrir Beina leið í bæjarstjórn og var forseti hennar settist á þing fyrir Viðreisn og Jóhann Friðrik Friðriksson var kjörinn á þing fyrir Framsókn.

Auk Miðflokksins dettur framboðið Frjálst afl úr bæjarstjórn. Einn fulltrúi sat fyrir Frjálst afl á liðnu kjörtímabili en það bauð ekki fram í þessum kosningum.

00:27 15. maí

Sjálfstæðisflokkur missti meirihlutann í Hveragerði

Eftir að hafa fengið rúmlega 52 prósent atkvæða árið 2018 tapaði Sjálfstæðisflokkurinn í Hveragerði tæplega 20 prósentustigum í kosningum dagsins og þar með meirihluta sínum í bæjarstjórninni.

Sjálfstæðisflokkurinn hefur verið með hreinan meirihluta í Hveragerði óslitið frá árinu 2006.

Okkar Hveragerði fékk 39,4 prósent atkvæða og bætir við sig einum fulltrúa og Framsóknar fékk 28 prósent atkvæða og bætir sömuleiðis við sig einum fulltrúa.

00:26 15. maí

Gríðarleg fylgisaukning Framsóknar í Mosfellsbæ

Framsóknarflokkurinn er með 32,4 prósent fylgi í Mosfellsbæ samkvæmt fyrstu tölum og myndi fá fjóra menn inn í bæjarstjórn. Flokkurinn hefur ekki átt mann í bæjarstjórn Mosfellsbæjar frá árinu 2006-2010 en á því kjörtímbili hafði hann aðeins einn fulltrúa. Í síðustu kosningum fékk flokkurinn aðeins 2,9 prósent atkvæða.

Sjálfstæðisflokkurinn er með 25,8 prósent fylgi og fengi þrjá menn, Vinir Mosfellsbæjar með 13 prósent og fengi tvo og Samfylking 9,3 prósent. Vinstri græn sem verið hafa í meirihluta samstarfi með Sjálfstæðisflokki síðustu árin eru með 5,9 prósent og myndu ekki ná manni inn.

Halla Karen Kristjánsdóttir íþróttakennari skipar 1. sætið á lista Framsóknarflokksins og Aldís Stefánsdóttir viðskiptafræðingur er í 2. sæti.

Sjálfstæðisflokkurinn sterkur í áratugi

Sjálfstæðisflokkurinn hefur um langan tíma verið mjög sterkt stjórnmálaafl í Mosfellsbæ, áður í Mosfellssveit. Sem dæmi hlaut hann tæp 64 prósent atkvæða í kosningunum árið 1990. Hann bauð fyrst fram árið 1970. Þá varð Jón M. Guðmundsson, bóndi á Reykjum, oddviti hreppsins líkt og hann hafði verið frá árinu 1962 og átti eftir að vera til ársins 1981. Hann var svo hreppstjóri til 1990.

Í þessi 52 ár hefur Sjálfstæðisflokkurinn hlotið flest atkvæði allra framboða í sveitarfélaginu og nokkrum sinnum hreinan meirihluta. Það gerðist t.d. árin 1982, 1986, 1990 og árin 2002. Síðan þá hefur hann reyndar tvisvar sinnum verið mjög nálægt hreinum meirihluta atkvæða, árin 2010 (49,8%) og 2014 (48,7%) en bæði þess ár hlaut hann engu að síður meirihluta bæjarfulltrúa.

Í kosningunum árið 2006 myndaði Sjálfstæðisflokkurinn stjórn með Vinstri grænum og hefur það samstarf haldið síðan. Í síðustu kosningum hlutu sjálfstæðismenn 39,2 prósent atkvæða og Vinstri græn fékk 9,6 prósent fylgi. Haraldur Sverrisson, sem verið hefur bæjarstjóri frá árinu 2007 bauð sig ekki fram í kosningunum nú og því ljóst að nýr bæjarstjóri mun taka við bráðlega við. En úr hvaða flokki mun hann koma? Spennan er mikil í Mosfellsbænum.

00:20 15. maí

Hildur: Við mætum bara örlögum okkar

Hvernig myndir þú skýra skort á stemningu hjá Sjálfstæðisflokknum akkúrat núna?

