Atvinnuleysið mældist 10,4 prósent í apríl og hefur minnkað um rúmt prósentustig frá ársbyrjun. Af þeim voru tæplega 6.500 manns búin að vera atvinnulaus í 12 mánuði, sem er tæplega þrefalt meira en á sama tíma í fyrra. Þetta kemur fram í nýútgefinni mánaðarskýrslu Vinnumálastofnunar.
Mesta fækkunin í ferðaþjónustu
Samkvæmt skýrslunni hefur atvinnulausum fækkað í öllum atvinnugreinum, miðað við mánuðinn á undan. Mest var þó fækkunin í ferðatengdri starfsemi eins og gisti- og veitingaþjónustu og farþegaflutningum. Einnig hafði atvinnulausum fækkað í sjávarútvegi og upplýsingatækni.
Alls komu tæplega tvö þúsund ný störf sem auglýst voru í vinnumiðlun hjá stofnuninni í apríl. Einnig gaf hún út 176 atvinnuleyfi til útlendinga til starfa hér á landi, en þar af voru 115 einstaklingar sem voru nýir á íslenskum vinnumarkaði.
Líkt og áður mælist atvinnuleysið mest á Suðurnesjum, en þar nemur það 21,6 prósentum. Þó hefur það einnig minnkað þar mest milli mánaða, en skráð atvinnuleysi mældist í 24,5 prósentum í landshlutanum í janúar. Á höfuðborgarsvæðinu mældist atvinnuleysið það sama og á landinu öllu, 10,4 prósent.
Heildaratvinnuleysi karla er nú 11,4 prósent, en 11,6 prósent meðal kvenna. Á Suðurnesjum er atvinnuleysið mun meira meðal kvenna en karla, eða 26,4 prósent hjá konum og 20,7 prósent hjá körlum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir