Norska varnarmálaráðuneytið hefur tilkynnt rúma tvöföldun bandarískra hermanna í Noregi samkvæmt tilkynningu sinni í dag. Áætlanir um fjölgunina voru kynntar fyrr í sumar, en rússnesk yfirvöld sögðu hana óvinveitta og myndu ekki vera án afleiðinga.
Fréttastofa norska ríkisútvarpsins greindi frá fjölguninni fyrr í dag og vísaði til fréttatilkynningar varnarmálaráðuneytisins í Noregi. Samkvæmt tilkynningunni verður bandarískum hermönnum í Noregi og Norður-Evrópu aukið úr 330 í 700. Hermennirnir eru staðsettir í Værnes í Trøndelag í Mið-Noregi, en þeim er skipt út tvisvar á ári. Ráðuneytið segir ákvörðunina um að fjölga bandarískum hermönnum muni styrkja samhæfingu milli norska hersins og annarra Bandamanna í heræfingum.
Áætlanir um fjölgunina voru fyrst birtar í júní, en rússnesk yfirvöld brugðust þá ókvæða við henni. Samkvæmt frétt Business Insider um málið sagði rússneska sendiráðið í Noregi aðgerðina vera „augljóslega óvinveitta og munu ekki vera án afleiðinga.“ Stjórnvöld í Noregi hafa hins vegar sagt að þau telji Rússland ekki ógna öryggi landsins með beinum hætti, en lýstu þó yfir áhyggjum yfir aukinni sókn í hernaðarmálum landsins á síðustu árum, sérstaklega eftir hernám á Krímskaganum í Úkraínu árið 2014.
Kjarninn hefur áður fjallað um aukna spennu í varnarmálum milli Noregs og Rússlands, en rússneski herinn lokaði fyrir umferð í Barentshafinu fyrr í sumar með óvæntri hernaðaræfingu án þess að tilkynna norskum yfirvöldum. Að æfingunni komu 36 herskip og 20 flugvélar, en varnarmálaráðuneyti Rússlands sagði markmið æfingarinnar að undirbúa sig gegn viðamikilli óvinaárás.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.























Athugasemdir