Þannig spurði Sigríður Hagalín Björnsdóttir, fréttamaður RÚV, Hildi Björnsdóttur oddvita Sjálfstæðisflokksins í Reykjavík rétt eftir miðnættið. Var Sigríður að vísa til þess að í nokkrum stórum sveitarfélögum, m.a. á Akureyri og í Garðabæ, væri Sjálfstæðisflokkurinn að tapa fylgi miðað við fyrstu tölur. „Það má auðvitað draga ýmsar ástæður fram,“ svaraði Hildur. Stemningu eða umræðu í landsmálum og annað. En við gerðum okkar besta og við mætum bara örlögum okkar upp úr kössunum á eftir.“

00:19 15. maí

Nær engar breytingar í Eyjum frá 2018

Lokatölur í Vestmannaeyjum eru komnar í hús. Þar breytist fylgi þeirra þriggja flokka sem bjóða fram afar lítið á milli kosninga.

Sjálfstæðisflokkurinn tapar örlitlu, er með 44,1 prósent atkvæða og 4 fulltrúa í bæjarstjórn, en meirihluti Fyrir Heimaey og Eyjalistans heldur örugglega með 5 fulltrúa í bæjarstjórninni í Vestmannaeyjum.

Bæði Sjálfstæðisflokkur og Eyjalistinn fá einn auka fulltrúa frá fyrra kjörtímabili, en bæjarfulltrúum í Eyjum er að fjölga um tvo frá fyrra kjörtímabili.

00:14 15. maí

Kunnugleg tvíeyki

Margrét Erla Maack sér svip með sérfræðingunum Ólafi Þ. Harðarsyni og Boga Ágústssyni annars vegar og gömlu góðu svalagagnrýnendunum Statler og Waldorf úr Prúðuleikurunum hins vegar. Þeir Óli og Bogi eru að vísu léttari í lund en hinir bölsýnu Statler og Waldorf sem gagnrýndu atriði Prúðuleikaranna miskunnarlaust.

00:11 15. maí

Sjálfstæðisflokkurinn sigraði í Ölfusi

Sjálfstæðisflokkurinn heldur hreinum meirihluta sínum í Ölfusi, en samkvæmt lokatölum úr sveitarfélaginu fær flokkurinn 55,9 prósent atkvæða og fjóra bæjarfulltrúa kjörna. B-listi Framfarasinna fékk 30,5 prósent og tvo fulltrúa kjörna og H-listi Íbúalistans fékk 13,7 prósent og einn fulltrúa í bæjarstjórnina.

Sjálfstæðisflokkurinn náði hreinum meirihluta eftir kosningarnar árið 2018, með tæp 52 prósent atkvæða. Framfarasinnar- og félagshyggjufólk í Ölfusi var þá eina mótframboðið og fengu rúm 48 prósent atkvæða, en einungis munaði 40 atkvæðum þarna á. Í kosningum ársins voru framboðin þrjú.

Elliði Vignisson fyrrverandi bæjarstjóri i Vestmannaeyjum var ráðinn bæjarstjóri af meirihluta Sjálfstæðisflokks í kjölfar kosninganna árið 2018. Hann var áfram bæjarstjóraefni Sjálfstæðisflokksins í Ölfusi og mun því að öllu óbreyttu halda áfram sem bæjarstjóri.

00:06 15. maí

Stór tíðindi úr Reykjavík – bið eftir tölum

Þórdís Arnljótsdóttir fréttamaður RÚV færði stór tíðindi í beinni útsendingu rétt fyrir miðnætti. Fyrstu tölur úr Reykjavík verða birtar mun seinna en stefnt var að vegna nýrra kosningareglna. Til stóð að birta þær fljótlega upp úr miðnætti en Þórdís sagði að sér hefði verið sagt að 1-2 tíma töf yrði á því.

Í minnisblaði yfirkjörstjórnar frá því um miðja viku kom fram að áætlað væri að fyrstu tölur yrðu opinberar á miðnætti, aðrar tölur kl. 3 og þær þriðju og síðustu klukkan 4.30 í nótt. Atkvæði þeirra sem mæta fyrri hluta dags á kjörstað verða talin fyrst og utankjörfundaratkvæði síðust.

