Fjöldatakmarkanir hækkaðar í 50 manns frá og með næsta mánudegi

Frá og með næst­kom­andi mánu­degi, 10. maí, fara fjölda­tak­mark­anir úr 20 í 50 manns, sund- bað­staðir og lík­ams­rækt­ar­stöðva mega taka á móti 75 pró­sent af leyfi­legum hámarks­fjölda gesta, hámarks­fjöldi þátt­tak­enda í íþróttum og sviðs­listum verður 75 í hverju hólfi eða á sviði og hámarks­fjöldi gesta á sitj­andi við­burðum fer úr 100 í 150 manns.

Þá verður opn­un­ar­tími veit­inga­staða lengdur um klukku­stund og þeim gert að vera tómir eftir klukkan 23. Þá verða líka gerðar ákveðnar til­slak­anir á skóla­starfi. Nýju regl­urnar munu gilda í tvær vikur. Grímu­skylda verður áfram við lýði með óbreyttum hætti.

Svandís Svav­ars­dóttir heil­brigð­is­ráð­herra kynnti þessar breyt­ingar á rík­is­stjórn­ar­fundi í morgun.

[adspot]Þar kom einnig fram að í minn­is­blaði Þórólfs Guðna­sonar sótt­varna­læknis til Svan­dísar, sem breyt­ing­arnar byggja á, hafi líka komið fram að ýmsar aðgerðir á landa­mærum sem gripið var til vegna hóp­sýk­inga sem í upp­hafi voru raktar til ferða­manna á landa­mærum sem ekki héldu reglur um sótt­kví og/eða ein­angrun hafi skilað árangri. „Und­an­farna daga hafi fá smit greinst á hverjum degi utan sótt­kvíar. Því megi ætla að tek­ist hafi að ná utan um fyrr­greind hópsmit þótt ekki sé hægt að segja að veiran sem veldur COVID-19 hafi verið upp­rætt úr sam­fé­lag­inu,“ segir í til­kynn­ingu á vef stjórn­ar­ráðs­ins.

Í lok síð­asta mán­aðar kynnti Svandís aflétt­ing­ar­á­ætlun varð­andi sótt­varna­ráð­staf­anir og sam­komu­tak­mark­anir. Þar kom fram að horft sé til þess að að öllum tak­mörk­unum inn­an­lands verði aflétt í lok júní, eða þegar um 75 pró­sent lands­manna yfir 16 ára aldri hafa fengið að minnsta kosti eina sprautu af bólu­efni.

Samkvæmt þeim veg­vísi var stefnt að því að hækka fjölda­tak­mark­anir upp í allt að 200 manns í byrjun maí, en sú dag­setn­ing hefur ekki náðst. Í síð­ari hluta maí, þegar um 50 pró­sent lands­manna 16 ára og eldri á að vera orð­inn bólu­settur að öllu leyti eða hluta þá á að hækka markið upp í allt að þús­und manns og breyta tveggja metra regl­unni í eins metra reglu.