Fjöldi fyrirtækja í afþreyingariðnaði fyrir ferðamenn hefur nífaldast á síðustu tíu árum. Einnig hefur ferðamannastraumur til Íslands hefur verið yfir öllum spám greiningardeilda síðustu fjögur árin. Þetta kemur fram í svari ferðamálaráðherra við fyrirspurn Elsu Láru Arnardóttur um þróun ferðaþjónustu á vef Alþingis.
Elsa Lára Arnardóttir, þingmaður Framsóknarflokksins, lagði fram fyrirspurn til ferðamálaráðherra þann 15. maí síðastliðinn um þróun ferðaþjónustu á Íslandi. Svar ráðherra birtist á vef Alþingis í gær, en samkvæmt því hefur umfang ferðaþjónustu á Íslandi stækkað töluvert á síðustu tíu árum auk þess sem vægi mismunandi flokka innan ferðaþjónustunnar hefur breyst.
Fjöldi afþreyingarfyrirtækja hefur nífaldast

Mest hefur aukningin verið hjá fyrirtækjum sem bjóða upp á afþreyingu fyrir ferðamenn, en á tímabilinu 2007-2017 hefur fjöldi þeirra aukist um 800%. Á sama tímabili hefur fjöldi ferðaskrifstofa aukist um 350% og fjöldi bílaleiga aukist um 130%. Sömuleiðis hefur fjöldi menntaðra leiðsögumanna og fyrirtækja sem bjóða upp á gistingu aukist umtalsvert á svipuðu tímabili, eða um 60% og 55%.
Fjöldi ferðamanna alltaf verið yfir spám

Fjöldi ferðamanna sem komu til Íslands síðustu fjögur árin var einnig borinn saman við spár greiningadeilda þriggju bankanna. Í ljós kom að ferðamannafjöldi hefur alltaf verið meiri en spár gerðu ráð fyrir. Nokkur munur var á raun- og spágildum erlendra ferðamanna fyrir síðasta ár, en ferðamennirnir reyndust þá vera tæp 1,8 milljón, eða um 290 þúsund fleiri en hæstu spár gerðu ráð fyrir.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.












































Athugasemdir