Í fyrstu umferð verða talin öll kjörfundaatkvæði fyrri hluta dags. Áætlað var að henni ljúki um 23.40 og að fyrstu tölur í Reykjavík liggi fyrir og verði gerðar opinberar á miðnætti líkt og fyrr segir. Áætlað var að lokið yrði við að telja öll kjörfundaratkvæði um 02.50 og að aðrar yrðu gerðar opinberar klukkan 3. Í þriðju umferð yrðu utankjörfundaratkvæði talin. Áætlað var að lokið yrði við að telja öll atkvæði um kl. 4 og að lokatölur í Reykjavík lægju fyrir og yrðu gerðar opinberar kl. 4.30.

23:52 14. maí

Úr tveimur flokkum í fjóra í Garðabæ

Sjálfstæðisflokkurinn er með 50 prósent og tapar einum og mögulega tveimur bæjarfulltrúm í Garðabæ, samkvæmt fyrstu tölum.

Garðabæjarlistinn tapar einum manni og fær tvo fulltrúa, en Viðreisn sem klauf sig frá Garðabæjarlistanum og bauð fram sjálfstætt nú fær einnig einn fullrúa.

Framsóknarflokkurinn nær svo einum manni inn í bæjarstjórnina, sem er skipuð 11 fulltrúum.

Það er því útlit fyrir að fjórir flokkar eigi fulltrúa í bæjarstjórn Garðabæjar á komandi kjörtímabili.

Í síðustu kosningum hlaut Sjálfstæðisflokkurinn 62 prósent atkvæða og átta bæjarfulltrúa. Garðabæjarlistinn hlaut 28 prósent og þrjá fulltrúa. Önnur framboð náðu ekki inn manni.

Sex listar voru í framboði nú. Almar Guðmundsson leiðir Sjálfstæðisflokkinn en Gunnar Einarsson, sem verið hefur bæjarstjóri í Garðabæ í sautján ár, ákvað að bjóða sig ekki fram nú.

Garðahreppur varð til árið 1871 þegar Álftaneshreppi var skipt í tvennt. Hann fékk kaupstaðaréttindi árið 1976 og nefndist þá Garðabær. Álftanes sameinaðist honum árið 2012.

Sjálfstæðisflokkurinn hefur allt frá því að Garðabær fékk kaupstaðaréttindi haft meirihluta í bæjarstjórninni. Hæst fór fylgið árið 1990 er það var 67 próesnt.

23:43 14. maí

Kattafólk sefur út á Akureyri

„Kettir koma seint inn,“ sagði Ásgeir Ólafsson, annar maður á lista Kattalistans á Akureyri er fyrstu tölur höfðu verið birtar. Fylgið er ekki mikið en hverju atkvæði er fagnað, sagði Ásgeir. Kjósendur Kattalistans „fóru seint á kjörstað,“ segir hann. „Kattafólk sefur út.“

L-listi bæjarlisti Akureyrar er að bæta við sig einum manni, fengi þrjá fulltrúa, Framsókn heldur sínum tveimur en Sjálfstæðisflokkurinn tapar öðrum sínum manni miðað við þessar fyrstu tölur og sömuleiðis tapar Samfylkingin sínum manni. Flokkur fólksins bætir hins vegar við sig, er með 12 prósent þeirra atkvæða sem hafa verið talin. „Ekkert panikk hjá okkur, við bíðum bara róleg,“ sagði Heimir Örn Árnason, oddviti sjálfstæðismanna í beinni útsendingu á RÚV áðan.

23:40 14. maí

Hvaða framboð fær 12 stig?

Það er ekki laust við að tilkynningar frá kjörstjórnum líkist stigagjöfinni í Eurovision sem sjónvarpsáhorfendur hafa fylgst grannt með fyrr í kvöld. Stóri munurinn á sveitastjórnarkosningunum og Eurovision er sá að í þeim fyrrnefndu gilda atkvæði kjósenda 100%

23:20 14. maí

Sjálfstæðisflokkur og Samfylking hnífjöfn í Hafnarfirði

Sjálfstæðisflokkur og Samfylking eru bæði með 27,6 prósent fylgi samkvæmt fyrstu tölum úr Hafnarfirði. Búið er að telja 6.170 atkvæði en alls eru 21.744 á kjörskrá.

Atkvæðin eru talin í bunkum í Hafnarfirði og búið er að telja 1.700 atkvæði frá hvorum flokki.

Meirihluti Sjálfstæðisflokksins og Framsóknarflokks heldur samkvæmt þessum fyrstu tölum, en Framsókn er með 16,4 prósent og bætir við sig manni.

Það því ekki að sök þrátt fyrir að Sjálfstæðisflokkurinn tapi einum bæjarfulltrúa. Auk þessara þriggja flokka næði Viðreisn inn einum bæjarfulltrúa.

Samfylkingin bætir við sig tveimur fulltrúum með Guðmund Árna Stefánsson í fararbroddi samkvæmt fyrstu tölum, en bæði Bæjarlistinn og Miðflokkurinn missa sína bæjarfulltrúa.

23:02 14. maí

Sonur bæjarstjóra að verða bæjarstjóri?

Miðað við fyrstu tölur frá Seltjarnarnesi verður engin breyting á bæjarstjórninni, hvorki frá síðasta kjörtímabili né fjórtán kjörtímabilum þar á undan ef út það er farið. Núverandi meirihluti á Seltjarnarnesi er skipaður fulltrúum Sjálfstæðisflokksins og hefur svo verið um áratuga skeið.

Í kosningunum nú eru þrír flokkar í framboði: Framtíðarlistinn, sem Karl Pétur Jónsson leiðir, Samfylking og óháðir, sem Guðmundur Ari Sigurjónsson leiðir og Sjálfstæðisflokkurinn undir forystu Þórs Sigurgeirssonar. Þór er fyrrverandi bæjarfulltrúi og sonur Sigurgeirs Sigurðsson, sem sat í bæjarstjórn í fjörutíu ár og var bæjarstjóri (sveitarstjóri) mestan þann tíma. Sigurgeir lést árið 2017, 82 ára að aldri.

Og samkvæmt fyrstu tölum er Sjálfstæðisflokkurinn með 50 prósent atkvæða, Samfylkingin með 40,7 prósent og Framtíðarlistinn 9,3 prósent og kæmi ekki manni inn í bæjarstjórn.

Í kosningunum 2018 hlaut Sjálfstæðisflokkurinn fjóra bæjarfulltrúa. Samfylkingin (27,85%) hlaut tvo og sameiginlegt framboð Viðreisnar og Neslistans 1 fulltrúa (15,27%). F-listann, Fyrir Seltjarnarnes, (10,61%) vantaði aðeins 23 atkvæði til að fella fjórða mann Sjálfstæðisflokks og þar með meirihlutann.

22:52 14. maí

Vinir Kópavogs næststærstir í Kópavogi

„Ég er undrandi, ég er glöð og ég er þakklát,“ segir Helga Jónsdóttir, leiðtogi Vina Kópavogs. Flokkurinn, sem m.a. hefur lagt áherslu á breytta skipulagsstefnu í bæjarfélaginu og gagnrýnt áformaða uppbyggingu í Hamraborginni og á Kársnesi, er með um 17 prósent fylgi samkvæmt fyrstu tölum sem bárust frá bænum um kl. 22.30 og fengi tvo fulltrúa.

„Baráttan var hreint ævintýri, grasrótarbarátta án nokkurs bakhjarls,“ sagði Helga enn fremur í samtali við fréttamann RÚV: „Bara við og vinir okkar og velunnarar. Ég er 69 ára að fá að upplifa svona ævintýri er ótrúlegt.“

Miðað við fyrstu tölur fengi hið nýja framboð Helgu og félaga tvo fulltrúa. Sjálfstæðismenn missa einn mann samkvæmt þessu en Framsóknarflokkurinn bætir við sig manni og meirihlutinn heldur. Samfylkingin missir sinn eina mann.

„Nóttin er ung,“ sagði Ásdís Kristjánsdóttir, oddviti Sjálfstæðisflokks og bæjarstjóraefni flokksins, í samtali við fréttamann RÚV eftir fyrstu tölur. Ásdís tók við oddvitasætinu af Ármanni Kr. Ólafssyni, sem verið hefur bæjarstjóri frá árinu 2012 en ákvað í vetur að bjóða sig ekki fram nú. Framsóknarflokkurinn er undir forystu Orra Hlöðverssonar.

Framsóknar- og sjálfstæðismenn átt góðu gengi að fagna

Fyrstu bæjarstjórnarkosningar í Kópavogi fóru fram 2. október 1955, aðeins fimm mánuðum eftir að bærinn fékk kaupstaðarréttindi og rúmu ári eftir sögulegar hreppsnefndarkosningar sem þurfti að endurtaka. Listi Óháðra kjósenda hlaut flest atkvæði og meirihluta bæjarfulltrúa. Finnbogi Rútur Valdimarsson var kjörinn fyrsti bæjarstjórinn en er hann var skipaður bankastjóri Útvegsbankans árið 1957 tók Hulda Jakobsdóttir, eiginkona hans, við stöðunni. Hún var þar með fyrst kvenna til að gegna embætti bæjarstjóra á Íslandi.

Óháðir héldu meirihluta sínum í næstu kosningum, fengu einnig flest atkvæði árið 1962 en mynduðu þá meirihluta með Framsóknarflokki.

Staðan breyttist árið 1966 er aðeins sex atkvæðum munaði á Óháðum kjósendum og Sjálfstæðisflokknum. Báðir hlutur þeir rétt rúm 30 prósent atkvæða. Óháðir og Framsókn héldu þó sínu striki í meirihlutanum.

Árið 1970 var Sjálfstæðisflokkurinn orðinn stærstur og komst í meirihluta. Sagan endurtók sig fjórum árum síðar en árið 1978 varð stórkostleg breyting, flokkurinn hlaut 15 prósent atkvæða. Klofningur hafði orðið meðal sjálfstæðismanna í bænum. 1982 réttir Sjálfstæðisflokkurinn úr kútnum en sat í minnihluta er Framsókn, Alþýðuflokkur og Alþýðubandalag endurnýjuðu heiti sín.

Árið 1990 er ár sem markar ákveðin tímamót því þá fóru Framsóknarflokkur og Sjálfstæðismenn í meirihlutasamstarf og Sigurður Geirdal, bæjarfulltrúi Framsóknarflokksins var kjörinn bæjarstjóri og átti eftir að sitja í þeim stóli til dánardags árið 2004. Þetta samstarf hélt allt til ársins 2010 er meirihluti var myndaður af Samfylkingu, Vinstri grænum, Næstbesta flokknum og Kópavogslistanum. Þessi samvinna gekk ekki upp og sprakk meirihlutinn tveimur árum síðar og nýr tók við, skipaður Sjálfstæðisflokki, Framsókn og Kópavogslista. Ármann Kr. Ármannsson varð bæjarstjóri. Flokkarnir hafa síðan þá verið í meirihlutasamstarfi og þar með nær samfleytt í 22 ár ef frá eru talin þau tvö sem annar meirihluti var við völd áður en hann sprakk.

22:43 14. maí

Samtvinna kosningar og Eurovision í gríninu á Twitter

Það er sannkölluð vertíðarstemning á Twitter í kvöld enda eru Íslendingar iðulega duglegir að tísta um Eurovision og um kosningar. Þegar úrslit söngvakeppninnar hitta á sama dag og kosningar er því nóg um að vera á samfélagsmiðlinum. Þessi tvíbókun gefur Twitter-notendum líka færi á að tvinna þessa stórviðburði saman í gríni sínu.

22:27 14. maí

Óðu snjóinn á kjörstað – endurnýjun í Árneshreppi

Íbúar Árneshrepps þurftu hreinlega að vaða snjóinn, að minnsta kosti upp fyrir ökkla, á leið á kjörstað í Trékyllisvík í dag því hretið sem kom á eftir góðri vorbyrjun er orðið nokkuð þaulsetið.

Í Árneshreppi eru óbundnar kosningar sem þýðir að allir kjósendur í sveitarfélaginu eru í kjöri nema þeir sem löglega eru undanþegnir skyldu til að taka kjöri og hafa fyrir fram skorast undan því. Á kjörseðlinum eru því engir listabókstafir heldur þarf að skrifa nöfn þeirra sem fólk kýs: Fimm aðalmenn og fimm varamenn.

Talningu er lokið og þrír hreppsnefndarmenn voru endurkjörnir: Bjarnheiður Júlía Fossdal bóndi á Melum hlaut flest atkvæði allra eða 24. Arinbjörn Bernharðsson sem rekur ferðaþjónustuna Urðartind fékk 21 atkvæði og Eva Sigurbjörnsdóttir, núverandi oddviti, 17. Tveir koma nýir inn í hreppsstjórnina í sveitarfélaginu við ysta haf sem er það fámennasta á landinu. Annar þeirra er Úlfar Eyjólfsson, kenndur við Krossnes, sem áður hefur átt sæti í sveitarstjórninni. Hinn nýliðinn er Delphine Briois.

Dramatískar kosningar fyrir fjórum árum

Kosningaþátttaka var 82,9 prósent. 41 var á kjörskrá og hefur því fækkað um fimm síðan í síðustu kosningum. Þá skók mál sem vakti hneykslun margra sveitarfélagið því „íbúum“ fjölgaði um 40 prósent fyrir þær er sautján manns fluttu lögheimili sitt þangað, margt á eyðibýli. Var þetta m.a. gert í þeim tilgangi að reyna að koma í veg fyrir að Hvalárvirkjun yrði reist á óbyggðum víðernum Ófeigsfjarðarheiðar. Að endingu voru flest nöfnin þurrkuð út af kjörskránni, ýmist af Þjóðskrá sem synjaði fólki um flutning lögheimilis eða af hreppsnefndinni.

Svo fór að í kosningunum, sem fram fóru á vindasömum degi í félagsheimilinu í Árnesi í Trékyllisvík, völdust eingöngu virkjunarsinnar í hreppsstjórnina.

En Hvalárvirkjun er ekki enn risin og í raun var hún sett „á ís“ af framkvæmdaaðilanum Vesturverki árið 2020 er eftirspurn eftir raforku var lítil. Virkjunarhugmyndin er þó ekki úr sögunni því líkt og Kjarninn greindi frá fyrir skömmu er enn unnið að rannsóknum og Vesturverk, dótturfélag HS Orku enn áfram um að virkjunin verði reist.

20:20 14. maí

Velkomin á kosningavakt Kjarnans

Kosið er til sveitarstjórna í 62 af 64 sveitarfélögum landsins í dag, en í tveimur þeirra var sjálfkjörið þar sem einungis einn listi kom fram.

Ritstjórn Kjarnans mun hér fylgjast með helstu tíðindum og vendingum í stærstu sveitarfélögum landsins.

Hér að neðan má sjá hvernig fjöldi kjörinna fulltrúa skiptist á milli stjórnmálaafla í 22 fjölmennustu sveitarfélögum landsins, en eins Kjarninn fjallaði um fyrir skemmstu er Sjálfstæðisflokkurinn ráðandi afl á sveitarstjórnarstiginu.

Mikil spenna er víða fyrir kosningarnar og fáar skoðanakannanir hafa birst í stærstu sveitarfélögum landsins utan höfuðborgarinnar Reykjavíkur. Það er því viðbúið að við eigum spennandi kvöld í vændum.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundur

Ritstjórn Kjarnans

Fréttamál

kosningar2022

Efnisorð

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar

kosningar2022

Fréttir

Kosningastjóri Samfylkingarinnar nýr aðstoðarmaður borgarstjóra

Aðstoðarmaður Dags B. Eggertssonar síðan 2014 hefur ráðið sig til starfa hjá dótturfélagi Orkuveitu Reykjavíkur. Við aðstoðarmannastarfinu tekur Diljá Ragnarsdóttir.

Fréttir

Framsókn og Vinstri græn hafa tapað um átta prósentustigum af fylgi frá síðustu kosningum

Eini stjórnarflokkurinn sem tapar ekki fylgi frá kosningum er Sjálfstæðisflokkurinn. Ríkisstjórnin næði ekki meirihluta á þingi ef kosið yrði í dag. Samfylkingin hefur bætt langmestu fylgi við sig og er næst stærsti flokkur landsins.

Fréttirkosningar2022

Vegglistaverk Libiu og Ólafs þótti óleyfilegur kosningaáróður í Hafnarfirði

Yfirkjörstjórn í Hafnarfirði taldi sér ekkert annað fært en að láta mála yfir vegglistaverk Libiu Castro og Ólafs Ólafssonar fyrir sveitarstjórnarkosningarnar í vor. Ólafur segir að allt eins hefði verið hægt að skikka N1 til að taka niður fána.

Fréttir

Laun 30 dýrustu bæjarstjóranna voru samtal 698 milljónir króna í fyrra

Alls eru 64 sveitarfélög á landinu eða eitt sveitarfélag fyrir hverja tæplega sex þúsund íbúa landsins. Þorri þeirra er með færri en tvö þúsund íbúa. Alls voru 100 sveitarstjórnarmenn með yfir eina milljón á mánuði í fyrra.

Fréttirkosningar2022

Hildur varði 9,3 milljónum í prófkjörsslaginn og átti eina og hálfa milljón afgangs

Hildur Björnsdóttir oddviti Sjálfstæðisflokksins átti 1,5 milljónir eftir í kosningasjóði sínum þegar prófkjör Sjálfstæðisflokksins í borginni var um garð gengið. Það fé ætlar hún að færa félagi sem hún sjálf stjórnar, en það heitir Frelsisborgin.

Fréttir

Hildur skilaði uppgjöri vegna prófkjörs í gær

Prófkjörsbarátta Ragnhildar Öldu Vilhjálmsdóttur sem einnig sóttist eftir oddvitasæti í prófkjöri Sjálfstæðisflokksins kostaði 8,4 milljónir. Frambjóðendur hafa þrjá mánuði frá prófkjöri til að skila upplýsingum um kostnað framboða til Ríkisendurskoðunar.

Mest lesið

Dómsmál

Prestur lagði leikstjóra og frænda í meiðyrðamáli

Presturinn Arnaldur Máni Finnsson var sýknaður af kröfu föðurbróður síns og leikstjórans Einars Þórs Gunnlaugssonar í meiðyrðamáli tengdu harðri deilu um gamalt einbýlishús.

Úttekt

Hverjir eru að græða á Íslandi?

Hagnaður sjávarútvegs og ferðaþjónustu jókst um ríflega 55 prósent í fyrra. Enn er þó mestur hagnaður í fasteignageiranum.

Erlent

Pútín vildi engar málamiðlanir

Vestrænir friðargæsluliðar í Úkraínu yrðu „réttmætt skotmark“, sagði Rússlandsforseti. Sendinefnd Trumps kom tómhent frá Moskvu.

UmhverfiðEndurvinnsla á Íslandi

Íslenskt plast fannst í Tyrklandi

Umbúðir utan af Ísey skyri fundust í plastúrgangi í Tyrklandi. Framkvæmdastjóri Úrvinnslusjóðs segir að plast frá Íslandi fari að hluta til endurvinnslu í Tyrklandi en neitar að afhenda gögn um rekjanleika þess.

Innlent

Konur í meirihluta í hópuppsögnum en jafnréttismat óþarft að mati Reykjavíkurborgar

66 prósent þeirra sem misstu vinnuna hjá Reykjavíkurborg í hópuppsögnum undanfarna mánuði eru konur. Borgin taldi óþarft að gera jafnréttismat og sagði gildandi stefnur haldast óbreyttar. „Það að stefnurnar haldist óbreyttar þýðir ekki að breytingarnar sem verið er að leggja til hafi ekki jafnréttisáhrif,“ segir lektor í kynjafræði.

ErlentÚkraínustríðið

Fundur Trumps, Pútíns og Xi vekur áhyggjur af uppskiptingu heimsins

Mögulegur leiðtogafundur stórveldanna í Shenzhen vekur áhyggjur af því að Úkraína og Evrópa verði sniðgengnar, en sérfræðingar telja ólíklegt að viðræðurnar skili miklum árangri.

Mest lesið

Mest lesið í vikunni

ErlentBandaríki Trumps

Trump hafnar úrslitum þingkosninganna

Donald Trump sakar kosningayfirvöld um svik án þess að leggja fram gögn, eftir að demókratar náðu meirihluta í báðum deildum Bandaríkjaþings.

Viðtal

„Hún mun alltaf vera með mér“

Adolf Þór Haraldsson missti stóru ástina í lífi sínu aðeins nítján ára gamall þegar Hannah Jane Large lést á Krýsuvíkurvegi. Hún hafði skrifað ritgerð um ást þeirra, sem hann segir lýsa hvernig honum líður núna.

Úttekt

Mannaráðningar Trumps eftir tapið vekja ugg

Donald Trump bauð bardagakappanum Dana White, forstjóra UFC, starf blaðafulltrúa Hvíta hússins og skipaði Stephen Miller starfsmannastjóra sinn.

NeytendurFernurnar brenna

„Við erum öll höfð að fífli þegar svona er komið fram við okkur“

Björg Eva Erlendsdóttir, framkvæmdastjóri Landverndar, segir fréttir af því að fernur séu enn brenndar vera annað kjaftshögg og verra en það fyrsta. Breki Karlsson, formaður Neytendasamtakanna, hefur kallað eftir gagngerri endurskoðun á Úrvinnslusjóði.

Erlent

Trump heitir endurkomu: „Þeir geta elt okkur uppi“

Trump var tvisvar kærður til embættismissis á fyrra forsetatímabili sínu. Nú geta demókratar rannsakað viðskipti fjölskyldu hans og störf stjórnarinnar.

Viðtal

40 mín.

Syrgjandi foreldrar Hönnuh þakklát Íslandi

Foreldrar írskrar stúlku sem lést í bílslysi á Íslandi í lok sumars eru í senn þakklát Íslandi og sorgmædd yfir að hún lést langt fyrir aldur fram. Þau eiga þó erfitt með að fallast á að hún hafi látist í slysi, þar sem vísbendingar eru um að ekið hafi verið á yfir 200 kílómetra hraða í banaslysi dóttur þeirra.

Mest lesið í mánuðinum

Viðtal

40 mín.

Syrgjandi foreldrar Hönnuh þakklát Íslandi

Dómsmál

Dómari stöðvaði lögmann Írisar Helgu

Brotaþoli lýsti flóknu ástarlífi Írisar Helgu Jónatansdóttur sem er sökuð um umfangsmikið umsáturseinelti. Dómari stöðvaði lögmann Írisar Helgu þegar hann gekk á vitnið, og úr varð nokkurt orðaskak.

Viðtal

120 mín.

Íslenskur læknir varpar nýju ljósi á lífshættulegan meðgöngusjúkdóm

Nítján ára gömul lá Silja Rut Ragnarsdóttir nær dauða en lífi á skurðarborði Landspítalans eftir alvarlegt tilfelli meðgöngueitrunar. Íslenskur vísindamaður í Bandaríkjunum, Jóhann Elí Guðjónsson húðlæknir, leiðir brautryðjandi rannsóknir sem varpa nýju ljósi á hvers vegna sjúkdómurinn kemur fram. Hann telur mögulegt að þróa lyf við sjúkdómnum sem bjargað gæti mannslífum.

Viðtal

„Hún mun alltaf vera með mér“

GagnrýniDjöflar

Hjónadjöflar

Sigríður Jónsdóttir skrifar um Djöfla eftir Lars Norén, sem sýnt er í Borgarleikhúsinu.

Viðtal

Ástleysið er sárt

Nánd er næring, nauðsynleg eins og matur. Tæpur helmingur fólks elst upp í óöruggum tengslum sem geta komið niður á tengslum og ástarsamböndum á fullorðinsárum, jafnvel ógnað heilsu, enda er „tengslamyndun ein af grunnforsendum farsældar“, að sögn klíníska sálfræðingsins Guðbrands Árna Ísberg. Í bók sinni, Í augum þínum verð ég til, fjallar hann um getu okkar til að mynda tengsl og ástina í öllum sínum myndum.

Athugasemdir

kosningar2022

Nýtt efni